പ്രളയക്കെടുതിയിൽ നട്ടംതിരിയുന്ന നാടിന് നാല് വയസ്സുകാരിയുടെ സഹായം.. പണക്കുടുക്ക കേരളത്തിന്

കൊല്‍ക്കത്ത: പ്രളയ ദുരന്തത്തില്‍ വലയുന്ന കേരളത്തിന് രാജ്യത്തിന്റെ വിവിധ ഭാഗങ്ങളില്‍ നിന്നും സഹായങ്ങളെത്തുന്നുണ്ട്. കൊച്ച് കുട്ടികള്‍ മുതല്‍ സിനിമാ താരങ്ങളും രാഷ്ട്രീയ പാര്‍ട്ടികളും നേതാക്കളും വ്യവസായികളുമടക്കം കേരളത്തെ വലിയ തോതില്‍ സഹായിക്കുന്നു. തമിഴ്‌നാട്ടുകാരിയായ പെണ്‍കുട്ടി സൈക്കിള്‍ വാങ്ങിക്കാന്‍ ചേര്‍ത്ത് വെച്ച പണം കേരളത്തിലെ ദുരിതബാധിതര്‍ക്ക് നല്‍കിയത് പോലുള്ള നന്മയുടെ അനുഭവങ്ങള്‍ നിരവധിയുണ്ട്.

ദക്ഷിണ കൊല്‍ക്കത്തയിലെ ജാദവ്പൂര്‍ സ്വദേശിനിയാണ് നാല് വയസ്സുകാരി അപരാജിത സാഹ. പിറന്നാള്‍ ദിനത്തിലടക്കം ലഭിച്ച കുഞ്ഞുകുഞ്ഞു സമ്മാനത്തുകകള്‍ അവള്‍ കൂട്ടിവെച്ചത് പ്രിയപ്പെട്ട സംഗീതോപകരണം വാങ്ങുന്നതിന് വേണ്ടിയായിരുന്നു. 14,800 രൂപയുണ്ടായിരുന്നു അപരാജിതയുടെ പണക്കുടുക്കയില്‍. ഈ തുകയത്രയും കേരളത്തിലെ ദുരിതബാധിതര്‍ക്ക് വേണ്ടി നല്‍കിയിരിക്കുകയാണ് ഈ നാലുവയസ്സുകാരി.

പശ്ചിമ ബംഗാളിലെ പ്രമുഖ സിപിഎം നേതാക്കളായ ബിമന്‍ ബോസ്, സുര്‍ജ്യ കാന്ത മിശ്ര എന്നിവര്‍ക്കാണ് അപരാജിത പണം കൈമാറിയത്. അച്ഛനോടൊപ്പം സിപിഎം പാര്‍ട്ടി ഓഫീസിലെത്തിയാണ് പണക്കുടുക്ക അടക്കം കേരളത്തിന് വേണ്ടി അപരാജിത നല്‍കിയത്. ഈ നാല് വയസ്സുകാരിക്ക് നന്ദി പറയുകയാണ് സോഷ്യല്‍ മീഡിയയിലൂടെ കേരളം.

നിങ്ങൾക്കും കേരളത്തെ സഹായിക്കാം. മുഖ്യമന്ത്രിയുടെ ദുരിതാശ്വാസ നിധിയിലേക്ക് നിങ്ങൾക്കും സംഭാവന നൽകാം. ഇതാണ് സംഭാവനകൾ അയക്കാനുള്ള വിവരം.

Name of Donee: CMDRF
Account number : 67319948232
Bank: State Bank of India
Branch: City branch, Thiruvananthapuram
IFSC Code: SBIN0070028
Swift Code: SBININBBT08

keralacmdrf@sbi എന്ന യുപിഐ ഐഡി വഴിയും സംഭാവനകൾ നല്‍കാവുന്നതാണ്.