6 തവണയും ജയിച്ചത് കാര്‍ത്തികേയന്‍ തന്നെ: സുലേഖ

അരുവിക്കര: ശബരീനാഥന് അവസരം നല്‍കിയതിലൂടെ അരുവിക്കര ആറാമത്തെ വട്ടവും കാര്‍ത്തികേയനെ വിജയിപ്പിച്ചുവെന്ന് അദ്ദേഹത്തിന്റെ ഭാര്യ സുലേഖ. കാര്‍ത്തികേയന്റെ ആത്മാവിനെ വേദനിപ്പിച്ച ആരോപണങ്ങള്‍ക്ക് ജനങ്ങള്‍ നല്‍കിയ മറുപടിയാണ് ഈ വിജയമെന്നും അവര്‍ പറഞ്ഞു.

കാര്‍ത്തികേയന്‍ മരിച്ചയുടന്‍ അരുവിക്കരയിലെ വികസന പ്രവര്‍ത്തനങ്ങള്‍കൊണ്ട് നിറഞ്ഞ മാധ്യമങ്ങള്‍ മൂന്നു മാസത്തിന് ശേഷം ഇവിടെ വികസനമില്ലെന്ന് ചര്‍ച്ച ചെയ്യുന്നത് കാണേണ്ടി വന്നു. ജനങ്ങള്‍ സത്യത്തെ അംഗീകരിച്ചുവെന്നും സുലേഖ പറഞ്ഞു.വികസന കാര്യങ്ങളില്‍ എന്ത് ചെയ്യണമെന്ന് ശബരീനാഥന് താന്‍ പറഞ്ഞു കൊടുക്കേണ്ടതില്ലെന്നും അവര്‍ പറഞ്ഞു.

ജനങ്ങളുടെ വിജയമാണിതെന്നാണ് കെ.എസ് ശബരീനാഥന്‍ പ്രതികരിച്ചത്. യു.ഡി.എഫ് ഒറ്റക്കെട്ടായി പ്രവര്‍ത്തിച്ചതാണ് ഇങ്ങനെയൊരു ഭൂരിപക്ഷം ലഭിക്കാന്‍ കാരണം. അച്ഛനെ സ്‌നേഹിച്ചവരുടെ കൂടി വിജയമാണിതെന്നും ശബരീനാഥന്‍ കൂട്ടിച്ചേര്‍ത്തു.

അരുവിക്കര ഉപതെരഞ്ഞെടുപ്പില്‍ ആദ്യം സ്ഥാനാര്‍ഥിയായി പരിഗണിച്ചത് കാര്‍ത്തികേയന്റെ ഭാര്യ എം ടി സുലേഖയെ ആയിരുന്നു. സുലേഖ വിസമ്മതിച്ചതിനെ തുടര്‍ന്നാണ് കാര്‍ത്തികേയന്റെ രണ്ടാമത്തെ മകനായ ശബരിനാഥന് നറുക്ക് വീണത്.

English summary

ശബരീനാഥന് അവസരം നല്‍കിയതിലൂടെ അരുവിക്കര ആറാമത്തെ വട്ടവും കാര്‍ത്തികേയനെ വിജയിപ്പിച്ചുവെന്ന് അദ്ദേഹത്തിന്റെ ഭാര്യ സുലേഖ.