സിപിഎം മുന്‍ എംഎല്‍എ എസ് രാജേന്ദ്രൻ ബിജെപിയിലേക്ക്

Updated: Saturday, January 10, 2026, 17:29 [IST]

സിപിഐഎം മുൻ എംഎൽഎ എസ് രാജേന്ദ്രൻ ബിജെപിയിൽ ചേരും. ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറുമായി അദേഹം ചർച്ച നടത്തി. ഒരു മാസത്തിനകം ബിജെപി നേതാക്കളുടെ സൗകര്യാർഥം മൂന്നാറിൽ നടക്കുന്ന ചടങ്ങിലായിരിക്കും പാർട്ടി പ്രവേശനമെന്നാണ് വിവരം. മൂന്ന് ടേമിലായി 15 വർഷം സിപിഐഎമ്മിന്റെ ദേവികുളം എംഎൽഎയായിരുന്നു എസ് രാജേന്ദ്രൻ.

കഴിഞ്ഞ നിയമസഭാ തെരഞ്ഞെടുപ്പിൽ എൽഡിഎഫ് സ്ഥാനാർത്ഥിയായിരുന്ന എ രാജയെ തോൽപിക്കാൻ ശ്രമിച്ചുവെന്ന് ആരോപിച്ച് പാർട്ടിയിൽനിന്നും രാജേന്ദ്രനെ സ്സപെൻഡ് ചെയ്തിരുന്നു. പിന്നാലെ സിപിഐഎമ്മുമായി ഇടഞ്ഞ് നിൽക്കുകയായിരുന്നു. സസ്‌പെൻഷൻ കാലാവധി കഴിഞ്ഞിട്ടും തിരികെ പാർട്ടിയിൽ പ്രവേശിപ്പിക്കാത്തതിലും എസ് രാജേന്ദ്രന് അതൃപ്തി ഉണ്ടായിരുന്നു.

വ്യക്തിപരമായ താൽപ്പര്യങ്ങൾക്കല്ല, മറിച്ച് ഇടുക്കി ജില്ലയുടെയും തോട്ടം മേഖലയുടെയും വികസനത്തിന് വേണ്ടിയാണ് താൻ ബിജെപിയിൽ ചേരുന്നതെന്ന് എസ്. രാജേന്ദ്രൻ വ്യക്തമാക്കി. ബിജെപിയിൽ ചേരുന്നത് 5 ഉപാധികളുടെ അടിസ്ഥാനത്തിൽ ആണെന്ന് എസ് രാജേന്ദ്രൻ പറഞ്ഞു. ഇന്ദിരാഗാന്ധി നടപ്പിലാക്കിയ കേന്ദ്ര വനസംരക്ഷണ നിയമത്തിൽ കാതലായ മാറ്റങ്ങളാണ് ആവശ്യപ്പെട്ടിരിക്കുന്നത്. ഇത് കേന്ദ്രം അംഗീകരിക്കുമെന്നാണ് കരുതുന്നതെന്നും രാജേന്ദ്രൻ കൂട്ടിച്ചേർത്തു. എന്നാൽ നിയമസഭ തിരഞ്ഞെടുപ്പിൽ എൻഡിഎ സ്ഥാനാർഥിയായി മത്സരിക്കുമോയെന്ന ചോദ്യത്തിനു രാജേന്ദ്രനു വ്യക്തമായ ഉത്തരം നൽകിയില്ല.

കഴിഞ്ഞ ദിവസമാണ് ഇടത് സഹയാത്രികൻ റെജി ലൂക്കോസ് ബിജെപിയിൽ ചേർന്നത്. ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറിൽ നിന്നാണ് റെജി ലൂക്കോസ് അംഗത്വം സ്വീകരിച്ചത്. ചാനൽ ചർച്ചകളിൽ സ്ഥിരമായി ഇടതുപക്ഷത്തിന്റെ മുഖമായിരുന്നു റെജി ലൂക്കോസ്. ബിജെപിയെ പല സമയത്തും നിശിതമായി വിമർശിച്ചിരുന്നു. അദേഹത്തിന്റെ പാർട്ടി ചുവടുമാറ്റം വലിയ അമ്പരപ്പാണ് പാർട്ടി പ്രവർത്തകർക്കിടയിലും നേതാക്കൾക്കിടയിലും ഉണ്ടാക്കിയത്.