വില കുറഞ്ഞാലും ഇപ്പോൾ സ്വർണം വാങ്ങുന്നത് സുരക്ഷിതമല്ലേ? ശ്രദ്ധിക്കേണ്ടത് ഈയൊരു കാര്യം

സ്വർണവില ഈ മാസത്തെ ഏറ്റവും കുറഞ്ഞ നിരക്കിലാണ് ഇപ്പോഴുളളത്. എങ്കിലും ആളുകൾ ഇപ്പോൾ സ്വർണം വാങ്ങണോ വേണ്ടയോ എ്ന്നുളള സംശയത്തിലാണ്. സ്വർണത്തിൽ നിക്ഷേപം നടത്തുന്നവർക്ക് ഇപ്പോഴാണോ സ്വർണം വാങ്ങാൻ അനുയോജ്യമായ സമയം? സാമ്പത്തിക വിദഗ്ധൻ നിഖിൽ ഗോപാലകൃഷ്ണൻ പറയുന്നത് ഇതാണ്:

''ആഗോള വിപണിയില്‍ സ്വര്‍ണവില ഒരു മാസത്തിനിടെ 5 ശതമാനം താഴേക്ക് വന്നിട്ടുണ്ട്. എന്നാല്‍ ഒരു വര്‍ഷത്തെ കാര്യമെടുത്താല്‍ 30 ശതമാനം മുകളില്‍ തന്നെയാണ് വില നില്‍ക്കുന്നത്. ഇപ്പോഴുളളത് താല്‍ക്കാലികമായ ഒരു സാഹചര്യം മാത്രമാണ്. പലപ്പോഴും സ്വര്‍ണത്തില്‍ നിക്ഷേപിക്കുമ്പോള്‍ അതില്‍ നിന്ന് ഒരു വരുമാനം കിട്ടുന്നില്ല. ഇപ്പോള്‍ ബോണ്ട് മാര്‍ക്കറ്റില്‍ ഉയര്‍ന്ന പലിശ നിരക്കുണ്ട്. അപ്പോള്‍ പലരും അതിലേക്ക് മാറുന്ന സാഹചര്യമുണ്ട്.

യുദ്ധമൊക്കെ ഉളള സമയത്ത് സുരക്ഷിതമായ നിക്ഷേപം എന്ന നിലയിലാണ് സ്വര്‍ണത്തിലേക്ക് ആളുകള്‍ തിരിയുന്നത്. വിലയിലെ ഈ താഴ്ച വളരെ വലിയൊരു ഇടിവായി തോന്നുന്നില്ല. കാരണം യുദ്ധ സാഹചര്യമൊക്കെ അവസാനിച്ചാല്‍ മാത്രമേ വലിയൊരു മാറ്റം വിലയില്‍ പ്രതീക്ഷിക്കേണ്ടതുളളൂ.

ജെപി മോര്‍ഗന്‍ പോലുളളവരുടെ റിസര്‍ച്ച് കാണിക്കുന്നത് സ്വര്‍ണവില മുകളിലേക്ക് പോകും എന്നാണ്. മലയാളികളുടെ പ്രശ്‌നം ഇനിയും സ്വര്‍ണവില താഴാന്‍ വേണ്ടി കാത്തിരിക്കണോ സ്വര്‍ണം വാങ്ങാന്‍ എന്നുളളതാണ്. കല്യാണം പോലുളള ആവശ്യങ്ങള്‍ക്കാണെങ്കില്‍ ഇപ്പോള്‍ വാങ്ങാം എന്നേ ഉളളൂ. സ്വര്‍ണ നിക്ഷേപത്തിന്റെ കാര്യം വരുമ്പോള്‍ ഇനിയും വില കുറയുമോ, കയ്യിലുളള സ്വര്‍ണം വില്‍ക്കണോ എന്നുളള സംശയമാണ്.

ഇവിടെ ശ്രദ്ധിക്കേണ്ട കാര്യം, നിങ്ങളുടെ ആകെയുളള നിക്ഷേപത്തില്‍ സ്വര്‍ണം എത്രമാത്രം ഉണ്ട് എന്നതാണ്. മൊത്തം സ്വത്തിന്റെ 20 ശതമാനത്തില്‍ കൂടുതലാണ് സ്വര്‍ണം എങ്കില്‍ ഇനി സ്വര്‍ണം വാങ്ങാതിരിക്കുന്നതാണ് നല്ലത്. ഇത് നോക്കിയിട്ട് നിക്ഷേപം നടത്തുന്നതാണ് എപ്പോഴും നല്ലത്.

ആര്‍ബിഐ പോലെയുളള ലോകത്തെ പ്രധാനപ്പെട്ട ദേശീയ ബാങ്കുകള്‍ സ്വര്‍ണം വാങ്ങുന്നുണ്ടോ എന്നത് സ്വര്‍ണവിലയുമായി ബന്ധപ്പെട്ടിരിക്കുന്നു. സുരക്ഷിത നിക്ഷേപത്തിലേക്ക് മാറുക എന്നതിനാലാണ് അവര്‍ സ്വര്‍ണം വാങ്ങുന്നത്. പക്ഷേ സാധാരണക്കാര്‍ വാങ്ങുന്നത് ഇന്ന് വില എത്രയാണ് എന്ന് നോക്കിയാണ്. സ്വര്‍ണം സാധാരണ ആവശ്യങ്ങള്‍ക്ക് വാങ്ങുന്നവര്‍ക്ക് ഈ വില വ്യതിയാനം ഒരു വിഷയമല്ല. അല്ലാതെ സ്വര്‍ണം വാങ്ങുന്നത് ഒരു സുരക്ഷിതമായ കാര്യമല്ല''.