സ്വർണാഭരണങ്ങള് ഇങ്ങോട്ട് മാത്രമല്ല ഇനി അങ്ങോട്ടും: ദുബായി ഗോള്ഡ് സൂക്കില് പ്രത്യേക കേന്ദ്രം
യുഎഇ-ഇന്ത്യ സമഗ്ര സാമ്പത്തിക പങ്കാളിത്ത കരാറിന്റെ ഒന്നാം വാർഷികത്തിന്റെ സ്മരണയ്ക്കായി ദുബായിൽ ഇന്ത്യാ ജ്വല്ലറി എക്സ്പോസിഷൻ സെന്റർ (IJEX) ഉദ്ഘാടനം ചെയ്തു. ഇന്ത്യൻ രത്ന, ആഭരണ മേഖലയുടെ മെന മേഖലയിലേക്കുള്ള മിഡില് ഈസ്റ്റ് ആന്ഡ് നോർത്ത് ആഫ്രിക്ക മേഖലയിലേക്കുള്ള ഒരു പ്രധാന കവാടമായി ഈ സ്ഥാപനം മാറുമെന്നാണ് പ്രതീക്ഷിക്കുന്നത്.
ജെം ആന്ഡ് ജ്വല്ലറി എക്സ്പോർട്ട് പ്രൊമോഷൻ കൗൺസിലിന്റെ (GJEPC) കീഴിലുള്ള ഇന്ത്യാ ജ്വല്ലറി എക്സ്പോസിഷൻ സെന്റർ ഇന്ത്യയിലെ സൂക്ഷ്മ, ചെറുകിട, ഇടത്തരം ജ്വല്ലറി സംരംഭങ്ങൾക്ക് തങ്ങളുടെ ഉൽപ്പന്നങ്ങൾ ദുബായിലെ ഗോൾഡ് സൂക്കിലെ മിഡിൽ ഈസ്റ്റ് വിപണിയിൽ പ്രദർശിപ്പിക്കുന്നതിന് വേദിയൊരുക്കും.
കയറ്റുമതിയുടെ 30 ശതമാനം വരുന്ന ഇന്ത്യയുടെ രത്ന, ആഭരണ വ്യവസായത്തിന് മിഡിൽ ഈസ്റ്റ് എത്രത്തോളം പ്രധാനപ്പെട്ടതാണെന്ന് ഈ നീക്കം പ്രതിഫലിപ്പിക്കുന്നു. കഴിഞ്ഞ വർഷം സിഇപിഎ നടപ്പാക്കിയതിനെത്തുടർന്ന് സ്വർണത്തിന്റെ ഇറക്കുമതി ചുങ്കം കുറച്ചതും ശ്രദ്ധേയമാണ്. 16 ശതമാനമായിരുന്നു ഇറക്കുമതി തീരുവ 15 ശതമാനമായിട്ടാണ് കുറച്ചിരിക്കുന്നത്.
"യു എ ഇ-ഇന്ത്യ സിഇപിഎയുടെ ആദ്യ വർഷത്തെ നേട്ടങ്ങൾ ആഘോഷിക്കാൻ ഈ ആഴ്ച ഞങ്ങൾക്ക് കഴിഞ്ഞു. പുതിയ പങ്കാളിത്തങ്ങൾ, പുതിയ നിക്ഷേപങ്ങൾ, സഹകരണത്തിനായി പുതിയ പ്ലാറ്റ്ഫോമുകൾ എന്നിവ രൂപപ്പെടുത്തുകയാണ് ഞങ്ങളുടെ ലക്ഷ്യം''- സാമ്പത്തിക മന്ത്രാലയത്തിലെ ഫോറിൻ ട്രേഡ് അസിസ്റ്റന്റ് അണ്ടർസെക്രട്ടറിയും യുഎഇയുടെ ചീഫ് ട്രേഡ് നെഗോഷ്യേറ്ററുമായ ഹിസ് എക്സലൻസി ജുമാ അൽ കൈത് പറയുന്നു.
ഇന്ത്യയും യു എ ഇയും അടുത്തിടെ ആരംഭിച്ച ഉഭയകക്ഷി വ്യാപാരത്തിലൂടെ കൂടുതല് സ്വർണം ഇറക്കുമതി ചെയ്യാനും ഇന്ത്യ തീരുമാനിച്ചിട്ടുണ്ട്. ഉഭയകക്ഷി വ്യാപാര ഉടമ്പടി പ്രകാരം, വ്യാപാര ഭാഷയിൽ താരിഫ് റേറ്റ് ക്വാട്ട (TRQ) എന്ന് വിളിക്കുന്ന ഇറക്കുമതി ക്വോട്ട സമ്പ്രദായത്തിലൂടെ യുഎഇയിൽ നിന്ന് ഇളവുള്ള തീരുവയിൽ 140 മെട്രിക് ടണ് സ്വർണ്ണം ഇറക്കുമതി ചെയ്യുന്നതിനുള്ള നടപടികളാണ് ഇന്ത്യ ആരംഭിച്ചിരിക്കുന്നത്.
അതേസമയം, യുഎഇ-ഇന്ത്യ സിഇപിഎ ഇരു രാജ്യങ്ങളും തമ്മിലുള്ള ഉഭയകക്ഷി എണ്ണ ഇതര വ്യാപാരത്തിൽ തുടർച്ചയായ വളർച്ചയ്ക്കും കാരണമായിട്ടുണ്ട്, ഇത് ഇടപാടിന്റെ ആദ്യ 11 മാസത്തിനുള്ളിൽ 6.9 ശതമാനം ഉയർന്ന് 45.5 ബില്യൺ യുഎസ് ഡോളറിലെത്തി. 2023 ലെ ഒന്നാം പാദത്തിലെ കണക്കുകൾ, 24.7 ശതമാനം ത്രൈമാസ വളർച്ച കാണിക്കുകയും ചെയ്യുന്നു.
Click it and Unblock the Notifications
Sign in with Google