പഴയ സ്വർണത്തില് നിങ്ങള്ക്കും പുതിയ ഹാള്മാർക്കിങ് പതിപ്പിക്കാം: കേവലം 45 രൂപ മാത്രം മതി
രാജ്യത്തെ സ്വർണാഭരണ വില്പ്പന മേഖലയെ സമൂലമായി നവീകരിക്കുന്നതിന് വേണ്ടിയാണ് പുതിയ ഹാള്മാർക്കിങ് സംവിധാനം രാജ്യത്ത് കേന്ദ്ര സർക്കാർ നടപ്പിലാക്കിക്കൊണ്ടിരിക്കുന്നത്. 2023 ഏപ്രിൽ 1 മുതൽ എല്ലാ സ്വർണ്ണാഭരണങ്ങൾക്കും പുരാവസ്തുക്കളും ഹാൾമാർക്ക് യുണീക്ക് ഐഡന്റിഫിക്കേഷൻ (HUID) നമ്പർ ഉണ്ടായിരിക്കണമെന്നാണ് പുതിയ നിയമങ്ങൾ പറയുന്നത്. എന്നാല് തീരുമാനം നടപ്പിലാക്കുന്നതിന് കേരളത്തില് മൂന്ന് മാസത്തെ സമയം കൂടി അനുവദിച്ചിട്ടുണ്ട്.
പുതിയ മുദ്ര ഓരോ സ്വർണ്ണ ഇനത്തിനും ഒരു പ്രത്യേക ഐഡന്റിറ്റി വാഗ്ദാനം ചെയ്യുകയും പരിശുദ്ധി ഉറപ്പാക്കുകയും ചെയ്യുന്നു. ആഭരണങ്ങള് വാങ്ങിക്കാനായി ജ്വല്ലറിയില് എത്തുന്നവർക്ക് ഇത് പരിശോധിച്ച് ഉറപ്പ് വരുത്താനുള്ള സൌകര്യവും ഉണ്ടാവും. ഇതോടൊപ്പം തന്നെ, സ്വർണാഭരണങ്ങള്ക്ക് ബ്യൂറോ ഓഫ് ഇന്ത്യൻ സ്റ്റാൻഡേർഡ്സ് ലോഗോയും കാരറ്റ് അടയാളവും ഉണ്ടായിരിക്കണം. ഉദാഹരണത്തിന് 22 കാരറ്റ് അല്ലെങ്കിൽ 18 കാരറ്റ്.
പരമ്പരാഗതമായി സുരക്ഷിത നിക്ഷേപമെന്ന നിലയിൽ ആളുകള് ധാരാളമായി സ്വർണ്ണത്തിലേക്ക് തിരിയുന്ന ഒരു രാജ്യത്ത്, ഈ പുതിയ നിയമങ്ങൾ സ്വർണ്ണാഭരണങ്ങളും പുരാവസ്തുക്കളും വാങ്ങുമ്പോൾ കൂടുതൽ സുതാര്യതയും വിശ്വാസ്യതയും ഉപഭോക്താക്കള്ക്ക് ആത്മവിശ്വാസവും കൊണ്ടുവരുമെന്നാണ് പ്രതീക്ഷിക്കുന്നത്.
ഫലത്തില് പുതിയ മുദ്രയുള്ള സ്വർണാഭരണങ്ങൾ വാങ്ങുന്നത് ഇപ്പോൾ സുതാര്യവും സുരക്ഷിതവുമാണ്. എന്നാല് നിങ്ങളൊരു ജ്വല്ലറി ഉടമയാണെങ്കില് നിങ്ങളുടെ കൈവശം പഴയതും ഹാൾമാർക്ക് ചെയ്യാത്തതുമായ സ്വർണ്ണാഭരണങ്ങൾ ഉണ്ടെങ്കിൽ, അത് ഹാൾമാർക്ക് ചെയ്തില്ലെങ്കിൽ നിങ്ങൾക്ക് അത് വിൽക്കാനോ പുതിയ ഡിസൈനുകളിലേക്ക് മാറ്റാനോ സാധിക്കില്ല.
ബിഐഎസ് അനുസരിച്ച്, ഹാൾമാർക്ക് ചെയ്യാത്ത സ്വർണ്ണാഭരണങ്ങൾ കൈവശം വച്ചിരിക്കുന്ന വില്പ്പനക്കാർ അത് വിൽക്കുന്നതിനോ പുതിയ ഡിസൈനുകൾക്ക് കൈമാറുന്നതിനോ മുമ്പായി നിർബന്ധമായും ഹാൾമാർക്ക് ചെയ്തിരിക്കണം. ഉപഭോക്താക്കളുടെ കാര്യത്തില് രണ്ട് ഓപ്ഷനുകളാണുള്ളത്. ബിഐഎസ് രജിസ്റ്റർ ചെയ്ത ജ്വല്ലറി മുഖേന അവർക്ക് പഴയതും ഹാൾമാർക്ക് ചെയ്യാത്തതുമായ ആഭരണങ്ങൾ ഹാൾമാർക്ക് ചെയ്യാവുന്നതാണ്.
ഒരു ബിഐഎസ് രജിസ്റ്റർ ചെയ്ത ജ്വല്ലറി, ഹാൾമാർക്ക് ചെയ്യാത്ത സ്വർണ്ണാഭരണങ്ങൾ ഹാൾമാർക്ക് ചെയ്യുന്നതിനായി ബിഐഎസ് അസെയിംഗ് ഹാൾമാർക്കിംഗ് സെന്ററിലേക്ക് കൊണ്ടുപോകും. സ്വർണ്ണാഭരണങ്ങൾ ഹാൾമാർക്ക് ചെയ്യുന്നതിനായി ഒരു ഉപഭോക്താവ് ഒരു ആഭരണത്തിന് 45 രൂപ മാത്രമാണ് നിലവില് നല്കേണ്ടത്. അതേസമയം ഈ തുക പര്യാപ്തമല്ലെന്ന നിലപാടാണ് ജ്വല്ലറികള്ക്കുള്ളത്.
ഉപഭോക്താക്കൾക്ക് മുന്നിലുള്ള രണ്ടാമത്തെ ഓപ്ഷൻ, ഏതെങ്കിലും ബിഐഎസ്-അംഗീകൃത അസ്സേയിംഗ് ആൻഡ് ഹാൾമാർക്കിംഗ് സെന്ററിൽ നിന്ന് ആഭരണങ്ങൾ സ്വയം പരിശോധിക്കുക എന്നതാണ്. പരിശോധനയ്ക്കുള്ള ആഭരണങ്ങളുടെ എണ്ണം അഞ്ചോ അതിലധികമോ ആണെങ്കിൽ ഉപഭോക്താവ് ഒരു ആഭരണത്തിന് 45 രൂപ ഫീസ് നൽകേണ്ടിവരും. അതായത് പുതിയ മുദ്ര പതിപ്പിക്കാന് സർക്കാർ ഏർപ്പെടുത്തിയിരിക്കുന്നത് ചെറിയ ഫീസ് മാത്രമാണ്.
പഴയതും ഹാൾമാർക്ക് ചെയ്യാത്തതുമായ സ്വർണാഭരണങ്ങൾ പരിശോധിക്കുന്നതിന് ബിഐഎസ് പ്രത്യേക മാർഗനിർദേശങ്ങളും പുറപ്പെടുവിച്ചിട്ടുണ്ട്. ബിഐഎസ് അംഗീകൃത അസ്സെയിംഗ് ആൻഡ് ഹാൾമാർക്കിംഗ് സെന്റർ നൽകുന്ന ടെസ്റ്റ് റിപ്പോർട്ട് ആഭരണങ്ങളുടെ പരിശുദ്ധിയെ കുറിച്ചുള്ള സർട്ടിഫിക്കറ്റാണ്. ഹാൾമാർക്ക് ചെയ്യാത്ത തങ്ങളുടെ പഴയ സ്വർണ്ണാഭരണങ്ങൾ വിൽക്കാൻ ഉപഭോക്താവിന് ഈ റിപ്പോർട്ട് ഏത് സ്വർണ്ണ ജ്വല്ലറിക്കും കൈമാറാവുന്നതുമാണ്.
അതേസമയം, ഒരു ഉപഭോക്താവിന്റെ കൈവശം പഴയ/മുമ്പത്തെ ഹാൾമാർക്ക് അടയാളങ്ങളോടുകൂടിയ സ്വർണ്ണാഭരണങ്ങൾ ഉണ്ടെങ്കിൽ, അത് ഇപ്പോഴും ഹാൾമാർക്ക് ചെയ്ത ആഭരണമായി പരിഗണിക്കപ്പെടും. പഴയ അടയാളങ്ങളാൽ ഇതിനകം ഹാൾമാർക്ക് ചെയ്തിട്ടുള്ള സ്വർണ്ണാഭരണങ്ങൾ HUID നമ്പർ ഉപയോഗിച്ച് വീണ്ടും ഹാൾമാർക്ക് ചെയ്യേണ്ടതില്ല. ഇത്തരം ഹാൾമാർക്ക് ആഭരണങ്ങൾ എളുപ്പത്തിൽ വിൽക്കുകയോ പുതിയ ഡിസൈനുകൾക്കായി കൈമാറ്റം ചെയ്യുകയോ ചെയ്യാം.
പുതിയ സ്വർണ്ണ ഹാൾമാർക്കിംഗ് നിയമങ്ങൾ ഉപഭോക്താക്കൾക്ക് കൂടുതൽ പരിരക്ഷ നൽകുന്നു. ജ്വല്ലറികള് തെറ്റായ വിവരമാണ് നല്കുന്നതെങ്കില് 2018-ലെ ബിഐഎസ് ചട്ടങ്ങളിലെ റൂൾ 49-ന് കീഴിലുള്ള വ്യവസ്ഥ പ്രകാരം, ഒരു ഉപഭോക്താവിന് നഷ്ടപരിഹാരം ക്ലെയിം ചെയ്യാൻ അർഹതയുണ്ട്. വിൽക്കപ്പെടുന്ന ആഭരണങ്ങളുടെ ഭാരത്തിന്റെയും ടെസ്റ്റിംഗ് ചാർജുകളുടെയും ശുദ്ധതയുടെ കുറവിന്റെ അടിസ്ഥാനത്തിലാണ് നഷ്ടപരിഹാരം കണക്കാക്കുക.
Click it and Unblock the Notifications
Sign in with Google