വാട്‌സാപ്പില്‍ നഗ്ന ചിത്രങ്ങള്‍ കൈമാറി; ഏഷ്യന്‍ കമിതാക്കളെ യുഎഇ നാടുകടത്തും

By Desk

Updated: Thursday, March 29, 2018, 18:00 [IST]

റാസല്‍ഖൈമ: വാട്ട്‌സാപ്പിലൂടെ നഗ്ന ചിത്രങ്ങള്‍ കൈമാറുകയും വിവാഹത്തിനു പുറത്ത് ലൈംഗികബന്ധത്തിലേര്‍പ്പെടുകയും ചെയ്ത ഏഷ്യന്‍ കമിതാക്കളെ മൂന്നു മാസത്തെ തടവിനും നാടുകടത്തലിനും ശിക്ഷിച്ചു. റാസല്‍ഖൈമ ക്രിമിനല്‍ കോടതിയാണ് ശിക്ഷ വിധിച്ചത്. 19കാരനായ കാമുകനും 20 വയസ്സുള്ള കാമുകിയുമാണ് കുടുങ്ങിയത്. തന്നെയല്ലാതെ മറ്റൊരാളെ വിവാഹം ചെയ്താല്‍ നഗ്ന ചിത്രങ്ങള്‍ സാമൂഹ്യമാധ്യമങ്ങളിലൂടെ പ്രചരിപ്പിക്കുമെന്ന് യുവതിയെ ഭീഷണിപ്പെടുത്തിയെന്ന കുറ്റവും 19കാരനെതിരേ കോടതി ചുമത്തിയിരുന്നു.

മകളെ യുവാവ് ഭീഷണിപ്പെടുത്തുന്നുവെന്ന് കാണിച്ച് കുട്ടിയുടെ മാതാവാണ് പോലിസിനെ സമീപിച്ചത്. എന്നാല്‍ പോലിസ് നടത്തിയ അന്വേഷണത്തില്‍ ഇരുവരും കാമുകീകാമുകന്‍മാരാണെന്ന് വ്യക്തമാവുകയായിരുന്നു. പെണ്‍കുട്ടിക്ക് 18 വയസ്സ് തികയുന്നതിന് മുമ്പ് തന്നെ നഗ്നചിത്രങ്ങള്‍ പരസ്പരം കൈമാറിയിരുന്നതായും ലൈംഗിക ബന്ധത്തില്‍ ഏര്‍പ്പെട്ടിരുന്നതായും അന്വേഷണത്തില്‍ വ്യക്തമായി. പെണ്‍കുട്ടിയുടെ വീട്ടില്‍ ആരുമില്ലാതിരുന്ന സമയത്ത് കാമുകനെ ക്ഷണിച്ചുവരുത്തുകയായിരുന്നു.

ആദ്യം പെണ്‍കുട്ടിയാണ് സ്വന്തം നഗ്ന ചിത്രങ്ങള്‍ വാട്ട്‌സാപ്പ് വഴി തനിക്ക് അയച്ചുതന്നതെന്നും തന്റെ ചിത്രങ്ങള്‍ നല്‍കാന്‍ പെണ്‍കുട്ടി ആവശ്യപ്പെടുകയായിരുന്നുവെന്നും കാമുകന്‍ കോടതിയില്‍ പറഞ്ഞു. പിതാവിന്റെ വീട്ടില്‍ വച്ച് സൗകര്യമൊരുക്കിയത് പെണ്‍കുട്ടി തന്നെ താല്‍പര്യമെടുത്തായിരുന്നുവെന്നും ഇയാള്‍ അറിയിച്ചു. ആദ്യ കൂടിക്കാഴ്ചയുടെ സമയത്ത് തന്നെ പരസ്പരം ലൈംഗിക ബന്ധത്തിലേര്‍പ്പെട്ടിരുന്നു. തുടര്‍ന്ന് പെണ്‍കുട്ടി മറ്റൊരു ദിവസം വരാന്‍ ആവശ്യപ്പെടുകയായിരുന്നു.

എന്നാല്‍ വിവാഹം ചെയ്തില്ലെങ്കില്‍ ഫോട്ടോകള്‍ സോഷ്യല്‍ മീഡിയ വഴി പ്രചരിപ്പിക്കുമെന്ന് താന്‍ ഭീഷണിപ്പെടുത്തിയിട്ടില്ലെന്നായിരുന്നു ഇയാളുടെ വാദം. കാമുകിയാവട്ടെ തനിക്കെതിരായ എല്ലാ കുറ്റങ്ങളും കോടതിയില്‍ സമ്മതിക്കുകയായിരുന്നു. മൂന്നു മാസത്തെ തടവിനും നാടുകടത്തലിനും ശിക്ഷിച്ച കീഴ്‌ക്കോടതി വിധിക്കെതിരേ ഇരുവരും അപ്പീല്‍ നല്‍കിയെങ്കിലും മേല്‍ക്കോടതിയും ശിക്ഷ ശരിവയ്ക്കുകയായിരുന്നു.