സ്വർണ വില 50,000 മോഹിച്ച് നിന്നവർക്ക് ഷോക്ക്; ഒരു പവൻ എത്രയാകുമെന്നോ? പുതിയ പ്രവചനത്തിൽ നിരാശ

സംസ്ഥാനത്ത് സ്വർണ വില പവന് ഇന്ന് 1400 രൂപയോളമാണ് വർധിച്ചത്. വില കുറയുമെന്ന് പ്രതീക്ഷയ്ക്കിടെയാണ് ഇടിത്തീ പോലുള്ള ഈ കുതിപ്പ്. ജനുവരി 29 നാണ് സംസ്ഥാനത്ത് സ്വർണം സർവ്വകാല റെക്കോഡ് തൊട്ടത്, 1.31 ലക്ഷം. എന്നാൽ രണ്ട് ദിവസം കഴിഞ്ഞപ്പോൾ വില 10,000 രൂപയോളം കുറഞ്ഞു. അതുകൊണ്ട് തന്നെ വിലകുറയുന്നതിന് മുന്നോടിയായിട്ടായിരിക്കാം ഈ വേഗത്തിലുളള കുതിപ്പ് എന്നാണ് ചിലരുടെ പ്രതീക്ഷ. എന്നാൽ ഈ പ്രതീക്ഷകളെല്ലാം അസ്ഥാനത്താകുമെന്നാണ് വിദഗ്ധർ ചൂണ്ടിക്കാട്ടുന്നത്. ആഗോള പ്രതിസന്ധികൾ സ്വർണത്തിന് ഇപ്പോഴും അനുകൂലമാണെന്ന് ഇവർ ചൂണ്ടിക്കാട്ടുന്നു.

ഇപ്പോഴത്തെ സാഹചര്യത്തിൽ സ്വർണ വില രാജ്യാന്തര തലത്തിൽ ഔണ്‍സിന് 6200 ഡോളർ വരെ ഉയരാനുള്ള സാധ്യതയുണ്ടെന്നാണ് പ്രമുഖ ബാങ്കായ യു എസ് ബി പ്രവചിക്കുന്നത്. വർദ്ധിച്ചുവരുന്ന ഭൗമരാഷ്ട്രീയ സംഘർഷങ്ങളും അനുകൂലമായ സാമ്പത്തിക സാഹചര്യങ്ങളും ഇത് അടിവരയിടുന്നുണ്ടെന്ന് ബാങ്ക് പറഞ്ഞു.

ഇറാനും യുഎസും തമ്മിലുള്ള സംഘർഷം വർദ്ധിക്കുന്നതാണ് സ്വർണ വില ഉയരാനുള്ള പ്രധാന കാരണങ്ങളിലൊന്ന്. മധ്യേഷ്യയിൽ യുഎസ് സൈനിക വിന്യാസം വർദ്ധിപ്പിച്ചിട്ടുണ്ട്. ഈ വിന്യാസം വെനസ്വേലൻ പ്രസിഡന്റ് നിക്കോളാസ് മഡുറോയെ പിടികൂടാൻ ഈ വർഷം ആദ്യം നടത്തിയ ദൗത്യത്തെക്കാൾ വലുതാണെന്ന് വിശകലന വിദഗ്ധർ ചൂണ്ടിക്കാട്ടുന്നത്.അതായത് ഇറാനുമായുള്ള ദീർഘകാല പോരാട്ടത്തിനുള്ള സാധ്യത തള്ളിക്കളയാനാകില്ലെന്ന് സാരം.

ഭൗമരാഷ്ട്രീയ പ്രശ്നങ്ങൾക്ക് പുറമെ സാമ്പത്തിക സാഹചര്യങ്ങളും സ്വർണവിലയെ പിന്തുണയ്ക്കും. ഫെഡറൽ റിസർവ് സെപ്റ്റംബർ അവസാനത്തോടെ 25 ബേസിസ് പോയിന്റ് വീതം രണ്ട് തവണ പലിശ നിരക്ക് കുറയ്ക്കുമെന്നാണ് യുഎസ്ബി പ്രവചിക്കുന്നത്. സ്വർണത്തിന്റെ ലഭ്യതയിൽ വലിയ വർദ്ധനവില്ലെന്നതും വില ഉയരാനുള്ള ഒരു പ്രധാന ഘടകമാണ്. 2028-ഓടെ ഏകദേശം 80 ഖനികളിലെ സ്വർണ ഉൽപ്പാദനം അവസാനിക്കുമെന്നാണ് വുഡ് മക്കെൻസിയിലെ വിശകലന വിദഗ്ധർ കണക്കാക്കുന്നത്. ഏഷ്യൻ ആഭരണ ഉപഭോക്താക്കളിൽ നിന്നും സെൻട്രൽ ബാങ്കുകളിൽ നിന്നുമുള്ള വർദ്ധിച്ച ആവശ്യം നിറവേറ്റാൻ പുതിയ ലഭ്യത മതിയാകില്ല. ഇതെല്ലാം വില വർധിപ്പിക്കുമെന്നാണ് യുഎസ്ബിയുടെ പ്രവചനം.

കേരളത്തിലെ സ്വർണ വില

ഫെബ്രുവരി ഇതുവരെ സ്വർണ വിലയിൽ വലിയ ചാഞ്ചാട്ടങ്ങളാണ് പ്രകടമായത്. മാസം ആരംഭിച്ചത് ഏകദേശം 1,17,760 എന്ന ഉയർന്ന നിരക്കിലായിരുന്നു. എന്നാൽ തൊട്ടുപിന്നാലെ, വില 1,09,920 ലേക്ക് കുത്തനെ ഇടിഞ്ഞു. ഈ ഇടിവ് അധികം നീണ്ടുനിന്നില്ല സ്വർണ്ണം വേഗത്തിൽ തിരിച്ചുവരവ് രേഖപ്പെടുത്തി. ഫെബ്രുവരി പകുതിയോടെ വില 1.13 ലക്ഷത്തിലെത്തി. ഇന്നിതാ 1.16 ലക്ഷത്തിലേക്കും. ഈ പോക്ക് തുടർന്നാൽ സ്വർണം വീണ്ടും റെക്കോഡ് തകർക്കാനുള്ള സാധ്യത തള്ളിക്കളയാനാകില്ല. നിലവിൽ 14600 രൂപയാണ് ഗ്രാമിന് വില 15,000ത്തിന് മുകളിലേക്ക് വിലയെത്തും. പവൻ വില 1.22 ലക്ഷത്തിന് മുകളിലും. അതായത് ഒരു പവൻ സ്വർണം വാങ്ങണമെങ്കി 1.40 ലക്ഷം വരെ നൽകേണ്ടി വന്നേക്കും.