ഫേസ്ബുക്ക് പ്രണയം; നടനെത്തേടി പെണ്‍കുട്ടി കൊല്ലത്തെത്തി

കൊല്ലം: ഫേസ്ബുക്ക് വഴി പരിചയത്തിലാകുന്നവരുമായി പ്രണയത്തിലാവുകയും പിന്നീട് കാമുകന്മാരെ തേടി വീടുവിട്ടിറങ്ങുകയും ചെയ്യുന്ന പെണ്‍കുട്ടികളുടെ വാര്‍ത്ത പുതുമയല്ലാത്തതായി മാറിയിട്ടുണ്ട്. പ്രായപൂര്‍ത്തിയാകും മുന്‍പ് തന്നെ പെണ്‍കുട്ടികള്‍ ഇത്തരത്തിലുള്ള ചതിക്കുഴിയില്‍ അകപ്പെടുന്നത് നിത്യ സംഭവമാണെന്ന് പോലീസുകാര്‍ തന്നെ സാക്ഷ്യപ്പെടുത്തുന്നു.

ഫേസ്ബുക്കിലൂടെ പരിചയപ്പെട്ട സീരിയല്‍ നടനെ തേടി പതിനേഴുകാരി പെണ്‍കുട്ടി വീടുവിട്ടിറങ്ങിയതാണ് ഈ ഗണത്തില്‍ പെടുത്താവുന്ന അവസാനത്തെ സംഭവം. കഴിഞ്ഞദിവസം കൊല്ലത്താണ് സംഭവത്തിന്റെ ക്ലൈമാക്‌സ്. കാമുകനെ കാണാന്‍ കൊല്ലത്തെ സ്വകാര്യ ആശുപത്രിക്ക് സമീപത്തെ ഓട്ടോ സ്റ്റാന്‍ഡിലെത്തിയ പെണ്‍കുട്ടിയെ ഓട്ടോ ഡ്രൈവര്‍മാര്‍ ചോദ്യം ചെയ്ത് പോലീസ് ഏല്‍പ്പിക്കുകയായിരുന്നു. പോലീസ് പിന്നീട് രക്ഷിതാക്കളെ വരുത്തി പെണ്‍കുട്ടിയെ വീട്ടിലേക്കയച്ചു.

പ്ലസ്ടു കഴിഞ്ഞതേയുളളൂ പെണ്‍കുട്ടി. ഫേസ്ബുക്കില്‍ സീരിയല്‍ നടനെന്ന രീതിയില്‍ പരിചയപ്പെട്ട യുവാവുമായി കടുത്ത പ്രണയമായപ്പോള്‍ വീടുവിട്ടിറങ്ങിയതാണ്. നടനോടുള്ള ആരാധനമൂത്ത് കുറച്ചുനാള്‍ മുന്‍പ് ഫോണ്‍ നമ്പര്‍ സംഘടിപ്പിച്ചിരുന്നു. ഈ നമ്പരില്‍ വിളിച്ചായിരുന്നു ഏറെനാളത്തെ സൗഹൃദം.

എന്നാല്‍, അടുത്തിടെ നടനെ ഫോണില്‍വിളിച്ചപ്പോള്‍ എടുക്കാതായതോടെയാണ് പെണ്‍കുട്ടി തേടിയിറങ്ങിയത്. ഓട്ടോ സ്റ്റാന്‍ഡില്‍ സംശയാസ്പദമായി പെണ്‍കുട്ടിയെ കണ്ട് ഓട്ടോ ഡ്രൈവര്‍മാര്‍ പോലീസിലേല്‍പ്പിക്കുകയായിരുന്നു. പോലീസ് ചോദ്യം ചെയ്തതോടെയാണ് സംഭവത്തിന്റെ സത്യാവസ്ഥ പുറത്തുവന്നത്. നടന്‍ പെണ്‍കുട്ടിക്ക് വിവാഹവാഗ്ദാനം നല്‍കിയിരുന്നെന്നും എന്നാല്‍ കൊല്ലത്തെത്തിയപ്പോഴാണ് കാമുകന്‍ വിവാഹിതനാണെന്ന് മനസിലായതെന്നും പെണ്‍കുട്ടി പറഞ്ഞു. ആലപ്പുഴ നെടുമുടി സ്വദേശിനിയാണ് പെണ്‍കുട്ടി. പെണ്‍കുട്ടിയെ കാണാതായതിനെ തുടര്‍ന്ന് വീട്ടുകാര്‍ പോലീസില്‍ പരാതി നല്‍കിയിരുന്നു.

English summary

Facebook romance; Alappuzha Girl leaves home to find serial actor