സ്വർണം കളി തുടങ്ങിയിട്ടേ ഉള്ളൂ: ഇതുവരെ കൂടിയതൊന്നുമല്ല...പണി തരുന്നത് കേന്ദ്രബാങ്കുകൾ

2025 ഓഗസ്റ്റ് അവസാനത്തോടെ ആഗോള സ്വർണവിലയിൽ 47.6 ശതമാനത്തിൻ്റെ വർധനവാണ് ഉണ്ടായത് . ഓഗസ്റ്റ് അവസാനത്തോടെ ഒരു ഔൺസിന് 3448 ഡോളറായിരുന്നു വില ഉണ്ടായിരുന്നത്. അവിടെ നിന്നാണ് ഇപ്പോൾ 5167 ഡോളറിലേക്ക് സ്വർണം കുതിച്ചത്. ഭൌമരാഷ്ട്രീയ സംഘർഷങ്ങൾ സ്വർണ വിലയിൽ വലിയ സ്വാധീനം ഉണ്ടാക്കിയിട്ടുണ്ട്. എന്നാൽ അതോടൊപ്പം തന്നെ വില കുതിച്ചുയരുന്നതിൽ വിവിധ രാജ്യങ്ങളുടെ കേന്ദ്രബാങ്കുകൾക്കും പങ്കുണ്ട്.

രാജ്യാന്തര തലത്തിൽ ഡോളറല്ലാതെയുള്ള കരുതൽ ശേഖരങ്ങളിലേക്ക് സ്വർണം വാങ്ങിക്കൂട്ടിയ കേന്ദ്രബാങ്ക് നീക്കം വില ഉയരാൻ കാരണമായി.ഈ പ്രവണത സ്വർണ്ണവില ഇനിയും ഉയർത്തുമെന്നാണ് ഇപ്പോൾ എസ്ബിഐയുടെ സാമ്പത്തിക ഗവേഷണ വിഭാഗം വിലയിരുത്തുന്നത്. ദേശീയ കടബാധ്യതകൾക്ക് താൽക്കാലിക പരിഹാരമെന്ന നിലയിൽ, യുഎസ് ഫെഡ് ഉൾപ്പെടെയുള്ള കേന്ദ്ര ബാങ്കുകൾ സ്വർണ്ണ ശേഖരം പുനർമൂല്യനിർണ്ണയം ചെയ്തേക്കാമെന്നും അവർ സൂചന നൽകി.

"കേന്ദ്ര ബാങ്കുകൾ ട്രഷറി നിക്ഷേപങ്ങളിൽ നിന്ന് സ്വർണ ശേഖരങ്ങളിലേക്ക് മാറിക്കൊണ്ടിരിക്കുകയാണ്. 1996-ന് ശേഷം ആദ്യമായിട്ടാണ് 2025 ജൂണിൽ ഈ മാറ്റം കണ്ടത്. ലോകമെമ്പാടുമുള്ള സെൻട്രൽ ബാങ്കുകളുടെ സ്വർണ ശേഖരത്തിൽ വലിയ വർദ്ധനവാണ് ഉണ്ടായത്," എസ്ബിഐ സാമ്പത്തിക വിദഗ്ധർ പറഞ്ഞു

യുഎസ്എയുടെയും ജർമ്മനിയുടെയും മൊത്തം ശേഖരത്തിന്റെ 80.4% സ്വർണ്ണമാണ്, ഇറ്റലിയുടേത് 79.4% ആണ്. ഇന്ത്യയുടെ കരുതൽ ശേഖരത്തിന്റെ ഏകദേശം 17.6% സ്വർണ്ണരൂപത്തിലാണ്, വിദഗ്ധർ ചൂണ്ടിക്കാട്ടി.

ദീർഘകാലയളവിൽ അമേരിക്കയ്ക്ക് പരിഗണിക്കാവുന്ന ഒരു അസാധാരണ നീക്കമെന്ന നിലയിൽ, യുഎസ് ഫെഡറൽ ഗവൺമെന്റിന്റെ സ്വർണ ശേഖരം പുനർമൂല്യനിർണ്ണയം ചെയ്യണമെന്ന അഭിപ്രായവും ഉദ്യോഗസ്ഥർ പങ്കുവെച്ചു. ലോകത്തിലെ ഏറ്റവും വലിയ ശേഖരമായ 261.5 ദശലക്ഷം ട്രോയ് ഔൺസ് സ്വർണ്ണം, 1973-ലെ 42.22 ഡോളറിൽ നിന്ന് നിലവിലെ 5000+ ഡോളറിലെ വിപണി വിലയിലേക്ക് മാറ്റണമെന്നതാണ് വാദം.

ഈ പുനർമൂല്യനിർണ്ണയം യുഎസിന്റെ ആസ്തികളിൽ വലിയ കുതിച്ചുചാട്ടം ഉണ്ടാക്കുമെന്ന് എസ്ബിഐ ചീഫ് എക്കണോമിക് അഡ്വൈസർ സൌമ്യ കാന്തി ഘോഷ് ചൂണ്ടിക്കാട്ടി. നിലവിലെ 11 ബില്യൺ ഡോളറിൽ നിന്ന് 1.3 ട്രില്യൺ ഡോളറായി (യുഎസ് ജിഡിപിയുടെ 4 ശതമാനത്തിലധികം) ആസ്തികൾ വർദ്ധിക്കും. ഇത് യുഎസ് ബജറ്റ് കമ്മിയുടെ 70 ശതമാനം ഇല്ലാതാക്കാനും, 38.8 ട്രില്യൺ ഡോളറിന്റെ നിലവിലെ കടബാധ്യതയ്ക്ക് ഒരു താൽക്കാലിക പരിഹാരം കാണാനും സഹായിക്കുമെന്ന് അദ്ദേഹം കൂട്ടിച്ചേർത്തു.

"സ്വർണ്ണവില ഉയരുമ്പോൾ, കേന്ദ്ര ബാങ്കുകളുടെ ബാലൻസ് ഷീറ്റുകളിലെ കരുതൽ ശേഖരത്തിന്റെ മൂല്യം ഗണ്യമായി വർദ്ധിക്കും. കേന്ദ്ര ബാങ്കുകൾ സ്വർണ്ണശേഖരം പുനർമൂല്യനിർണ്ണയം ചെയ്യുമ്പോൾ, വർദ്ധിച്ച മൂല്യം ഒരു ആസ്തിയായി പ്രതിഫലിക്കുകയും, കണക്കുകൾ സന്തുലിതമാക്കാൻ ബാധ്യതകളും ഒരേസമയം ഉയരുകയും ചെയ്യും," എസ്ബിഐ സാമ്പത്തിക വിദഗ്ധർ വിശദീകരിച്ചു.

ഫെഡിന്റെ സ്വർണ്ണശേഖരം പുനർമൂല്യനിർണ്ണയം ചെയ്യുന്നത് ബാലൻസ് ഷീറ്റ് ശക്തിപ്പെടുത്തും (കടം നേരിട്ട് കുറയ്ക്കില്ലെങ്കിലും) എന്ന് സാമ്പത്തിക വിദഗ്ധർ അഭിപ്രായപ്പെട്ടു. കൂടുതൽ ആസ്തികൾ അമേരിക്കയുടെ സാമ്പത്തികമായ വഴക്കവും പ്രതിച്ഛായയും വർദ്ധിപ്പിച്ച് ഭീമമായ കടബാധ്യത കൈകാര്യം ചെയ്യുന്നത് എളുപ്പമാക്കുമെന്നാണ് പൊതുവായ വിലയിരുത്തൽ.