സ്വർണം മലയാളികൾക്ക് വേണ്ട; സ്വർണം വാങ്ങാൻ ആളില്ല; ആഭരണങ്ങൾക്ക് ഡിസ്കൗണ്ട് നൽകിയിട്ടും രക്ഷയില്ലാതെ വ്യാപാരികൾ

2025ലേതിന് സമാനമായി ഈ വർഷവും സ്വർണ വില കുതിക്കുകയാണ്. ഇസ്രായേൽ-ഇറാൻ സംഘർഷം കൂടി കടുത്തതോടെ വില അപ്രതീക്ഷിത ഉയരങ്ങൾ താണ്ടിയേക്കുമെന്നാണ് പ്രവചനങ്ങൾ. ഇന്ന് 1.20 ലക്ഷം രൂപയാണ് പവന് വില. അതേസമയം സ്വർണം കുതിച്ചതോടെ ആഭരണങ്ങൾ വാങ്ങാൻ ആളുകൾ മടിക്കുകയാണെന്ന് പറയുകയാണ് വ്യാപാരികൾ. പശ്ചിമേഷ്യയിലെ സംഘർഷവും വിലയിലെ ചാഞ്ചാട്ടവും ഇന്ത്യൻ വിപണിയിൽ ഭൗതിക സ്വർണ്ണത്തിനുള്ള ആവശ്യം ഈയാഴ്ച കുറച്ചുവെന്ന് കണക്കുകളും പറയുന്നു.

വ്യോമപാതകൾ അടച്ചതിനാൽ യുഎഇയിൽ നിന്നുള്ള സ്വർണ ഇറക്കുമതി ഏറെക്കുറെ നിലച്ചിരിക്കുകയാണ്. ഇത് വിതരണം കുറച്ചിട്ടുണ്ട്. അതിനാൽ നേരത്തേ നൽകിയ ഡിസ്കൌണ്ടുകൾ ചുരുക്കിയിരിക്കുകയാണ് വ്യാപാരികൾ. ഈയാഴ്ച 6% ഇറക്കുമതി തീരുവയും 3% വിൽപ്പന നികുതിയും ഉൾപ്പെടെ ഔൺസിന് 28 ഡോളർ വരെയാണ് ബുള്ള്യൻ വ്യാപാരികൾ ഡിസ്കൗണ്ട് നൽകിയത്. കഴിഞ്ഞയാഴ്ചത്തെ ഇത് 65 ഡോളർ എന്ന 10 മാസത്തെ ഉയർന്ന നിരക്കിലായിരുന്നു.

ഇന്ത്യൻ വിപണിയിൽ 10 ഗ്രാമിന് വെള്ളിയാഴ്ച ഏകദേശം 1,60,000 (1,745.96 ഡോളർ) ആയിരുന്നു വില. ഈ ആഴ്ചയുടെ തുടക്കത്തിൽ അത് 1,69,880 ഉം. 'ഉയർന്ന വില സാധാരണക്കാർക്ക് സ്വർണം താങ്ങാവുന്നതിലും അധികമാക്കിയിരിക്കുകയാണ്', തൃശ്ശൂരിലെ പ്രമുഖ ജ്വല്ലറി ശൃംഖലയായ ജോസ് ആലുക്കാസിന്റെ മാനേജിംഗ് ഡയറക്ടർ വർഗീസ് ആലുക്ക പറഞ്ഞു. 'വിവാഹ ആവശ്യങ്ങൾ ഇപ്പോഴും ദുർബലമാണ്. വിലയിലെ ചാഞ്ചാട്ടം കാരണം ആളുകൾ വാങ്ങലുകൾ മാറ്റിവയ്ക്കുകയാണ്,' മുംബൈയിൽ നിന്നുള്ള മറ്റൊരു ഡീലറും പ്രതികരിച്ചു.

അതേസമയം, ഉയർന്ന സ്പോട്ട് വിലകൾ ഉണ്ടായിരുന്നിട്ടും ചൈനീസ് വിപണികളിൽ ഭൗതിക സ്വർണ്ണത്തിനുള്ള ആവശ്യം ശക്തമായി തുടർന്നു. ആഗോള മാനദണ്ഡ വിലയേക്കാൾ ഔൺസിന് 13-15 ഡോളർ പ്രീമിയത്തിലാണ് ഈയാഴ്ച സ്വർണ്ണം വ്യാപാരം ചെയ്തത്. കഴിഞ്ഞയാഴ്ച ഇത് 12-13 ഡോളർ ആയിരുന്നു.

'സ്വർണവില 5,000 ഡോളറിന് മുകളിലായിട്ടും, ദീർഘകാല നിക്ഷേപത്തിനായി ആളുകൾ സ്വർണം വാങ്ങുന്നത് തുടരുകയാണ്, വിംഗ് ഫംഗ് പ്രെഷ്യസ് മെറ്റൽസിലെ ഡീലിംഗ് വിഭാഗം മേധാവി പീറ്റർ ഫംഗ് പറഞ്ഞു. ആഗോള രാഷ്ട്രീയ, സാമ്പത്തിക അനിശ്ചിതത്വങ്ങൾക്കിടയിൽ ഫെബ്രുവരിയിൽ സ്പോട്ട് ഗോൾഡ് വില 8% വർദ്ധിച്ചു, തുടർച്ചയായ ഏഴാം മാസമാണിത്. എന്നാൽ, പലിശനിരക്ക് കുറയ്ക്കാനുള്ള സാധ്യത മങ്ങിയതും ഉയർന്ന ഊർജ്ജ വില മൂലമുള്ള പണപ്പെരുപ്പ ആശങ്കകളും കാരണം ഈയാഴ്ച വില ഏകദേശം 3% ഇടിഞ്ഞു. വെള്ളിയാഴ്ച ഒരു ഔൺസിന് ഏകദേശം 5,135 ഡോളർ ആയിരുന്നു വില.

വില കുതിക്കും

ആഗോള തലത്തിൽ സ്വർണ വില ഇനിയും ഉയരുമെന്നാണ് സാമ്പത്തിക വിദഗ്ധർ പ്രവചിക്കുന്നത്. കേന്ദ്രബാങ്കുകൾ സ്വർണം വാങ്ങുന്നതും ഭൌമരാഷ്ട്രീയ സംഘർഷങ്ങളും സ്വർണത്തിന് അനുകൂലമാണ്. ഈ വർഷം വില 1.50 ലക്ഷമോ അല്ലെങ്കിൽ 2 ലക്ഷമായി ഉയർന്നാലോ അത്ഭുതപ്പെടാനില്ലെന്നാണ് വിദഗ്ധർ സൂചിപ്പിക്കുന്നത്.