ജീവനക്കാർക്ക് നൽകിയത് പകുതി ശമ്പളം; കെഎസ്ആർടിസിയിൽ സാമ്പത്തിക പ്രതിസന്ധി രൂക്ഷം!
തിരുവനന്തപുരം: കെഎസ്ആർടിസിയിൽ സാമ്പത്തിക പ്രതിസന്ധി രൂക്ഷമായി തുടരുന്നു. കഴിഞ്ഞ മാസം രണ്ട് ഗഡുക്കളായാണ് ശമ്പളം വിതരണം ചെയ്തത്. ഈ മാസം മൂന്ന് ആഴ്ച പിന്നിട്ടെങ്കിലും പകുതി ശമ്പളം മാത്രമാണ് കൊടുത്തത്. ഇതിനെതിരെ എഐടിയുസി ആഭിമുഖ്യത്തിലുള്ള തൊഴിലാളി യൂണിയന് തമ്പാനൂര് സ്റ്റാൻഡിൽ നടത്തുന്ന നിരാഹാര സമരം 12 ദിവസം പിന്നിട്ടു.
സിഐടിയുവിന്റെ നേതൃത്വത്തിലുള്ള യൂണിയന് ചീഫ് ഓഫീസീനു മുന്നില് ഒരാഴ്ചയായി ഉപരോധ സമരം നടത്തുകയാണ്. എന്നാൽ പ്രത്യക്ഷ പ്രതിഷേധ സമരം ഫലം കാണാത്തതിന്റെ നിരാശയിലാണ് ഭരണാനുകൂല തൊഴിലാളി സംഘടനകള്. ഗതാഗതമന്ത്രി വെള്ളിയാഴ്ച വിദേശത്തേക്ക് പോകുകയാണ്. ഇതോടെ പ്രശന പരിഹാര ചര്ച്ച നീണ്ടേക്കും.
പ്രതിസന്ധി രൂക്ഷമായ സാഹചര്യത്തിൽ സര്ക്കാര് സഹായം അനിവാര്യമെന്നാണ് കെഎസ്ആര്ടിസിയുടെ വിശദീകരണം. ശമ്പള വിതരണം പൂര്ത്തിയാക്കാന് ഇനി 37 കോടി രൂപ വേണം. ദൈനംദിന വരുമാനത്തില് നിന്ന് മാറ്റി വച്ച തുക കൂടിച്ചേര്ത്താലും 19 കോടിയെങ്കിലും സര്ക്കാര് അടിയന്തര സഹായമായി നല്കണമെന്നാണ് കെഎസ്ആർടിസി ആവശ്യപ്പെട്ടിരിക്കുന്നത്.