സംസ്ഥാനത്ത് സാമ്പത്തിക പ്രതിസന്ധി: ട്രഷറി ഇടപാടുകൾക്ക് നിയന്ത്രണം, ഇളവ് 31 ഇടപാടുകൾക്ക്!

Updated: Saturday, November 16, 2019, 1:32 [IST]

തിരുവനന്തപുരം: സംസ്ഥാനത്ത് സാമ്പത്തിക പ്രതിസന്ധി രൂക്ഷമാവുന്നു. ഇതോടെ ധനകാര്യവകുപ്പ് ട്രഷറി ഇടപാടുകൾക്ക് നിയന്ത്രണം ഏർപ്പെടുത്തിയിട്ടുണ്ട്. അത്യാവശ്യ ചെലവുകൾക്കുള്ള ബില്ലുകളല്ലാതെ മറ്റൊന്നും പാസാക്കരുതെന്നാണ് ട്രഷറിക്ക് ധനകാര്യ വകുപ്പിൽ നിന്നും ലഭിച്ചിട്ടുള്ള നിർദേശം. അത്യാവശ്യമുള്ള 31 ഇനം ഇടപാടുകൾക്ക് പുറമേ മറ്റൊരു സാമ്പത്തിക ഇടപാടുകളും നടത്തരുതെന്നാണ് ധനകാര്യ വകുപ്പിൽ നിന്നുള്ള നിർദേശം. ഇനിയൊരു ഉത്തരവ് ഉണ്ടാകുന്നതുവരെയാണ് നിയന്ത്രണമെന്ന് ധനകാര്യ മന്ത്രി ടിഎം തോമസ് ഐസക് അറിയിച്ചിട്ടുണ്ട്.

അതേസമയം തദ്ദേശ സ്ഥാപനങ്ങളുടെ ബില്ലുകൾക്കും നിയന്ത്രണമുണ്ട്. മുഖ്യമന്ത്രിയുടെ ദുരിതാശ്വാസ ഫണ്ട് ഉൾപ്പെടെ 31 ഇനങ്ങൾക്ക് മാത്രമാണ് ഇളവുള്ളത്. ഈ സർക്കാരിന്റെ കാലത്ത് നേരത്തെ അഞ്ച് ലക്ഷം രൂപക്ക് മുകളിലുള്ള ബില്ലുകൾക്ക് മാത്രമാണ് നിയന്ത്രണം പ്രാബല്യത്തിലുണ്ടായിരുന്നത്. എന്നാൽ ട്രഷറിക്ക് നിയന്ത്രണം ഏർപ്പെടുത്തിയതിനുള്ള കാരണം വ്യക്തമല്ല. ഈ സാമ്പത്തിക വർഷം അവസാനിക്കാൻ നാല് മാസങ്ങൾ മാത്രം അവശേഷിക്കെയാണ് പുതിയ നിയന്ത്രണം ധനകാര്യ വകുപ്പ് കൊണ്ടുവന്നിട്ടുള്ളത്.