സ്വർണ വില 1.50 ലക്ഷമൊന്നും ആകില്ലെന്നേ..2026 ൽ വില പോയാലും പോയാലും ഇത്ര വരെ..

ഈ വർഷം റെക്കോഡ് വർധനവാണ് സ്വർണ വിലയിൽ രേഖപ്പെടുത്തിയത്. അടുത്ത വർഷവും സമാനമായ കുതിപ്പായിരിക്കും മഞ്ഞ ലോഹത്തിന് സാഭവിക്കുകയെന്ന് പറയുകയാണ് സാമ്പത്തിക വിദഗ്ധർ. വിലയിൽ 5 ശതമാനം മുതൽ 20 ശതമാനം വരെ വർദ്ധനവുണ്ടാകാമെന്നാണ് പലരുടേയും വിലയിരുത്തൽ.

നിലവിൽ, ഒരു ഔൺസ് സ്വർണ്ണത്തിന് ഏകദേശം 4,187 ഡോളറാണ് വില. ഈ വർഷം മാത്രം ഏകദേശം 60 ശതമാനം വർദ്ധനവാണ് രേഖപ്പെടുത്തിയത്. ഇന്ത്യയിൽ, 10 ഗ്രാം സ്വർണ്ണത്തിന് ഏകദേശം 1.3 ലക്ഷം രൂപയാണ് ഇപ്പോഴത്തെ വില.

ബാങ്ക് ഓഫ് അമേരിക്കയുടെ പ്രവചനം അനുസരിച്ച്, അടുത്ത വർഷം സ്വർണ്ണവില ഔൺസിന് 5,000 ഡോളർ വരെ ഉയർന്നേക്കാം. നിലവിലെ നിലവാരത്തിൽ നിന്ന് ഏകദേശം 19 ശതമാനം വർദ്ധനവാണിത്. വർദ്ധിച്ചുവരുന്ന യുഎസ് കമ്മി ചെലവുകളും പ്രസിഡന്റ് ഡൊണാൾഡ് ട്രംപിന്റെ അസാധാരണമായ മാക്രോ നയങ്ങളും ഈ മുന്നേറ്റത്തിന് കാരണമാകുമെന്ന് ബാങ്ക് അഭിപ്രായപ്പെട്ടു.

2026-ഓടെ സ്വർണ്ണവില 4,950 ഡോളറിലേക്ക് എത്താൻ സാധ്യതയുണ്ടെന്നാണ് ഡെച്ച് ബാങ്ക് പ്രവചിക്കുന്നത്. അതായത് നിലവിലെ നിലയിൽ നിന്ന് ഏകദേശം 18 ശതമാനം വരെ വർദ്ധനവ്. അടുത്ത വർഷം വില ഏകദേശം 4,450 ഡോളർ ആയിരിക്കുമെന്നാണ് അവരുടെ അടിസ്ഥാന പ്രവചനം.കേന്ദ്ര ബാങ്കുകളിൽ നിന്നും ഇടിഎഫ് നിക്ഷേപകരിൽ നിന്നുമുള്ള ആവശ്യം ശക്തമായി തുടരാനും സാധ്യതയുണ്ടെന്നും ഇത് സ്വർണ വിലയെ വലിയ തോതിൽ സ്വാധീനിക്കുമെന്നും ബാങ്ക് അഭിപ്രായപ്പെട്ടു. എന്നാൽ, ഇക്വിറ്റി വിപണികൾ കുത്തനെ ഇടിഞ്ഞാലോ, ഫെഡറൽ ബാങ്ക് നിരക്ക് കുറച്ചാലോ, അല്ലെങ്കിൽ ഭൗമരാഷ്ട്രീയ പിരിമുറുക്കങ്ങൾ കുറഞ്ഞാലോ സ്വർണ്ണവില കുറയാമെന്ന് ഡച്ച് ബാങ്ക് മുന്നറിയിപ്പ് നൽകി.

അടുത്ത വർഷം അവസാനത്തോടെ സ്വർണ്ണവില 4,900 ഡോളറിലേക്ക് ഉയരാം എന്നാണ്
ഗോൾഡ്മാൻ സാച്ചസ് ഗ്ലോബൽ കമ്മോഡിറ്റീസ് റിസർച്ചിന്റെ സഹമേധാവി ഡാൻ സ്ട്രൂവെൻ പ്രവചിക്കുന്നത്. വർദ്ധിച്ചുവരുന്ന കേന്ദ്ര ബാങ്കുകളുടെ ആവശ്യവും പലിശ നിരക്ക് കുറയ്ക്കുമെന്ന പ്രതീക്ഷയുമാണ് ഈ സാധ്യതയ്ക്ക് പ്രധാനമായും പിന്നിലെന്ന് അദ്ദേഹം പറഞ്ഞു.

യുക്രെയ്ൻ അധിനിവേശത്തിന് ശേഷം റഷ്യയുടെ കരുതൽ ശേഖരം മരവിപ്പിച്ചതിന് പിന്നാലെ കേന്ദ്ര ബാങ്കുകൾ സ്വർണ്ണം വാങ്ങുന്നത് വർദ്ധിപ്പിച്ചു. ഫെഡറൽ റിസർവ് അടുത്ത വർഷം ഏകദേശം 75 ബേസിസ് പോയിന്റ് പലിശ നിരക്ക് കുറയ്ക്കുമെന്നും മറ്റ് കേന്ദ്ര ബാങ്കുകൾ ഇത് പിന്തുടരാൻ സാധ്യതയുണ്ടെന്നും സ്ട്രൂവെൻ പറയുന്നു.കുറഞ്ഞ നിരക്കുകളും പണപ്പെരുപ്പ ആശങ്കകളും നിക്ഷേപകരെ സ്വർണ്ണം വാങ്ങാൻ പ്രേരിപ്പിക്കുമെന്നും സ്വകാര്യ നിക്ഷേപകരും ഈ "ഡിബേസ്‌മെന്റ് ട്രേഡിന്" കാരണക്കാരായേക്കാമെന്നും അദ്ദേഹം കൂട്ടിച്ചേർത്തു.

എച്ച്എസ്ബിസിയുടെ കാഴ്ചപ്പാട് കൂടുതൽ യാഥാസ്ഥിതികമാണ്. 2026-ൽ സ്വർണ്ണവില 3,600 ഡോളർ മുതൽ 4,400 ഡോളർ വരെയാകാമെന്നാണ് അവരുടെ പ്രവചനം.
നിലവിലുള്ള ഭൗമരാഷ്ട്രീയ മാറ്റങ്ങൾ, താരിഫുകൾ, വിപണിയിലെ ചാഞ്ചാട്ടം, ഫെഡറൽ റിസർവ് നയത്തെക്കുറിച്ചുള്ള ആശങ്കകൾ എന്നിവ അടുത്ത വർഷവും നിലനിൽക്കാനാണ് സാധ്യതയെന്ന് എച്ച്എസ്ബിസി പറയുന്നു. 2026 പകുതിയോടെ സ്വർണ്ണത്തിന്റെ ലഭ്യത വർദ്ധിക്കുകയും ഭൗതിക ഡിമാൻഡ് കുറയുകയും, വില 4,000 ഡോളറിന് മുകളിൽ നിലനിൽക്കുകയാണെങ്കിൽ കേന്ദ്ര ബാങ്കുകൾ വാങ്ങൽ കുറയ്ക്കുകയും ചെയ്യുന്നതിനാൽ നേട്ടങ്ങൾ മന്ദഗതിയിലാകുമെന്നും അവർ പ്രവചിക്കുന്നു.