കണ്ണൂരിലെ കള്ളവോട്ട്;എല്‍ഡിഎഫും യുഡിഎഫും പ്രതികള്‍

കണ്ണൂര്‍: കണ്ണൂര്‍ ജില്ലയില്‍ വ്യാപകമായി കള്ളവോട്ട് നടന്നതായി പരാതി. യുഡിഎഫ് നല്‍കിയ പരാതിയില്‍ എല്‍ഡിഎഫുകാര്‍ക്കെതിരേയും എല്‍ഡിഎഫുകാര്‍ നല്‍കിയ പരാതിയില്‍ യുഡിഎഫുകാര്‍ക്കെതിരേയും പോലീസ് കേസെടുത്തു.

ആകെ നാല്‍പത് പേര്‍ക്കെതിരെയാണ് പോലീസ് ഇപ്പോള്‍ കേസെടുത്തിരിക്കുന്നത്. ഇതില്‍ 26 പേര്‍ സിപിഎം പ്രവര്‍ത്തകരാണ്. 14 പേര്‍ യുഡിഎഫ് പ്രവര്‍ത്തകരും.

ഏപ്രില്‍ 10 ന് തിരഞ്ഞെടുപ്പ് കഴിഞ്ഞപ്പോള്‍ തന്നെ കണ്ണൂര്‍ മണ്ഡലത്തില്‍ വ്യാപകമായി കള്ളവോട്ട് നടന്നിട്ടുണ്ടെന്ന ആരോപണവും ആയി യുഡിഎഫ് നേതൃത്വം രംഗത്തെത്തിയിരുന്നു. സ്ഥലത്തില്ലാത്തവരുടേയും കിടപ്പിലായവരുടേയും വോട്ടുകള്‍ ചെയ്യപ്പെട്ടിട്ടുണ്ടത്രെ.

സ്ഥലത്തില്ലാത്ത 59 പേരുടെ വോട്ടുകള്‍ 19 പേര്‍ ചേര്‍ന്ന് ചെയ്തു എന്നാണ് യുഡിഎഫ് നല്‍കിയ കേസ്. കോണ്‍ഗ്രസ് തളിപ്പറമ്പ് മണ്ഡലം പ്രസിഡന്റ് നല്‍കിയ പാരാതിയില്‍ കോടതി നിര്‍ദ്ദേശപ്രകാരമാണ് ഇപ്പോള്‍ പോലീസ് കേസ് എടുത്തിരിക്കുന്നത്. കള്ളവോട്ട് ചെയ്തതിന്റെ വീഡിയോ ദൃശ്യങ്ങളും പരാതിക്കൊപ്പം നല്‍കിയിരുന്നു.

134 ബൂത്തുകളില്‍ സിപിഎമ്മിന്റെ നേതൃത്വത്തില്‍ കള്ളവോട്ട് ചെയ്തിട്ടുണ്ടെന്നാണ് ഡിസിസി പ്രസിഡന്റ് ഉന്നയിച്ച ആരോപണം. സിപിഎം നല്‍കിയ പരാതിയില്‍ 14 പേര്‍ക്കെതിരേയും പോലീസ് കേസ് എടുത്തിട്ടുണ്ട്. കള്ളവോട്ട് സംബന്ധിച്ച് സിപിഎമ്മും കോണ്‍ഗ്രസിനെതിരെ ആക്ഷേപം ഉന്നയിച്ചിരുന്നു.

English summary

Fake Vote in Kannur, Police took case against 40 persons.