സ്വർണം ഇന്ന് ഒരു പവൻ 69,840 രൂപയ്ക്ക് വാങ്ങാം, 90,000 കൊടുത്ത് നടുവൊടിയേണ്ട; ഇങ്ങനെ വാങ്ങിയാൽ മതി

ആഗോള സാമ്പത്തിക അനിശ്ചിതത്വങ്ങളും ആഭ്യന്തര ആവശ്യകതയും ഇന്ത്യയിൽ സ്വർണവില സർവകാല റെക്കോർഡിൽ എത്തിച്ചിരിക്കുകയാണ്. ഈ വർഷം ഇതുവരെയുള്ള കണക്ക് പരിശോധിച്ചാൽ 25 ശതമാനം വർദ്ധനവാണ് വിലയിൽ രേഖപ്പെടുത്തിയത്. ഇന്ന് കേരളത്തിൽ 24 കാരറ്റ് സ്വർണത്തിന് ഒരു ഗ്രാമിന് 11,640 രൂപയാണ് വില. 22 കാരറ്റിന് പവൻ വില 85,360 രൂപയിലെത്തി.

തുടർച്ചയായ പണപ്പെരുപ്പം, പലിശ നിരക്കിലെ ചാഞ്ചാട്ടം, യുക്രെയ്‌നിലും മിഡിൽ ഈസ്റ്റിലുമുള്ള സംഘർഷങ്ങൾ പോലുള്ള ഭൂമിശാസ്ത്രപരമായ പിരിമുറുക്കങ്ങൾ, ദീപാവലി സീസണിന് മുന്നോടിയായി സ്വർണ നിക്ഷേപങ്ങളിലുണ്ടായ വർദ്ധനവ് എന്നിവയെല്ലാമാണ് ആഗോള സ്വർണ വിപണയിൽ വില വർധനവിന് വഴിവെച്ചത്. വില വർധിച്ചതോടെ സ്വർണം ലാഭകരമായി എങ്ങനെ വാങ്ങാമെന്ന ചിന്തയിലാണ് ആളുകൾ.

കുുറഞ്ഞ വിലയിൽ സ്വർണം വാങ്ങാൻ ആഗ്രഹിക്കുന്നവരുണ്ടെങ്കിൽ ഇപ്പോൾ.18 കാരറ്റ് സ്വർണ ഒരു മികച്ച ബദലായിരിക്കും. 75 ശതമാനം ശുദ്ധമായ സ്വർണവും ചെമ്പ്, വെള്ളി പോലുള്ള ലോഹക്കൂട്ടുകളും ചേർന്നതാണ് 18 കാരറ്റ് സ്വർണം. ഈടുള്ള സ്വർണം താങ്ങാനാവുന്ന വിലയിൽ സ്വന്തമാക്കാൻ സാധിക്കുമെന്നത് തന്നെയാണ് 18 കാരറ്റ് കൊണ്ടുള്ള ഗുണം. ഇന്നത്തെ കേരളത്തിലെ വിലയനുസരിച്ച്, 24 കാരറ്റ് സ്വർണത്തേക്കാൾ ഏകദേശം 25 ശതമാനം കുറവിൽ 8,840 രൂപയ്ക്ക് ഒരു ഗ്രാം 18 കാരറ്റ് സ്വർണം ലഭിക്കും.

വിവാഹ, ഉത്സവ സീസണുകളിൽ 18 കാരറ്റ് സ്വർണം തിരഞ്ഞെടുക്കുന്നത് ഉപഭോക്താക്കൾക്ക് കൂടുതൽ സ്വർണം കുറഞ്ഞ വിലയിൽ സ്വന്തമാക്കാൻ സഹായിക്കും. വിലയിലെ ലാഭത്തിന് പുറമെ, ഇത് കൂടുതൽ കാലം നിലനിൽക്കും. ദൈനംദിന ഉപയോഗത്തിനും ധൈര്യമായി ഉപയോഗിക്കാം. സ്വർണമാണ് താത്പര്യമെങ്കിൽ ബുദ്ധിപരമായ രീതിയിൽ അത് വാങ്ങാനുള്ള എളുപ്പമാർഗം കൂടിയാണ് 18 കാരറ്റ് ആഭരണങ്ങൾ. സ്വർണ വില വർധിച്ചതോടെ 18 കാരറ്റ് ആഭരണങ്ങൾക്ക് ഡിമാന്റ് ഉയർന്നിട്ടുണ്ടെന്ന് വ്യാപാരികളും സമ്മതിക്കുന്നു.

ഹോൾമാർക്ക് ചെയ്ത സ്വർണം വാങ്ങാനും വിശ്വസനീയമായ കടകളിൽ നിന്ന് വിലകൾ താരതമ്യം ചെയ്യാനും പ്രത്യേകം ശ്രദ്ധിക്കണം. റെക്കോർഡ് വിലകൾ രേഖപ്പെടുത്തുന്ന ഈ കാലഘട്ടത്തിൽ, 18 കാരറ്റ് സ്വർണ്ണം ഒരു ബദൽ മാത്രമല്ല, സാമ്പത്തിക ഭദ്രതയിലേക്കുള്ള ഒരു തന്ത്രപരമായ നീക്കം കൂടിയാണ്.

18 കാരറ്റ് ആഭരണങ്ങളുടെ ഗുണങ്ങളും ദോഷങ്ങളും പരിശോധിക്കാം

25 ശതമാനം മറ്റ് ലോഹങ്ങൾ ചേർത്തതുകൊണ്ട് 24 കാരറ്റ് സ്വർണത്തേക്കാൾ ഇവയ്ക്ക് ബലമുണ്ടാകും. പോറലുകൾ, ഉരസലുകൾ, തേയ്മാനം എന്നിവയെ പ്രതിരോധിക്കാൻ ഇതിന് കഴിയും. മോതിരം, വളകൾ പോലുള്ള നിത്യോപയോഗ ആഭരണങ്ങൾക്ക് ഇത് വളരെ അനുയോജ്യമാണ്. മറ്റ് ലോഹങ്ങൾ ചേർക്കുന്നതിനാൽ റോസ് ഗോൾഡ്, വൈറ്റ് ഗോൾഡ്, യെല്ലോ ഗോൾഡ് എന്നിങ്ങനെ വിവിധ നിറങ്ങളിൽ ആഭരണങ്ങൾ നിർമ്മിക്കാൻ കഴിയും. ആധുനികവും പരമ്പരാഗതവുമായ ഡിസൈനുകൾക്കും 18 കാരറ്റ് സ്വർണം ഒരുപോലെ പ്രിയങ്കരമാണ്.സ്വർണ്ണത്തിന്റെ അളവ് കുറവാണെങ്കിലും, 75% ശുദ്ധിയുള്ളതിനാൽ 18 കാരറ്റ് സ്വർണത്തിനും മികച്ച വിപണന മൂല്യമുണ്ട്. നിക്കൽ പോലുള്ള ലോഹങ്ങൾ കുറഞ്ഞ, സിൽവർ പോലുള്ള പ്രതിപ്രവർത്തന ശേഷിയില്ലാത്ത ലോഹങ്ങൾ ചേർത്ത് നിർമ്മിക്കുമ്പോൾ, 18 കാരറ്റ് സ്വർണ്ണം ചർമ്മത്തിൽ അലർജിയുണ്ടാക്കാനുള്ള സാധ്യത കുറവാണ്. ഇത് സെൻസിറ്റീവ് ചർമ്മമുള്ളവർക്ക് കൂടുതൽ അനുയോജ്യമാണ്.

ശുദ്ധമായ സ്വർണം ആഗ്രഹിക്കുന്നവരെ സംബന്ധിച്ചിടത്തോളം 18 കാരറ്റ് സ്വർണത്തിന് ചില പോരായ്മകളുണ്ട്. 75 ശതമാനം സ്വർണാംശം മാത്രമുള്ളതുകൊണ്ട്, 24 കാരറ്റിനെ അപേക്ഷിച്ച് ഇതിന് ശുദ്ധത കുറവാണ്. സാംസ്കാരികപരമായോ നിക്ഷേപപരമായോ പരമാവധി സ്വർണ്ണം ആഗ്രഹിക്കുന്നവർക്ക്, പ്രത്യേകിച്ച് കേരളത്തിലെ പരമ്പരാഗത വിപണിയിൽ ഇത് നിരാശാജനകമായേക്കാം. കേരളം പോലുള്ള പ്രദേശങ്ങളിൽ, വിവാഹങ്ങൾക്കും പാരമ്പര്യമായി കൈമാറുന്ന ആഭരണങ്ങൾക്കും 22 കാരറ്റോ 24 കാരറ്റോ സ്വർണ്ണമാണ് സാധാരണയായി തിരഞ്ഞെടുക്കാറ്. അതുകൊണ്ട്, 18 കാരറ്റ് സ്വർണ്ണത്തിന് ആഢംബരം കുറവാണെന്ന് ചിലപ്പോൾ തോന്നിയേക്കാം .18 കാരറ്റ് സ്വർണ്ണം പരിപാലിക്കുന്നത് അല്പം ബുദ്ധിമുട്ടാണ്. ലോഹക്കൂട്ടുകൾ കാലക്രമേണ മങ്ങുകയോ നിറം മാറുകയോ ചെയ്യാം, പ്രത്യേകിച്ച് കേരളത്തിലെ ഈർപ്പമുള്ള കാലാവസ്ഥയിൽ. തിളക്കം നിലനിർത്താൻ പതിവായി വൃത്തിയാക്കുകയോ മിനുക്കുകയോ ചെയ്യേണ്ടിവരും. 24 കാരറ്റ് സ്വർണ്ണത്തിന് ഈ ബുദ്ധിമുട്ടുകൾ താരതമ്യേന കുറവാണ്.