'ഗോഡ് ഫാദര്' ഇല്ലാതെ രക്ഷയില്ല, ഇഎസ് ബിജിമോളെ സിപിഐ ജില്ലാ കൗണ്സിലിലേക്ക് തരം താഴ്ത്തി
സിപിഐ സംസ്ഥാന കൗണ്സില് അംഗമായ ബിജമോളെ ജില്ലാ കൗണ്സിലേക്ക് തരംതാഴ്ത്തി. സിപിഐ സംസ്ഥാന കൗണ്സിലിന്റേതാണ് തീരുമാനം.
ആലപ്പുഴ: സ്വന്തം പാര്ട്ടിക്കെതിരെ നടത്തിയ ഗോഡ്ഫാദര് പരാമര്ശത്തില് ഇഎസ് ബിജിമോള് എംഎല്എയെക്കെതിരെ അച്ചടക്ക നടപടി. സിപിഐ സംസ്ഥാന കൗണ്സില് അംഗമായ ബിജമോളെ ജില്ലാ കൗണ്സിലേക്ക് തരംതാഴ്ത്തി. സിപിഐ സംസ്ഥാന കൗണ്സിലിന്റേതാണ് തീരുമാനം.
നിയമസഭാ തിരഞ്ഞെടുപ്പിന് ശേഷം ബിജിമോള് ഒരു വാരികയ്ക്ക് നല്കിയ അഭിമുഖത്തിലായിരുന്നു മുതിര്ന്ന നേതാക്കള്ക്കെതിരെ രൂക്ഷവിമര്ശനം നടത്തിയത്. പാര്ട്ടിയില് ഗോഡ്ഫാദര്മാര് ഇല്ലാത്തുകൊണ്ടാണ് തനിക്ക് മന്ത്രിസ്ഥാനം ലഭിക്കാത്തതെന്നും പാര്ട്ടിയില് വളരാനാകാത്തതെന്നുമായിരുന്നു ബിജിമോളുടെ ആരോപണം. സംസ്ഥാന ജില്ലാ നേതാക്കള്ക്കെതിരെയും ബിജിമോള് രൂക്ഷമായി വിമര്ശനം ഉന്നയിച്ചിരുന്നു.
ബിജിമോള്ക്കെതിരെ നടപടിയെടുക്കണെന്നാവശ്യപ്പെട്ട് സിപിഐ സംസ്ഥാന എക്സിക്യൂട്ടീവ് സംസ്ഥാന കൗണ്സിലിന് നിര്ദ്ദേശം നല്കിയിരുന്നു. സംസ്ഥാന കൗണ്സിലിന്റെ നിര്ദ്ദേശം അംഗകരിച്ച് സംസ്ഥാന കൗണ്സില് നടപടി ശരിവയ്ക്കുകയായിരുന്നു.
സ്വന്തം പാര്ട്ടിയില് നിന്ന് തന്നെ അപായപ്പെടുത്താന് ശ്രമമുണ്ടായെന്നും തിരഞ്ഞെടുപ്പില് തനിക്കെതിരെ പാര്ട്ടി പ്രവര്ത്തകര് പ്രവര്ത്തിച്ചെന്നുമടക്കമുള്ള ആരോപണങ്ങള്ക്കെതിരെ നേതൃത്വം ശക്തമായി രംഗത്ത് വന്നിരുന്നു. തിരഞ്ഞെടുപ്പിന് ശേഷം പാര്ട്ടിയെയും പ്രവര്ത്തകരെയും തള്ളിപ്പറഞ്ഞ ബിജിമോള്ക്കെതിരെ ജില്ലാ-പ്രാദേശിക നേതൃത്വും രംഗത്തു വന്നു.
മന്തിപദവി കിട്ടാത്തത് കൊണ്ടാണ് ബിജിമോള് ഇത്തരം ആരോപണങ്ങള് ഉന്നയിച്ചതെന്നാണ് ആക്ഷേപം. മന്തി മോഹമാണ് ബിജിമോളെകൊണ്ട് പാര്ട്ടിയെ തള്ളിപ്പറയിപ്പിച്ചതെന്നാണ് നേതൃത്വം പറയുന്നത്. മന്ത്രിയായേക്കുമെന്ന മുന്കൂര് പ്രചരണം നടത്തിയത് മന്ത്രി പദം മോഹിച്ചാണെന്ന് നേതൃത്വം വിമര്ശിച്ചു.
ബിജിമോളുടെ പ്രസ്താവന വിവാദമായതോടെ പാര്ട്ടി ബിജിമോളോട് വിശദീകരണം ആവശ്യപ്പെട്ടിരുന്നു. വിവാദവുമായി ബന്ധപ്പെട്ട് രണ്ട് തവണ ബിജിമോള് നേതൃത്വത്തിന് വിശദീകരണം നല്കിയിരുന്നു. താന് ഉദ്ദേശിക്കാത്ത കാര്യങ്ങളാണ് വാരികയില് അച്ചടിച്ചുവന്നത് എന്നായിരുന്നു ആദ്യം നല്കിയ വിശദീകരണം. പക്ഷേ, പാര്ട്ടി ഇത് തള്ളി. വീണ്ടും വിശദീകരണം നല്കിയെങ്കിലും ഇതും പാര്ട്ടി തള്ളിക്കളയുകയായിരുന്നു.
വണ്ഇന്ത്യയിലേക്ക് നിങ്ങള്ക്കും വാര്ത്തകളും ഫോട്ടോകളും അയയ്ക്കാം. ഉചിതമായവ പ്രസിദ്ധീകരിക്കും. അയയ്ക്കേണ്ട വിലാസം [email protected]