തോൽവി വലിയ തിരിച്ചറിവാകണം,ജനപ്രതിനിധികൾ ജനങ്ങളിലേക്ക് ഇറങ്ങി ചെല്ലണം;ഹൈബി ഈഡൻ

തിരുവനന്തപുരം; തിരഞ്ഞെടുപ്പ് തോൽവി നേതാക്കൾക്കും പ്രവർത്തകർക്കും ഒരു വലിയ തിരിച്ചറിവാകണമെന്ന് ഹൈബി ഈഡൻ എംപി. വർഗീയ ഫാസിസ്റ്റുകളായ ബി.ജെ.പിയുടെ കേരളത്തിലെ അക്കൗണ്ട് പൂട്ടിച്ചത് നമ്മളാണ്.കോൺഗ്രസ് ഒരു പാർട്ടി മാത്രമല്ല. അതൊരു സംസ്ക്കാരം കൂടിയാണ്. നമുക്ക് തിരിച്ചു വന്നേ മതിയാവൂ. സംഘടന ശക്തിപ്പെടണം. ജനപ്രതിനിധികൾ കൂടുതൽ ജനങ്ങളിലേക്ക് ഇറങ്ങി ചെല്ലണം. തളരാതെ നമുക്ക് സധൈര്യം മുന്നോട്ട് പോകാം, ഫേസ്ബുക്കിൽ ഹൈബി കുറിച്ചു.പോസ്റ്റ് വായിക്കാം

ജനവിധി മാനിക്കുന്നു. തിരഞ്ഞെടുക്കപ്പെട്ട മുഴുവൻ ജനപ്രതിനിധികൾക്കും സർക്കാരിനും അഭിനന്ദനങ്ങൾ.

കഴിഞ്ഞ 5 വർഷക്കാലം ക്രിയാത്മകമായ പ്രതിപക്ഷമായി നിന്ന് ഇടതു മുന്നണി സർക്കാരിന്റെ തെറ്റുകൾ ചൂണ്ടിക്കാട്ടാനും അതിൽ പലതും തിരുത്തിക്കുവാനും നമുക്ക് സാധിച്ചിട്ടുണ്ട്. എന്നാൽ ദൗർഭാഗ്യവശാൽ അത്‌ ജനങ്ങളിലേക്ക് എത്തിക്കുവാനുള്ള സംഘടന സംവിധാനം നമുക്കില്ലാതെ പോയി. അതിന്റെ പൂർണ്ണ ഉത്തരവാദിത്വം കേരളത്തിലെ മുഴുവൻ നേതാക്കൾക്കും ഞാനുൾപാടെയുള്ള ജനപ്രതിനിധികൾക്കുമുണ്ട്.

ക്രൂരമായ ടി. പി ചന്ദ്രശേഖരൻ കൊല്ലപ്പെട്ടതിന് ശേഷം കേരളത്തിൽ സി പി ഐ എം ഇനിയുണ്ടാകുമോ എന്ന ആശങ്ക എല്ലാവർക്കുമുണ്ടായിരുന്നു. എന്നാൽ അവർ അവരുടെ സംഘടനാ മികവ് കൊണ്ട് വലിയ തിരിച്ചു വരവ് നടത്തി. എന്നും ജനപക്ഷത്ത് നിൽക്കുന്ന നമ്മൾക്കോ? അത്തരത്തിൽ ഒരു മുന്നേറ്റം നടത്തുവാൻ സാധിക്കുന്നുമില്ല.

ഈ തോൽവി നേതാക്കൾക്കും പ്രവർത്തകർക്കും ഒരു വലിയ തിരിച്ചറിവാകണം. സത്യത്തിൽ വർഗീയ ഫാസിസ്റ്റുകളായ ബി.ജെ. പിയുടെ കേരളത്തിലെ അക്കൗണ്ട് പൂട്ടിച്ചത് നമ്മളാണ്. നിങ്ങൾ ചിന്തിച്ച് നോക്കൂ. കോൺഗ്രസ് ഒരു പാർട്ടി മാത്രമല്ല. അതൊരു സംസ്ക്കാരം കൂടിയാണ്. നമുക്ക് തിരിച്ചു വന്നേ മതിയാവൂ. സംഘടന ശക്തിപ്പെടണം. ജനപ്രതിനിധികൾ കൂടുതൽ ജനങ്ങളിലേക്ക് ഇറങ്ങി ചെല്ലണം. തളരാതെ നമുക്ക് സധൈര്യം മുന്നോട്ട് പോകാം.

English summary

Failure should be a great recognition Says Hibi Eden