സ്വർണ വില മാറിമറിഞ്ഞു; ഇന്ന് സ്വർണം വാങ്ങണോ? 22കാരറ്റ്, 18 കാരറ്റ് പവൻ വില അറിയാം

കേരളത്തിൽ സ്വർണ വില മാറിമറിഞ്ഞു. ഇന്നലെ രാവിലെ കുതിച്ച വില ഉച്ചയോടെ കുറഞ്ഞിരുന്നു. എന്നാൽ ഇന്ന് രാവിലെയോടെ വില വീണ്ടും ഉയർന്നു. ആഗോള വിപണിയിൽ സ്വർണം ഇടിഞ്ഞെങ്കിലും കേരളത്തിൽ ഇന്ന് വിപരീത ട്രൻ്റാണ്.

22 കാരറ്റ് 1 പവൻ സ്വർണത്തിന് ഇന്ന് 160 രൂപയാണ് വർധിച്ചിരിക്കുന്നത്. ഇതോടെ പവൻ വില 1,10,480 രൂപയായി. ഇന്നലെ വൈകീട്ട് ഒരു പവൻ 22 കാരറ്റ് സ്വർണത്തിന്റെ വില 1,10,320 രൂപയായിരുന്നു. 18 കാരറ്റിന് ഇന്ന് വില 11405 രൂപയാണ്.

ഇനി സ്വർണം എങ്ങോട്ട്

ആഗോള വിപണിയിൽ സ്വർണത്തിന് ഇന്ന് വലിയ ഇടിവാണ് ഉണ്ടായത്. യുഎസ് ഫെഡറൽ റിസർവ് പലിശ നിരക്ക് 3.5-3.75 ശതമാനത്തിൽ നിലനിർത്തിയ തീരുമാനമാണ് സ്വർണ വിപണിയ്ക്ക് തിരിച്ചടിയായത്. ഉയർന്ന പണപ്പെരുപ്പ നിലവാരം കണക്കിലെടുത്ത് നിരക്കുകൾ മാറ്റാതിരിക്കാനുള്ള തീരുമാനത്തോടൊപ്പം, ഡോളറിന്റെ ശക്തി, ട്രഷറി യീൽഡുകളിലെ മെച്ചപ്പെട്ടതും എണ്ണവിലയിലെ ഉയർന്നതുമെല്ലാം സ്വർണത്തിന്റെ ആകർഷണം കുറയ്ക്കുകയും വിൽപ്പന സമ്മർദ്ദം വർദ്ധിപ്പിക്കുകയും ചെയ്തു. ഔൺസിന് ഏകദേശം 42 ഡോളർ ഇടിഞ്ഞ് 4550 ഡോളറിന് അടുത്താണ് വില എത്തിയത് .എന്നാൽ ഫെഡിന്റെ പ്രസ്താവനയിൽ അടുത്ത യോഗങ്ങളിൽ നിരക്ക് കുറയ്ക്കാനുള്ള സാധ്യത തള്ളിക്കളയാത്തത് ദീർഘകാലാടിസ്ഥാനത്തിൽ സ്വർണത്തിന് ചില പ്രതീക്ഷകൾ നൽകുന്നുണ്ട്.

നിലവിൽ സ്വർണ വിലയിൽ തുടരുന്ന ഇടിവിനുള്ള പ്രധാന കാരണം എണ്ണവില ഉയരുന്നതും അതുമൂലമുള്ള പണപ്പെരുപ്പ ഭീതിയുമാണ്. ഉയർന്ന പലിശ നിരക്കുകൾ തുടരുന്നത് ഡോളറിനും ബോണ്ടുകൾക്കും കരുത്ത് നൽകുന്നതിനാൽ, വരുമാനമില്ലാത്ത ആസ്തിയായ സ്വർണത്തിന്റെ ആകർഷണം കുറയും. ആഭരണ വാങ്ങുന്നവർക്ക് ഇപ്പോഴത്തെ താഴ്ന്ന വില ആശ്വാസകരമാണെങ്കിലും, ഹ്രസ്വകാലത്തേക്ക് വില കൂടുതൽ ഇടിയാനുള്ള സാധ്യതയുണ്ട്.

എന്നിരുന്നാലും പശ്ചിമേഷ്യയിലെ യുദ്ധം നീണ്ടുനിന്നാൽ സാഹചര്യം മാറാം. ആഗോള സാമ്പത്തിക മാന്ദ്യത്തിലേക്കുള്ള ഭീഷണി ശക്തമായാൽ നിക്ഷേപകർ സുരക്ഷിത ആസ്തിയായ സ്വർണത്തിലേക്ക് കൂട്ടത്തോടെ തിരിയും. എണ്ണവിലയിലെ കുതിപ്പ് പണപ്പെരുപ്പം വർദ്ധിപ്പിച്ചാലും, യുദ്ധത്തിന്റെ അനിശ്ചിതത്വം സ്വർണത്തിന്റെ 'സേഫ് ഹേവൻ' ഡിമാൻഡ് ഉയർത്തി വിലയ്ക്ക് പിന്തുണ നൽകും. ഇത് ഹ്രസ്വകാല ഇടിവിനെ പരിമിതപ്പെടുത്തി ഒരു തിരിച്ചുവരവിന് വഴിയൊരുക്കിയേക്കാം.

മൊത്തത്തിൽ സ്വർണ വില ഇനിയും ഗണ്യമായി കൂടാൻ ഫെഡ് പലിശ നിരക്ക് കുറയ്ക്കുന്നത് പോലുള്ള വ്യക്തമായ കാരണങ്ങൾ വേണം. യുദ്ധം നീണ്ടുപോകുകയോ ആഗോള സമ്പദ്‌വ്യവസ്ഥയിൽ മാന്ദ്യ ലക്ഷണങ്ങൾ ശക്തമാവുകയോ ചെയ്താൽ മാത്രമേ ഗണ്യമായ ഉയർച്ച പ്രതീക്ഷിക്കാവൂ. അല്ലാത്തപക്ഷം, നിലവിലെ ഉയർന്ന പലിശയും ഡോളർ ശക്തിയും തുടരുന്നിടത്തോളം വില ഏറെക്കുറെ സ്ഥിരതയോ ചെറിയ ഇടിവോ കാണിക്കാനാണ് സാധ്യത. നിക്ഷേപകർക്ക് ക്ഷമയോടെ കാത്തിരിക്കലോ ഹ്രസ്വകാല വാങ്ങലുകളോ ആണ് ഉചിതമായ തന്ത്രം.