കുട്ടികൾക്കും രക്ഷിതാക്കൾക്കും ടെൻഷൻ വേണ്ട; പരീക്ഷാക്കാലത്തെ തുണയാകാൻ 'വീ ഹെൽപ്പ്'

പരീക്ഷാക്കാലം എന്നത് പലപ്പോഴും വിദ്യാർത്ഥികൾക്കും അവരുടെ കുടുംബങ്ങൾക്കും വലിയ രീതിയിലുള്ള മാനസിക സമ്മർദ്ദമുണ്ടാക്കുന്ന സമയമാണ്. പഠിച്ചുതീർക്കാനുള്ള പാഠഭാഗങ്ങൾ, മാർക്ക് കുറഞ്ഞുപോകുമോ എന്ന ഭയം, ഉയർന്ന മത്സരബുദ്ധി എന്നിവ കുട്ടികളിൽ കടുത്ത മാനസിക സംഘർഷത്തിന് കാരണമാകാറുണ്ട്. ഈ പ്രശ്നങ്ങൾ ശാസ്ത്രീയമായി പരിഹരിക്കുന്നതിനും കുട്ടികൾക്കും രക്ഷിതാക്കൾക്കും ആത്മവിശ്വാസം നൽകുന്നതിനുമായി കേരള പൊതുവിദ്യാഭ്യാസ വകുപ്പിന്റെ ഹയർ സെക്കൻഡറി വിഭാഗം ആരംഭിച്ച പദ്ധതിയാണ് 'വീ ഹെൽപ്പ്' (WE HELP).

എന്താണ് വീ ഹെൽപ്പ് (WE HELP)?

എസ്.എസ്.എൽ.സി, ഹയർ സെക്കൻഡറി വിദ്യാർത്ഥികൾ പരീക്ഷാസമയത്ത് അനുഭവിക്കുന്ന മാനസിക വെല്ലുവിളികൾ നേരിടുന്നതിനായി കരിയർ ഗൈഡൻസ് ആൻഡ് അഡോളസെന്റ് കൗൺസലിംഗ് സെൽ വഴി നടപ്പിലാക്കുന്ന ടോൾഫ്രീ കൗൺസലിംഗ് സംവിധാനമാണിത്. ഫെബ്രുവരി 16 മുതൽ ആരംഭിക്കുന്ന ഈ സേവനം പരീക്ഷകൾ അവസാനിക്കുന്നത് വരെ എല്ലാ പ്രവൃത്തി ദിവസങ്ങളിലും ലഭ്യമായിരിക്കും.

സേവനത്തിന്റെ പ്രത്യേകതകൾ

സൗജന്യ സേവനം: വിദ്യാർത്ഥികൾക്കും രക്ഷിതാക്കൾക്കും തികച്ചും സലഭമായി ഈ സൗകര്യം പ്രയോജനപ്പെടുത്താം.

ടോൾഫ്രീ നമ്പർ: 1800 425 2844 എന്ന നമ്പറിലാണ് സഹായത്തിനായി വിളിക്കേണ്ടത്.

സമയക്രമം: രാവിലെ 7 മണി മുതൽ വൈകുന്നേരം 7 മണി വരെ തുടർച്ചയായി 12 മണിക്കൂർ സേവനം ലഭ്യമാണ്.

വിദഗ്ദ്ധ കൗൺസലിംഗ്: ബെംഗളൂരുവിലെ നിംഹാൻസിൽ (NIMHANS) നിന്ന് പ്രത്യേക പരിശീലനം ലഭിച്ച അധ്യാപക-കൗൺസിലർമാരാണ് ഫോണിലൂടെ കുട്ടികളുടെയും രക്ഷിതാക്കളുടെയും സംശയങ്ങൾക്ക് മറുപടി നൽകുന്നത്.

രക്ഷിതാക്കൾക്ക് ലഭിക്കുന്ന പിന്തുണ:കുട്ടികളെക്കാൾ പരീക്ഷാ സമ്മർദ്ദം പലപ്പോഴും രക്ഷിതാക്കൾക്കാണ് ഉണ്ടാകാറുള്ളത്. ഇത് പലപ്പോഴും കുട്ടികളുടെ പഠനത്തെ പ്രതികൂലമായി ബാധിക്കും. പരീക്ഷാക്കാലത്ത് കുട്ടികളോട് എങ്ങനെ പെരുമാറണം, അവർക്ക് എങ്ങനെ അനുകൂലമായ പഠനാന്തരീക്ഷം ഒരുക്കണം, ആഹാരക്രമത്തിലും വിശ്രമത്തിലും നൽകേണ്ട ശ്രദ്ധ തുടങ്ങിയ കാര്യങ്ങളിൽ രക്ഷിതാക്കൾക്ക് ഈ ഹെൽപ്പ്‌ലൈൻ വഴി വ്യക്തമായ മാർഗ്ഗനിർദ്ദേശങ്ങൾ ലഭിക്കും.

സ്കൂൾ തലത്തിലുള്ള സംവിധാനങ്ങൾ: ഫോൺ വഴിയുള്ള സഹായത്തിന് പുറമേ, എല്ലാ ഹയർ സെക്കൻഡറി സ്കൂളുകളിലും 'സൗഹൃദ കോർഡിനേറ്റർമാരുടെ' നേതൃത്വത്തിൽ നേരിട്ടുള്ള കൗൺസലിംഗ് സൗകര്യവും ഏർപ്പെടുത്തിയിട്ടുണ്ട്. പഠനത്തിൽ പിന്നോക്കം നിൽക്കുന്നവർക്കും അമിതമായ ഉത്കണ്ഠ അനുഭവിക്കുന്നവർക്കും ഈ സേവനം ഏറെ ആശ്വാസകരമാണ്.

പരീക്ഷ എന്നത് ജീവിതത്തിലെ ഒരധ്യായം മാത്രമാണെന്നും അതിനെ ആത്മവിശ്വാസത്തോടെ നേരിടാനുമാണ് ഈ പദ്ധതിയിലൂടെ അധികൃതർ ലക്ഷ്യമിടുന്നത്. അതിനാൽ പരീക്ഷയെക്കുറിച്ചോർത്ത് ഉത്കണ്ഠ വേണ്ട, ഏതൊരു സഹായത്തിനും 'വീ ഹെൽപ്പ്' കൂടെയുണ്ട്.