ഭക്ഷ്യവിഷബാധ: 429 ഹോട്ടലുകളില് പരിശോധന, 43 സ്ഥാപനങ്ങളുടെ പ്രവര്ത്തനം നിര്ത്തിവയ്പ്പിച്ചു
തിരുവനന്തപുരം: കോട്ടയത്ത് ഭക്ഷ്യവിഷബാധയെ തുടര്ന്ന് യുവതി മരിക്കാനിടയായ സംഭവത്തിന് പിന്നാലെ സംസ്ഥാനത്തെ ഹോട്ടലുകളില് ഭക്ഷ്യ സുരക്ഷ വിഭാഗത്തിന്റെ വ്യാപക പരിശോധന. ഇന്ന് 429 സ്ഥാപനങ്ങളില് ഭക്ഷ്യ സുരക്ഷാ വകുപ്പ് പരിശോധന നടത്തിയതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു.
വൃത്തിഹീനമായി പ്രവര്ത്തിച്ച 22 സ്ഥാപനങ്ങളുടേയും ലൈസന്സ് ഇല്ലാതിരുന്ന 21 സ്ഥാപനങ്ങളുടേയും ഉള്പ്പെടെ 43 സ്ഥാപനങ്ങളുടെ പ്രവര്ത്തനം നിര്ത്തി വയ്പ്പിച്ചു. 138 സ്ഥാപനങ്ങള്ക്ക് നോട്ടീസ് നല്കി. 44 സാമ്പിളുകള് പരിശോധനയ്ക്കയച്ചിട്ടുണ്ട്. ശക്തമായ പരിശോധനകള് തുടരുമെന്നും മന്ത്രി വ്യക്തമാക്കി.
അതേസമയം, സംസ്ഥാനത്ത് ഭക്ഷ്യ സുരക്ഷാ വകുപ്പ് നടപ്പിലാക്കിയ ഓപ്പറേഷന് ഹോളിഡേയുടെ ഭാഗമായി ഡിസംബര് 31 വരെ 5864 പരിശോധനകള് നടത്തിയതായി മന്ത്രി വീണാ ജോര്ജ് അറിയിച്ചു. 26 സ്ഥാപനങ്ങള് അടപ്പിച്ചു. ക്രിസ്തുമസ് പുതുവത്സര അവധിക്കാലവുമായി ബന്ധപ്പെട്ട് ഭക്ഷ്യ സുരക്ഷാ വകുപ്പ് നടപ്പിലാക്കിയ പ്രത്യേക പരിശോധനയിലൂടെയാണ് ഒരാഴ്ചയ്ക്കിടെ ഇത്രയും സ്ഥാപനങ്ങള്ക്കെതിരെ നടപടി സ്വീകരിച്ചത്.
എല്ലാ ജില്ലകളിലും ഭക്ഷ്യ സുരക്ഷാ ഓഫീസര്മാരുടെ സ്പെഷ്യല് സ്ക്വാഡുകള് രൂപീകരിച്ച് പ്രത്യേക പരിശോധനകള് നടത്തിയിരുന്നു. 802 സ്ഥാപനങ്ങള്ക്ക് നോട്ടീസ് നല്കി. 337 സ്റ്റാറ്റിയൂട്ടറി സാമ്പിളുകളും 540 സര്വൈലന്സ് സാമ്പിളുകളും ശേഖരിച്ചിട്ടുണ്ട്. കഴിഞ്ഞ ദിവസമാണ് കോട്ടയത്തെ ഹോട്ടലില് നിന്ന് കുഴിമന്തി കഴിച്ച നഴ്സ് ഭക്ഷ്യവിഷബാദയെ തുടര്ന്ന് മരണപ്പെട്ടത്. ഇതേ ഹോട്ടലില് നിന്ന് ഭക്ഷണം കഴിച്ച 20 പേര്ക്കും ശാരീരിക അസ്വാസ്ഥ്യങ്ങള് ഉണ്ടായിരുന്നു.
മരണപ്പെട്ട നഴ്സിനെ ആദ്യം ശാരീരിക അസ്വാസ്ഥ്യത്തെ തുടര്ന്ന് സ്വകാര്യ ആശുപത്രിയിലും പിന്നീട് കോട്ടയം മെഡിക്കല് കോളേജ് ആശുപത്രിയിലും പ്രവേശിപ്പിക്കുകയായിരുന്നു. ഗുരുതരമായതിനെ തുടര്ന്ന് വെന്റിലേറ്ററില് പ്രവേശിപ്പിച്ചിരുന്നു. ഇന്നലെ വൈകീട്ടോടെയാണ് യുവതി മരണത്തിന് കീഴടങ്ങിയത്.
നഴ്സ് ഭക്ഷണം കഴിച്ച ഹോട്ടല് ഭക്ഷ്യ സുരക്ഷ വിഭാഗം അടപ്പിച്ചിരുന്നു. കടയിലേക്ക് പ്രതിഷേധവുമായി എത്തിയ ഡി വൈ എഫ് ഐ പ്രവര്ത്തകര് കടയടപ്പിച്ചിരുന്നു. അതേസമയം, സംഭവത്തിന് പിന്നാലെ സംസ്ഥാനത്ത് 14 ജില്ലകളിലും വ്യാപകമായി പരിശോധനകള് നടത്താന് ഭക്ഷ്യസുരക്ഷാ കമ്മീഷണര്ക്ക് നിര്ദ്ദേശം നല്കിയിരുന്നു. ലൈസന്സോ രജിസ്ട്രേഷനോ ഇല്ലാത്ത സ്ഥാപനങ്ങള്ക്കെതിരെ നടപടി സ്വീകരിക്കുന്നതായിരിക്കും. ലൈസന്സ് ഉണ്ടെങ്കിലും ശുചിത്വമില്ലാത്തതോ മായം കലര്ന്നതോ വൃത്തിഹീനമായ അന്തരീക്ഷത്തില് പാകം ചെയ്യുന്നതോ കാലപ്പഴക്കമുള്ളതോ ആയ ഭക്ഷണം നല്കുന്ന സ്ഥാപനങ്ങള്ക്കെതിരെ കര്ശന നടപടികള് സ്വീകരിക്കാനും നിര്ദ്ദേശമുണ്ട്.
Click it and Unblock the Notifications
Sign in with Google