ജഗദീഷിനൊപ്പം മത്സരിയ്ക്കേണ്ട ഗതികേട് ഇനി ആര്‍ക്കും ഉണ്ടാകരുത്, വേദനയോടെ ഗണേഷ്

Updated: Saturday, May 21, 2016, 13:23 [IST]

പത്തനാപുരം: പത്തനാപുരത്തെ വിജയത്തിന് ശേഷവും യുഡിഎഫ് സ്ഥാനാര്‍ത്ഥിയായി മത്സരിച്ച നടന്‍ ജഗദീഷിനെതിരെ വിമര്‍ശനവുമായി കെബി ഗണേഷ് കുമാര്‍. മണ്ഡലത്തില്‍ മികച്ച വിജയം നേടിയ ശേഷമാണ് ജഗദീഷിനെതിരെ കടുത്ത വിമര്‍ശനങ്ങളുമായി എല്‍ഡിഎഫ് സ്ഥാനാര്‍ത്ഥി ഗണേഷ് കുമാര്‍ രംഗത്തെത്തിയത്.

ജഗദീഷ് നീചമായും മ്‌ളേച്ഛമായും സംസ്‌ക്കാര ശൂന്യമായുമാണ് തനിയ്‌ക്കെതിരെ പ്രചാരണം നടത്തിയതെന്ന് ഗണേഷ് പറഞ്ഞു. അഴിമതിയ്‌ക്കെതിരായ വിജയമാണ് തന്റേതെന്നും ഗണേഷ്. എല്ലാ അഗ്നിപരീക്ഷകളും അതിജീവിച്ച് തിരിച്ച് വരാന്‍ അവസരമൊരുക്കിയത് ജനങ്ങളാണ്. അഴിമതിയ്‌ക്കെതിരായ മന്ത്രിമാര്‍ക്കെതിരെ നിയമസഭയില്‍ പ്രസംഗിച്ചതുകൊണ്ടാണ് തനിയ്ക്ക് യുഡിഎഫ് വിടേണ്ടി വന്നതെന്നും ഗണേഷ് പറഞ്ഞു.

മൂന്ന് തവണയുെ തനിയ്‌ക്കെതിരെ മത്സരിച്ചത് ഇടതുപക്ഷത്തിന്റെ ശക്തരായ അന്തസുള്ള നേതാക്കന്‍മാരായിരുന്നു. അവരുടെ പ്രസ്താവനയിലോ പ്രസംഗത്തിലോ തന്നെക്കുറിച്ച് മോശം പരാമര്‍ശങ്ങള്‍ നടത്തിയിട്ടില്ലെന്നും ഗണേഷ്. തന്റെ വിജയത്തില്‍ സന്തോഷിയ്ക്കുമ്പോഴും നീചനായ ജഗദീഷുമൊത്തെ മത്സരിച്ചതില്‍ വേദനയുണ്ടെന്നും ഇങ്ങനെ നീചനായ ഒരാളോട് മത്സരിയ്‌ക്കേണ്ട ഗതികേട് മറ്റാര്‍ക്കും ഉണ്ടാകരുതെന്നും ഗണേഷ് പറഞ്ഞു.