മദ്യപിച്ച് ലക്കുകെട്ടപ്പോള്‍ വീരസാഹസിക കഥ വിളിച്ചു പറഞ്ഞു; മരണം കൊലപാതകമാണെന്ന് തെളിഞ്ഞു

Updated: Wednesday, December 19, 2018, 14:34 [IST]

അടിമാലി: മദ്യപിച്ച് ലക്കുകെട്ട സുഹൃത്തുക്കളുടെ സംസാരം വഴിതുറന്നത് മാസങ്ങള്‍ക്ക് മുമ്പ് നടന്ന മരണം കൊലപാതകമാണെന്ന് തെളിയിക്കുന്നതിലേക്ക്. പാറയിടുക്കില്‍ കണ്ടെത്തിയ മൃതദേഹം കണ്ടെത്തിയ സംഭവം കൊലപാതകമാണെന്ന് തെളിഞ്ഞതോടെ രണ്ടുപേരെ പോലീസ് അറസ്റ്റ് ചെയ്തത്.

പണിക്കന്‍കുടി മുള്ളരിക്കൂടി കരിമ്പനാനിക്കല്‍ വീട്ടില്‍ സജീവന്റെ മരണം കൊലപാതകമാണെന്ന് തെളിഞ്ഞതോടെയാണ് സുഹൃത്തുക്കളായ മുള്ളരിക്കുടി സ്വദേശികളായ കുന്തനാനിക്കല്‍ സുരേന്ദ്രന്‍, വരിക്കാനിക്കല്‍ ബാബു എന്നിവരെ ചൊവ്വാഴ്ച്ച് പോലീസ് അറസ്റ്റ് ചെയ്തത്.

ജനുവരി 26 നാണ് പണിക്കന്‍ കുടി മുള്ളരിക്കുടി കരിമ്പനാനിക്കല്‍ വീട്ടില്‍ സജീവനെ കുന്നനാനിത്തണ്ടിനു സമീപമുള്ള പാറക്കെട്ടിന് താഴെയുള്ള കൃഷിയിടത്തില്‍ മരിച്ച നിലയില്‍ കണ്ടെത്തിയത്. സജീവന്‍ ആത്മഹത്യ ചെയ്തു എന്നായിരുന്നു സുഹൃത്തുക്കള്‍ പ്രചരിപ്പിച്ചിരുന്നത്.

സജീവന്റെ മരണത്തില്‍ സംശയം തോന്നിയ ഭാര്യ പോലീസില്‍ പാരാതി നല്‍കിയിരുന്നു. അന്വേഷണം ആവശ്യപ്പെട്ട് ബന്ധുക്കളും നാട്ടുകാരും രംഗത്ത് എത്തിയിരുന്നു. ഇതേ തുടര്‍ന്നാണ് അന്വേഷണം സിഐ പികെ സാബുവിന്റെ നേതൃത്വത്തിലുള്ള പ്രത്യേക സംഘം ഏറ്റെടുക്കുകയും ചെയ്തു.

ഇതിനിടെയാണ് ഒരു മദ്യപാന സദസ്സില്‍ മദ്യപിച്ച് ലക്കുകെട്ട ബാബു താന്‍ ഒരാളെ കൊന്നു കൊക്കയിലെറിഞ്ഞിട്ടും ആരും ചോദിച്ചിട്ടില്ലെന്ന് പറയുന്നത്. സംശയം തോന്നിയ നാട്ടുകാര്‍ വിവരം പോലീസില്‍ അറിയിക്കുകയായിരുന്നു. തുടര്‍ന്ന് പ്രതികളെ ചോദ്യം ചെയ്തപ്പോള്‍ കുറ്റം സമ്മതിക്കുകയായിരുന്നു.

ഒരുമിച്ച് മദ്യപിക്കുന്നതിനിടെ പ്രകോപിതരായ പ്രതികള്‍ സജീവനെ 150 അടി താഴ്ച്ചയിലേക്ക് എറഞ്ഞു കൊലപ്പെടുത്തുകയായിരുന്നുവെന്നാണ് പോലീസ് വ്യക്തമാക്കുന്നത്. കൊലപാതകത്തിന് ശേഷം മരണം ആത്മഹത്യയാണെന്ന് തെളിയിക്കാനുള്ള ശ്രമങ്ങള്‍ പ്രതികള്‍ നടത്തിയിരുന്നെന്നും പോലീസ് പറയുന്നു.