'കോൺഗ്രസ് പാരമ്പര്യമുള്ള പാർട്ടി'; ലതികാ സുഭാഷ് എൻസിപിയിലേക്ക്

കോൺഗ്രസ് പാരമ്പര്യമുള്ള പാർട്ടി ആയതിനാലാണ് എൻസിപിയുമായി സഹകരിക്കാൻ തീരുമാനിച്ചതെന്ന് ലതികാ സുഭാഷ് പറഞ്ഞു

Updated: Sunday, May 23, 2021, 11:51 [IST]

തിരുവനന്തപുരം: നിയമസഭാ സീറ്റ് നിഷേധിച്ചതിന് പിന്നാലെ കോൺഗ്രസ് വിട്ട മുതിർന്ന വനിതാ നേതാവ് ലതികാ സുഭാഷ് എൻസിപിയിലേക്ക്. ഇത് സംബന്ധിച്ച ചർച്ച എൻസിപി അധ്യക്ഷൻ പി.സി ചാക്കോയുമായി പൂർത്തിയായി. ഔദ്യോഗിക പ്രഖ്യാപനം ഉടൻ ഉണ്ടാകുമെന്നാണ് വിവരം. കോൺഗ്രസ് പാരമ്പര്യമുള്ള പാർട്ടി ആയതിനാലാണ് എൻസിപിയുമായി സഹകരിക്കാൻ തീരുമാനിച്ചതെന്ന് ലതികാ സുഭാഷ് പറഞ്ഞു.

കഴിഞ്ഞ നിയമസഭാ തിരഞ്ഞെടുപ്പിലും ലതികാ സുഭാഷിന് കോൺഗ്രസ് സീറ്റ് നിഷേധിച്ചിരുന്നു. തുടർച്ചയായ അവഗണനയോട് ശക്തമായ പ്രതിഷേധമാണ് അവർ അന്ന് രേഖപ്പെടുത്തിയത്. കെപിസിസി ആസ്ഥാനത്തിരുന്ന് തല മുണ്ഡനം ചെയ്തുകൊണ്ടായിരുന്നു ലതികയുടെ പ്രതിഷേധം. തിരഞ്ഞെടുപ്പിൽ ഏറ്റുമാനൂരിൽ നിന്ന് സ്വതന്ത്രയായി മത്സരിക്കുകയും ചെയ്തിരുന്നു. 7624 വോട്ടുകൾ നേടിയ ലതിക കോൺഗ്രസ് സ്ഥാനാർഥിയുടെ തോൽവിയിൽ പ്രധാന കാരണമാകുകയും ചെയ്തു.

കോൺഗ്രസ് വിട്ട് എൻസിപിയിലേക്ക് എത്തിയ പി.സി ചാക്കോ കഴിഞ്ഞ ദിവസമാണ് പാർട്ടി സംസ്ഥാന അധ്യക്ഷനായി തിരഞ്ഞെടുക്കപ്പെട്ടത്. ഇതിന് പിന്നാലെ ലതികയും സംസാരിക്കുകയായിരുന്നു. അടുപ്പമുള്ളവരുമായി ചർച്ച ചെയ്ത ശേഷമാണ് തീരുമാനം അവർ ചാക്കോയെ അറിയിച്ചതെന്നാണ് വിവരം. ഇതോടെ സ്വതന്ത്ര നിലപാടിൽ നിന്ന് കക്ഷി രാഷ്ട്രിയത്തിലേക്ക് തന്നെ മടങ്ങിയെത്തുകയാണ് മുൻ മഹിള കോൺഗ്രസ് അധ്യക്ഷ കൂടിയായ ലതികാ സുഭാഷ്.

പാർട്ടി അധ്യക്ഷനായി ചുമതലയേറ്റ ശേഷം കോൺഗ്രസിന് ബദലായ ശക്തിയായി എൻസിപി മാറുമെന്ന് പി.സി ചാക്കോ പറഞ്ഞിരുന്നു. നിരാശരായ കോൺഗ്രസുകാർ എൻസിപിയിലേക്ക് വരും. കേരളത്തിലെ കോൺഗ്രസിനെ നയിക്കുന്നത് ആത്മഹത്യ പ്രവണതയാണെന്നും പി.സി ചാക്കോ പരിഹസിച്ചിരുന്നു. ഇതിന്റെ തുടക്കം എന്ന രീതിയിലാണ് ലതികാ സുഭാഷിന്റെ എൻസിപി പ്രവേശനത്തെ വിലയിരുത്തുന്നത്.

ലോക്ക്ഡൗണ്‍ നിയന്ത്രണങ്ങള്‍ ലംഘിച്ചെന്ന് ആരോപിച്ച് യാത്രക്കാരനെ കയ്യേറ്റം ചെയ്ത് കളക്ടര്‍- ചിത്രങ്ങള്‍

ലതികാ സുഭാഷിലൂടെ കോണ്‍ഗ്രസില്‍ അസ്വസ്ഥരായ കൂടുതല്‍ നേതാക്കളെ എൻസിപിയിലേക്ക് അടുപ്പിക്കുകയാണ് ചാക്കോയുടെ ലക്ഷ്യം. പ്രവര്‍ത്തനപരിചയം കണക്കിലെടുത്ത് എൻസിപിയില്‍ മികച്ച സ്ഥാനം ലതികാ സുഭാഷും പ്രതീക്ഷിക്കുന്നുണ്ട്. വനിതാ നേതാക്കന്മരുടെ അഭാവമുള്ള എൻസിപിക്ക് ലതികയുടെ വരവ് നേട്ടമാകുമെന്ന് ഉറപ്പാണ്.

സൂര്യകാന്തി പൂ പോലെ; മഞ്ഞയിൽ സുന്ദരിയായി പ്രണിത