ഇന്ന് സ്വര്ണവില കൂടിയത് വെറും 10 രൂപ..! സ്വര്ണം വാങ്ങുന്നവര് വേഗം ജ്വല്ലറിയിലേക്ക് വിട്ടോ
സംസ്ഥാനത്ത് ഇന്ന് സ്വര്ണ വിലയില് നേരിയ വര്ധനവ്. ആഗോള വിപണിയില് സ്വര്ണ വില ഇടിഞ്ഞ സമയത്താണ് ആഭ്യന്തര വിപണിയില് നേരിയ തോതിലെങ്കിലും മുന്നേറ്റം പ്രകടമായത് എന്നത് ശ്രദ്ധേയമായി. ആഗോള വിപണിയില് അന്താരാഷ്ട്ര സ്വര്ണ വില 1% ത്തിലധികം കുറഞ്ഞു. സ്പോട്ട് സ്വര്ണ വ്യാപാരം ഔണ്സിന് ഏകദേശം 4,056 ഡോളറിലെത്തി. വിവിധ ഘടകങ്ങള് വിലയേറിയ ലോഹത്തെ സാരമായി ബാധിച്ചു.
യു എസ് - ഇറാന് സംഘര്ഷങ്ങള് വീണ്ടും ക്രൂഡ് ഓയില് വില കുത്തനെ ഉയര്ത്തിയതായും ഇത് യു എസ് ട്രഷറി വരുമാനത്തെയും ഡോളറിനെയും ഉയര്ത്തിയതായും വിശകലന വിദഗ്ധര് പറഞ്ഞു. ഉയര്ന്ന ഭൗമരാഷ്ട്രീയ അനിശ്ചിതത്വം ഉണ്ടായിരുന്നിട്ടും ശക്തമായ ഡോളറും പണപ്പെരുപ്പ ആശങ്കകളും ബുള്ളിയന് വിലകളെ ബാധിച്ചു. കേരളത്തിലെ ഇന്നത്തെ സ്വര്ണ വില നിലവാരം നോക്കാം..
സംസ്ഥാനത്ത് ഇന്ന് ഒരു ഗ്രാം സ്വര്ണത്തിന് 10 രൂപയാണ് കൂടിയിരിക്കുന്നത്. ഇതോടെ ഒരു ഗ്രാം 22 കാരറ്റ് സ്വര്ണത്തിന്റെ വില 13120 രൂപയില് നിന്ന് 13130 രൂപയായി മാറി. ഒരു പവന് സ്വര്ണത്തിന് 80 രൂപയാണ് കൂടിയിരിക്കുന്നത്. ഇത് ഒരു പവന് 22 കാരറ്റ് സ്വര്ണത്തിന്റെ വില 104960 രൂപയില് നിന്ന് 105040 രൂപയില് എത്തിച്ചു. ഈ മാസം സ്വര്ണ വിലയില് വലിയ ചാഞ്ചാട്ടമാണ് ഇതുവരെ കാണിച്ചത്.
ജൂലൈ 1 ന് 12905 രൂപ എന്ന ഈ മാസത്തെ എക്കാലത്തേയും താഴ്ന്ന നിരക്കിലാണ് സ്വര്ണം വ്യാപാരം ആരംഭിച്ചത്. എന്നാല് പിന്നീടുളള ദിവസങ്ങളില് വില കൂടിയതോടെ 13475 എന്ന ഈ മാസത്തെ ഇതുവരെയുള്ള ഏറ്റവും ഉയര്ന്ന നിരക്കിലേക്ക് ജൂലൈ 3 ന് എത്തി. അതേസമയം ഈ കുതിപ്പ് നിലനിര്ത്താന് പിന്നീട് സ്വര്ണത്തിന് സാധിച്ചില്ല. പിന്നീടൂള്ള എല്ലാ ദിവസങ്ങളിലും വില താഴേക്ക് പോയി.
ഇന്ന് നേരിയ തോതില് വര്ധിച്ചെങ്കിലും ഉപഭോക്താക്കളെ സംബന്ധിച്ചിടത്തോളം വലിയ തിരിച്ചടിയല്ല. അതേസമയം എം സി എക്സില് സ്വര്ണത്തിന്റെയും വെള്ളിയുടെയും വില കുറഞ്ഞു. യു എസും ഇറാനും തമ്മിലുള്ള പുതിയ സംഘര്ഷങ്ങള് പണപ്പെരുപ്പ ആശങ്കകള്ക്കും ഈ വര്ഷം ആക്രമണാത്മകമായ പണ നിയന്ത്രണ പ്രതീക്ഷകള്ക്കും ആക്കം കൂട്ടിയത് വിലയേറിയ ലോഹങ്ങളെ ബാധിച്ചു.
എംസിഎക്സിന്റെ ഓഗസ്റ്റ് സ്വര്ണ്ണ ഫ്യൂച്ചറുകള് 0.30% കുറഞ്ഞ് 1,43,275 രൂപ എന്ന നിലയിലും, എംസിഎക്സിന്റെ സെപ്റ്റംബര് വെള്ളി ഫ്യൂച്ചറുകള് രാവിലെ 9:15 ഓടെ കിലോയ്ക്ക് 0.76% കുറഞ്ഞ് 2,21,749 രൂപ എന്ന നിലയിലും എത്തി. യുഎസും ഇറാനും തമ്മിലുള്ള പുതിയ ശത്രുത യു എസില് ഉയര്ന്ന പണപ്പെരുപ്പത്തെയും പലിശ നിരക്ക് വര്ധനവിനെയും കുറിച്ചുള്ള ആശങ്കകള് പുനരുജ്ജീവിപ്പിച്ചതോടെ അന്താരാഷ്ട്ര സ്വര്ണ വിലയും കുറഞ്ഞു.
അതേസമയം, യു എസ് ഫെഡറല് റിസര്വിന്റെ ജൂണ് മാസത്തെ യോഗത്തിന്റെ നടപടിക്രമങ്ങള് സൂചിപ്പിക്കുന്നത്, മധ്യേഷ്യയിലെ സംഘര്ഷം കേന്ദ്രബാങ്കിന്റെ ചര്ച്ചകളില് പ്രധാന വിഷയമായിരുന്നെന്നും, ഉയര്ന്ന പണപ്പെരുപ്പം കാരണം പലിശനിരക്ക് വര്ധിപ്പിക്കേണ്ടതിന്റെ ആവശ്യകത ചില ഉദ്യോഗസ്ഥര് ചൂണ്ടിക്കാട്ടിയെന്നുമാണ്.
'മധ്യേഷ്യയിലെ പുതിയ സംഘര്ഷം ഊര്ജ്ജ വിതരണത്തെ തടസപ്പെടുത്തുകയും പണപ്പെരുപ്പ സമ്മര്ദ്ദം വര്ധിപ്പിക്കുകയും ചെയ്തേക്കാമെന്ന ആശങ്ക സ്വര്ണവില കുറയാന് കാരണമായി. കൂടാതെ, പണപ്പെരുപ്പത്തെക്കുറിച്ച് ഉദ്യോഗസ്ഥര്ക്ക് ആശങ്കയുണ്ടെന്ന് ഫെഡിന്റെ ജൂണ് മാസത്തെ യോഗത്തിന്റെ രേഖകള് വ്യക്തമാക്കുന്നു,' ഇന്ഡസ്ഇന്ഡ് സെക്യൂരിറ്റീസിലെ സീനിയര് റിസര്ച്ച് അനലിസ്റ്റ് ജിഗര് ത്രിവേദി പറഞ്ഞു.
Click it and Unblock the Notifications
Sign in with Google