കണ്ണടച്ച് തുറക്കും മുൻപ് സ്വർണത്തിന് ഇടിഞ്ഞത് 28000 രൂപയിലേറെ, അഞ്ച് പ്രധാന കാരണങ്ങൾ അറിയാം

സ്വര്‍ണവിലയില്‍ തുടര്‍ച്ചയായ ഇടിവാണ് ഏതാനും ദിവസങ്ങളായി രേഖപ്പെടുത്തുന്നത്. ഒരു പവന്‍ സ്വര്‍ണത്തിന് ഇന്ന് 2040 രൂപയാണ് കുറഞ്ഞത്. ഇതോടെ സ്വര്‍ണവില പവന് 102760 രൂപയായി.

5 മാസങ്ങള്‍ക്കിടെ സ്വര്‍ണവിലയില്‍ 28000 രൂപയിലേറെയാണ് കുറവ് ഉണ്ടായിരിക്കുന്നത്. തുടർച്ചയായി വില വർദ്ധിച്ചുകൊണ്ടിരുന്ന സ്വർണ്ണത്തിന് പെട്ടെന്ന് വില കുറയാൻ ഉണ്ടായ അഞ്ച് പ്രധാന കാരണങ്ങൾ ഇവയാണ്:

അന്താരാഷ്ട്ര വിപണിയിൽ ഡോളറിന്റെ മൂല്യം ശക്തമായി വർദ്ധിച്ചുകൊണ്ടിരിക്കുകയാണ്. ഡോളർ ശക്തമാകുമ്പോൾ മറ്റ് കറൻസികൾ ഉപയോഗിച്ച് സ്വർണ്ണം വാങ്ങുന്നവർക്ക് അത് കൂടുതൽ ചിലവേറിയതാകും. ഇത് ആഗോള തലത്തിൽ സ്വർണത്തിന്റെ ആവശ്യകത കുറയ്ക്കുകയും വില ഇടിയാൻ കാരണമാകുകയും ചെയ്യുന്നു.

അമേരിക്കൻ ഗവൺമെന്റ് ബോണ്ടുകളിൽ നിന്നുള്ള ലാഭം വർധിച്ചിട്ടുണ്ട്. സ്വർണ്ണത്തിൽ നിക്ഷേപിച്ചാൽ പലിശയോ മറ്റ് വരുമാനമോ ലഭിക്കില്ല . എന്നാൽ ബോണ്ടുകളിൽ നിക്ഷേപിച്ചാൽ ഉറപ്പായ വരുമാനം ലഭിക്കും. അതുകൊണ്ട് നിക്ഷേപകർ സ്വർണ്ണത്തിൽ നിന്ന് പണം പിൻവലിച്ച് യു.എസ് ബോണ്ടുകളിലേക്ക് മാറ്റുകയാണ്.

അമേരിക്കയിലെ കേന്ദ്ര ബാങ്കായ ഫെഡറൽ റിസർവ് പലിശനിരക്കുകൾ ഉടനെങ്ങും കുറയ്ക്കില്ലെന്ന സൂചനയാണ് നൽകുന്നത്. പലിശനിരക്കുകൾ ഉയർന്ന നിലയിൽ തുടരുമെന്ന വാർത്തകൾ നിക്ഷേപകരെ സ്വർണ്ണത്തിൽ നിന്ന് അകറ്റുന്നു.

ആഗോളതലത്തിൽ യുദ്ധസാഹചര്യങ്ങളോ സാമ്പത്തിക പ്രതിസന്ധികളോ ഉണ്ടാകുമ്പോൾ ആളുകൾ പണം സുരക്ഷിതമാക്കാൻ സ്വർണ്ണത്തിലാണ് നിക്ഷേപിക്കാറുള്ളത് . എന്നാൽ നിലവിൽ യു.എസ് ഡോളറും അമേരിക്കൻ ട്രഷറി ബോണ്ടുകളും കൂടുതൽ സുരക്ഷിതവും ലാഭകരവുമായി മാറിയതോടെ, സ്വർണ്ണത്തോടുള്ള താല്പര്യം നിക്ഷേപകർക്ക് കുറഞ്ഞു.

കഴിഞ്ഞ ജനുവരിയിൽ സ്വർണ്ണവില എക്കാലത്തെയും ഉയർന്ന നിരക്കിൽ എത്തിയിരുന്നു. ഇതിനുശേഷം വലിയ നിക്ഷേപകർ തങ്ങളുടെ സ്വർണ്ണം വിറ്റ് ലാഭം എടുക്കാൻ തുടങ്ങിയത് സ്വർണ്ണവില പെട്ടെന്ന് താഴേക്ക് വരാൻ ഇടയാക്കി.