സരിതയ്ക്കു വീടു നല്‍കിയത് ഗണേഷ് കുമാറോ? ഉറ്റസുഹൃത്ത് ഷിബു ബേബിജോണ്‍ പറയുന്നു

കൊച്ചി: സോളാര്‍ കേസിലെ പ്രതി സരിത എസ് നായര്‍ക്ക് വീടെടുത്ത് നല്‍കിയത് എംഎല്‍എ ഗണേഷ് കുമാര്‍ ആണെന്ന സൂചന നല്‍കി മുന്‍ മന്ത്രി ഷിബു ബേബിജോണ്‍. സോളാര്‍ കമ്മീഷന് മുന്നില്‍ മൊഴി നല്‍കാന്‍ എത്തിയപ്പോഴാണ് ഷിബു നേരത്തെ ഉറ്റസുഹൃത്തായിരുന്ന ഗണേഷ് കുമാറിനെതിരെ മൊഴി നല്‍കിയത്.

സരിതയ്ക്ക് വീടെടുത്ത് നല്‍കിയത് ആരാണെന്ന് അന്വേഷിച്ചാല്‍ തനിക്കെതിരെയുള്ള ഗൂഢാലോചന പുറത്തുവരും. തനിക്കെതിരെ സോളാര്‍ തട്ടിപ്പുക്കേസിലെ പ്രതി ബിജു രാധാകൃഷ്ണന്‍ മൊഴി നല്‍കിയത് സരിതയുടെ പ്രേരണമൂലമാണ്. സരിതയെ ഇതിനായി നിയോഗിച്ചത് ഗണേഷ് കുമാര്‍ ആണെന്നും ഷിബു ആരോപിച്ചു.

ഗണേഷ് കുമാറിന്റെ മുന്‍ ഭാര്യ യാമിനി തങ്കച്ചിയുമായുള്ള തര്‍ക്കത്തിന് സരിതയും കാരണമായിരുന്നു. ഗണേഷും സരിതയും തമ്മില്‍ ഏറെക്കാലമായി അടുത്തബന്ധമുണ്ട്. തനിക്കെതിരായ ഗൂഢാലോനയുടെ പിന്നില്‍ ഗണേഷ് കുമാറാണ്. സരിതയുമായി ഗണേഷിന് അടുപ്പമുണ്ടെന്നറിഞ്ഞപ്പോള്‍ താന്‍ അകന്നിരുന്നതായി ഷിബു വ്യക്തമാക്കി.

സരിത 8 തവണ ഷിബുവിനെ വിളിച്ചതിന്റെ കോള്‍ രേഖകള്‍ കമ്മിഷന്‍ അഭിഭാഷകന്‍ ഹാജരാക്കി. എന്നാല്‍, ഇക്കാര്യം ഷിബു നിഷേധിച്ചു. പേഴ്‌സണല്‍ സ്റ്റാഫില്‍പ്പെട്ട ആരെങ്കിലും വിളിച്ചിട്ടുണ്ടാകും. താന്‍ സരിതയെ നേരില്‍ കാണുകയോ ഒരു തവണ പോലും വിളിക്കുകയോ ചെയ്തിട്ടില്ലെന്ന് ഷിബു മൊഴി നല്‍കി.

English summary

Ganesh Kumar behind the solar conspiracy says Shibu baby john