സ്വർണ വില പവന് കുറഞ്ഞത് 8040 രൂപ: ഇനിയും താഴോട്ട്? ഈ 4 കാര്യങ്ങൾ നടന്നാൽ സംഭവിക്കുന്നത്

യുദ്ധ സമയത്ത് സ്വർണം സുരക്ഷിത നിക്ഷേപമെന്ന പെരുമ നേടാറുണ്ട്. എന്നാൽ ഇസ്രായേൽ-ഇറാൻ സംഘർഷത്തിനിടെ പതിവിൽ നിന്നും വിപരീതമായി സ്വർണ വില ഇടിയുകയാണ്. യുദ്ധ സാഹചര്യത്തിൽ എണ്ണ വില ഉയർന്നതും പണപ്പെരുപ്പ ഭീതിയുമെല്ലാമാണ് ഇപ്പോൾ വില ഇടിയാൻ കാരണമായത്. ഇനി സ്വർണത്തിൻ്റെ പോക്ക് എങ്ങോട്ടായിരിക്കും എന്നാണ് പ്രധാനമായും ഉറ്റുനോക്കുന്നത്. നാല് കാര്യങ്ങളാണ് വിലയെ വരും ദിവസങ്ങളിൽ സ്വാധീനീക്കുക. വിശദമായി നോക്കാം

ഖാമനഇയുടെ പിൻഗാമി ആര്?

ഖാമനഇയുടെ മകൻ മൊജ്തബ ഖമനഇക്കാണ് പിൻഗാമിയായി സാധ്യത കൽപ്പിക്കുന്നത്. അദ്ദേഹം കടുത്തതും ആക്രമണോത്സുകവുമായ സമീപനം സ്വീകരിച്ച് യു.എസ്സിനും ഇസ്രായേലിനുമെതിരായ പ്രതികാര നടപടികൾ തുടരുകയോ വർദ്ധിപ്പിക്കുകയോ ചെയ്താൽ,സംഘർഷം വ്യാപിക്കാൻ കാരണമാകും. സ്വാഭാവികമായും എണ്ണ വില കൂടുതൽ ഉയരും. പണപ്പെരുപ്പം രൂക്ഷമാകും, പ്രതിസന്ധി കൂട്ടു. ഇത് സ്വർണത്തെ ഒരു സുരക്ഷിത നിക്ഷേപമായി മാറ്റുകയും വില ഉയർത്തുകയും ചെയ്യും. അതേസമയം, സംഘർഷം ലഘൂകരിക്കാൻ ശ്രമിക്കുന്ന കൂടുതൽ മിതവാദിയായ പിൻഗാമിക്ക് പിരിമുറുക്കങ്ങൾ കുറയ്ക്കാനും, സുരക്ഷിത നിക്ഷേപ ആവശ്യകത കുറയ്ക്കാനും സ്വർണ വില താഴ്ത്താനും കഴിഞ്ഞേക്കും.

ചൈനയുടെ ദുർബലമാകുന്ന സമ്പദ്‌വ്യവസ്ഥ

ലോകത്തിലെ ഏറ്റവും വലിയ ഭൗതിക സ്വർണ ഉപഭോക്താക്കളിലൊന്നാണ് ചൈന, പ്രത്യേകിച്ച് ആഭരണങ്ങൾക്കും നിക്ഷേപങ്ങൾക്കും വേണ്ടിയുള്ള സ്വർണത്തിന്റെ ആവശ്യം ഇവിടെ വളരെ വലുതാണ്. 2025-2026 കാലഘട്ടത്തിൽ ചൈനയുടെ വളർച്ചാ നിരക്ക് ഗണ്യമായി മന്ദഗതിയിലായി. പ്രോപ്പർട്ടി മേഖലയിലെ പ്രതിസന്ധി, ദുർബലമായ ഉപഭോക്തൃ ചെലവ്, കയറ്റുമതിയിലെ വെല്ലുവിളികൾ എന്നിവ വളർച്ചാ നിരക്ക് കുറച്ചു. 4.5-5% എന് ലക്ഷ്യം നേടുന്നതിൽ അവർ പരാജയപ്പെട്ടു. ഇത് സ്വർണ ഇറക്കുമതിയിലും ആവശ്യകതയിലും ഗണ്യമായ കുറവുണ്ടാക്കി. ഉദാഹരണത്തിന് 2025 ഡിസംബറിൽ അറ്റ സ്വർണ്ണ ഇറക്കുമതി മുൻവർഷത്തെ അപേക്ഷിച്ച് 55 ടൺ കുറഞ്ഞു.

ഉയർന്ന വിലകളും സാമ്പത്തിക ബുദ്ധിമുട്ടുകളും കാരണം ആഭരണങ്ങളുടെ ആവശ്യം കുറഞ്ഞു. നിക്ഷേപത്തിനായുള്ള ഡിമാൻഡ് (ബാറുകളും നാണയങ്ങളും) ഒരു പരിധി വരെ പിടിച്ചുനിന്നെങ്കിലും, ആഗോള ഭൗതിക സ്വർണ ആവശ്യകതയുടെ വലിയൊരു ഭാഗം വരുന്ന ചൈനീസ് വാങ്ങലുകളിലെ കുറവ് സ്വർണവിലയുടെ മുന്നേറ്റത്തെ പരിമിതപ്പെടുത്തും.

യുഎസ് തൊഴിൽ വിവരങ്ങൾ

ജനുവരി 2026-ലെ റിപ്പോർട്ട് സൂചിപ്പിച്ചതുപോലെ, പ്രതീക്ഷിച്ചതിലും മികച്ച ശമ്പള വർദ്ധനവും കുറഞ്ഞ തൊഴിലില്ലായ്മ നിരക്കും യു.എസ്. സമ്പദ്‌വ്യവസ്ഥയുടെ തിരിച്ചുവരവ് സൂചിപ്പിക്കുന്നുണ്ട്. ഇത് ഫെഡറൽ റിസർവ് നിരക്ക് വെട്ടിക്കുറയ്ക്കുന്നതിനുള്ള സാധ്യത ഇല്ലാതാക്കുന്നു. ഉയർന്നതോ സ്ഥിരമായതോ ആയ പലിശനിരക്കുകൾ യു.എസ്. ഡോളറിനെ ശക്തിപ്പെടുത്തുകയും സ്വർണ പോലുള്ള ആസ്തികളെ ആകർഷകമല്ലാതാക്കുകയും ചെയ്യും. അതുകൊണ്ട്, സ്വർണവില കുറയാൻ ഇത് കാരണമാകും.

മറുവശത്ത്, ഫെബ്രുവരി/മാർച്ച് ഡാറ്റ പോലുള്ള റിപ്പോർട്ടുകൾ തൊഴിൽ വളർച്ചയിലെ കുറവോ തൊഴിലില്ലായ്മ വർദ്ധനവോ കാണിക്കുകയാണെങ്കിൽ, നിരക്ക് കുറയ്ക്കാനുള്ള പ്രതീക്ഷകൾക്ക് ജീവൻ നൽകും. ഇത് ഡോളറിനെ ദുർബലപ്പെടുത്തുകയും നിക്ഷേപകർ സംരക്ഷണത്തിനായി സ്വർണത്തിലേക്ക് തിരിയുകയും ചെയ്യും, ഇത് സ്വർണ്ണവില ഉയരാൻ കാരണമാകും.

യുഎസ് ഇസ്രായേൽ നിലപാട്

തുടരുന്ന ആക്രമണങ്ങൾ, ഇറാൻ്റെ പ്രതിരോധ മിസൈൽ/ഡ്രോൺ ആക്രമണങ്ങൾ, വ്യാപകമായ സംഘർഷ സാധ്യതകൾ എന്നിവ വലിയ അനിശ്ചിതത്വമാണ് സൃഷ്ടിക്കുന്നത്. യുഎസ് -ഇസ്രായേൽ നിലപാടിൽ അയവു വരികയാണെങ്കിൽ സംഘർഷ സാധ്യതകൾ കുറയും. ഇത് സുരക്ഷിത നിക്ഷേപത്തിനുള്ള ആവശ്യം കുറയ്ക്കുകയും സ്വർണവില താഴാൻ ഇടയാകുകയും ചെയ്യും.എന്നാൽ യുദ്ധം വ്യക്തമായ പരിഹാരമില്ലാതെ തുടരുന്നിടത്തോളം കാലം ഈ ഘടകം സ്വർണ്ണവിലയെ ഉയർന്ന നിലയിൽ നിലനിർത്തുകയും കൂടുതൽ അസ്ഥിരമാക്കുകയും ചെയ്യും. ട്രംപിന്റെ പുതിയ സൂചനകളും ഇതിൽ നിർണായകമാകും.