സ്വർണം എങ്ങനെ വാങ്ങിയാലാണ് ലാഭം? 70/30 ഫോർമുല പാലിക്കാം..ഇങ്ങനെ തിരഞ്ഞെടുത്താൽ ഭാവിയും സേഫാക്കാം

സംസ്ഥാനത്ത് സ്വർണ വില വർധിച്ച് വരികയാണ്. നിലവിൽ ഒരു പവൻ ആഭരണത്തിന് 1.22 ലക്ഷമെങ്കിലും കൊടുക്കണം. വില കുത്തനെ കൂടുമ്പോഴും ആഭരണങ്ങളോടുള്ള ആളുകളുടെ താത്പര്യത്തിന് യാതൊരു കുറവും ഉണ്ടായിട്ടില്ല. അതുകൊണ്ട് തന്നെ വില ഇങ്ങനെ കുത്തനെ ഉയർന്ന് നിൽക്കുമ്പോൾ എങ്ങനെ സ്വർണം വാങ്ങുന്നതാണ് ലാഭം എന്നാണ് പലരുടേയും ആലോചന. കൃത്യമായ ആസൂത്രണത്തോടെ വാങ്ങിയാൽ സ്വർണം ആഭരണമായി അണിഞ്ഞ് സന്തോഷം കണ്ടെത്തുന്നതിനൊപ്പം തന്നെ നിക്ഷേപമായും ഉപകരിക്കുമെന്ന് പറയുകയാണ് സ്വർണാഭരണമേഖലയിലെ വിദഗ്ധർ. എങ്ങനയാണത് എന്നല്ലേ? വിദമായി നോക്കാം

ട്രെൻഡുകൾ പിന്തുടരാനും ആഭരണങ്ങളിൽ നിക്ഷേപിക്കാനും ആഗ്രഹിക്കുന്നവർ ആധുനിക ശൈലികളോടൊപ്പം കാലാതീതമായ ഡിസൈനുകളും തിരഞ്ഞെടുക്കണം എന്നാണ് പിഎൻജി ജ്വല്ലേഴ്‌സ് വൈസ് പ്രസിഡന്റ് (സെയിൽസ്) സുരേഷ് കൃഷ്ണനെ ഉദ്ധരിച്ചുള്ള മണി കണ്‍ട്രോൾ റിപ്പോർട്ടിൽ പറയുന്നത്. ഇത് സ്റ്റൈലിഷ് ആഭരണങ്ങൾ സ്വന്തമാക്കാൻ സഹായിക്കുന്നതിനൊപ്പം തന്നെ അതിൻ്റെ മൂല്യം നിലനിർത്താനും സഹായിക്കും. ഏതൊരു ആഭരണവും വാങ്ങുന്നതിന് മുമ്പ്, അതിന്റെ ഡിസൈൻ, സ്വർണ്ണത്തിന്റെ പരിശുദ്ധി, കരകൗശല വൈദഗ്ദ്ധ്യം എന്നിവ ശ്രദ്ധിക്കണമെന്നും അദ്ദേഹം ഊന്നിപ്പറഞ്ഞു.

ആഭരണത്തിൻ്റെ ഒരു കളക്ഷൻ ഉണ്ടാക്കുമ്പോൾ എപ്പോഴും 70/30 നിയമം പാലിക്കണമെന്നും അദ്ദേഹം ഉപദേശിച്ചു. അതായത് ശേഖരത്തിൻ്റെ എഴുപത് ശതമാനം ലളിതമായ ചെയിനുകൾ, സ്റ്റഡ്ഡുകൾ, ബ്രേസ്ലെറ്റുകൾ എന്നിവ പോലുള്ള കാലാതീതമായ ആഭരണങ്ങളായിരിക്കണം. ഇവ സുരക്ഷിതവും എപ്പോഴും ആവശ്യക്കാരുള്ളതുമാണ്. ശേഷിക്കുന്ന മുപ്പത് ശതമാനം നിറമുള്ള രത്നങ്ങൾ, ബോൾഡ് നെക്‌ലേസുകൾ, അല്ലെങ്കിൽ മിക്സഡ്-മെറ്റൽ ഡിസൈനുകൾ പോലുള്ള ട്രെൻഡി ആഭരണങ്ങളാവാം. ഈ സന്തുലിതാവസ്ഥ ഫാഷനബിളായി തുടരാനും അതേസമയം സുരക്ഷിതമായ ഒരു നിക്ഷേപം നടത്താനും സഹായിക്കും.

എത്രയൊക്കെ വില ഉയർന്നെന്ന് പറഞ്ഞാൽ മലയാളികളെ സംബന്ധിച്ച് 22 കാരറ്റ് ആഭരണങ്ങളോട് തന്നെയാണ് താത്പര്യം കൂടുതൽ. നിക്ഷേപ താത്പര്യത്തോടെയാണെങ്കിൽ 22 കാരറ്റ് തന്നെയാണ് ഉത്തമം. എന്നാൽ, 18 കാരറ്റ് സ്വർണവും ഇപ്പോൾ ട്രെൻ്റായി തുടങ്ങിയിട്ടുണ്ട്. ടെന്നീസ് ബ്രേസ്ലെറ്റുകൾ, സ്റ്റൈലിഷ് ഡിസൈനർ മോതിരങ്ങൾ തുടങ്ങിയ മനോഹരവും ആധുനികവുമായ ആഭരണങ്ങൾക്ക് ഇത് വളരെ അനുയോജ്യമാണ്. വില കൂടുമ്പോൾ 14 കാരറ്റ് സ്വർണവും ആളുകൾ തിരഞ്ഞെടുക്കുന്നുണ്ട്. ഇത് കൂടുതൽ ഉറപ്പുള്ളതും, വില കുറഞ്ഞതും, ദൈനംദിന ഉപയോഗത്തിന് അനുയോജ്യവുമാണ്.

2026-ലെ ഏറ്റവും വലിയ ട്രെൻഡ് മിനിമൽ ആഡംബരമാണ്. പല സ്ത്രീകളും ബോൾഡ് ഹൂപ്പുകൾ, ഡയമണ്ട് സ്റ്റഡ്ഡുകൾ, നേർത്ത പെൻഡന്റുകൾ എന്നിവയാണ് ഇഷ്ടപ്പെടുന്നത്. ഈ ആഭരണങ്ങൾ ലളിതവും മനോഹരവുമാണ്, ണ്. അതേസമയം, വിവാഹ ആഭരണങ്ങളിൽ നിയോ-ഹെറിറ്റേജ് രീതിയിലുള്ളവയ്ക്കാണ് ഡിമാൻ്റ്. സാംസ്കാരിക വേരുകൾ നിലനിർത്തിക്കൊണ്ടുള്ള പരമ്പരാഗത ഡിസൈനുകളാണ് ആളുകൾ തിരഞ്ഞെടുക്കുന്നത്. ഭാരം കുറഞ്ഞതും കൂടുതൽ സൗകര്യപ്രദവുമായ ശൈലികളിലാണ് ഇവ ഇപ്പോൾ തയ്യാറാക്കുന്നത്.

സ്വർണ വില ഉയരുമ്പോൾ കരുതലോടെ ആഭരണങ്ങൾ വാങ്ങണമെന്നാണ് മേഖലയിലെ വിദഗ്ധരുടെ ഉപദേശം. ചിലർ ഉത്സവകാലത്ത് സ്വർണം വാങ്ങാൻ കാത്തിരിക്കും. കാരണം ഈ സമയങ്ങളിൽ ജ്വല്ലറികൾ പണിക്കൂലി കുറയ്ക്കാറുണ്ട്. ചെറിയൊരു കുറവ് പോലും വലിയ ലാഭത്തിന് വഴിയൊരുക്കും. സർട്ടിഫിക്കേഷൻ അഥവാ അംഗീകാരവും വളരെ പ്രധാനമാണ്. ബിഐഎസ് ഹാൾമാർക്കിംഗും HUID പരിശോധനയും സ്വർണ്ണത്തിന്റെ പരിശുദ്ധി ഉറപ്പാക്കാൻ സഹായിക്കുന്നു. പ്രശസ്തരായ ജ്വല്ലറികളിൽ നിന്ന് വാങ്ങുന്നത്, ഭാവിയിൽ ആവശ്യമെങ്കിൽ, ആഭരണങ്ങൾ വിൽക്കുന്നത് എളുപ്പമാക്കും.