സ്വർണ വില കുറയുക തന്നെ ചെയ്യും..2021-2022 കാലത്തെ വിലയിലേക്ക് വീഴും? സാമ്പത്തിക വിദഗ്ധർ പറയുന്നു

സ്വർണം റെക്കോഡ് ഉയരങ്ങൾ താണ്ടിയെങ്കിലും കഴിഞ്ഞ ദിവസങ്ങളിൽ വില കുറഞ്ഞത് ആഭരണപ്രേമികൾക്കിടയിൽ വലിയ ആശ്വാസത്തിനാണ് വഴിവെച്ചത്. ആഗോള വിപണിയിൽ ശക്തമായ മുന്നേറ്റത്തിന് ശേഷം, സ്പോട്ട് ഗോൾഡ് ഫ്യൂച്ചറുകൾ വാരാന്ത്യത്തിലേക്ക് കടക്കുമ്പോൾ ഒരു ഔൺസിന് 4,600 ഡോളറിന് താഴെയാണ് വ്യാപാരം നടക്കുന്നത്.വെള്ളിയും സമാനമായ വില വ്യതിയാനമാണ് നേരിടുന്നത്,

2026-ന്റെ ആദ്യ രണ്ടാഴ്ച പിന്നിടുമ്പോൾ ചരിത്രത്തിലെ ഏറ്റവും മികച്ച തുടക്കമാണ് സ്വർണം കണ്ടിരിക്കുന്നത്. രാജ്യാന്തര വിപണിയിൽ ഈ മാസം ഇതുവരെ സ്വർണവില 256 ഡോളർ വർധിച്ചു. കഴിഞ്ഞ രണ്ടാഴ്ചയ്ക്കുള്ളിൽ വില 5.6% ഉയർന്നു. എന്നിരുന്നാലും, കഴിഞ്ഞ വർഷത്തെ ജനുവരിയിലെ 7% വർധനവിനെ മറികടക്കാൻ ഇനിയും ഏറെ ദൂരം പോകാനുണ്ട്.

വെള്ളി വിപണിയും ചരിത്രത്തിലെ ഏറ്റവും വലിയ പുതുവർഷ മുന്നേറ്റമാണ് രേഖപ്പെടുത്തിയത്; ഈ മാസം ഇതുവരെ വില ഏകദേശം 17.50 ഡോളർ വർധിച്ചു. കഴിഞ്ഞ രണ്ടാഴ്ചയ്ക്കുള്ളിൽ വെള്ളിവില 24 ശതമാനത്തിലധികം ഉയർന്നു. ഈ വർഷം സ്വർണത്തിനും വെളളിക്കും ലഭിച്ച നേട്ടങ്ങളും 2025-ന്റെ രണ്ടാം പകുതിയിലെ മുന്നേറ്റവും പരിശോധിച്ചാൽ ഇനി വിപണിയിൽ എന്ത് സംഭവിക്കുമെന്ന് പ്രവചിക്കാൻ തന്നെ പ്രയാസമാണെന്നാണ് വിശകലന വിദഗ്ധർ പറയുന്നത്. അതേസമയം ഇപ്പോഴത്തെ വിലയിടിവ് ആരോഗ്യകരമാണെന്നും അവർ സൂചിപ്പിച്ചു. ഇപ്പോഴത്തെ വിലയിടിവ് സ്വാഭാവിക ഏകീകരണം മാത്രമാണെന്നാണ് സാമ്പത്തിക വിദഗ്ധർ ചൂണ്ടിക്കാട്ടുന്നത്. സ്വർണ വില ഇങ്ങനെ ഏറിയും കുറഞ്ഞും മുന്നേറും. അല്ലാതെ വലിയൊരു ഇടിവിന് സാധ്യതയില്ലെന്ന് ഇവർ ചൂണ്ടിക്കാട്ടുന്നു.

യുഎസ് കേന്ദ്രബാങ്കായ ഫെഡ് റിസർവ്വ് പലിശ നിരക്ക് കുറക്കാനുള്ള സാധ്യതയില്ലെന്നാണ് റിപ്പോർട്ടുകൾ. പലിശ നിരക്ക് കുറക്കാത്തത് സ്വർണത്തിന് പ്രതികൂലമാണ്. എന്നിരുന്നാലും ഫെഡിന്റെ സ്വാതന്ത്ര്യത്തെക്കുറിച്ചുള്ള ആശങ്കകൾ, വ്യാപാരത്തിലെ പ്രശ്നങ്ങൾ, സെൻട്രൽ ബാങ്കുകളുടെ സ്ഥിരമായ വാങ്ങൽ എന്നിവ ഇപ്പോഴും സ്വർണത്തിന് വളരെ അനുകൂലമാണ്. രാജ്യാന്തര വിപണിയിൽ സ്വർണ വില 4,570 ഡോളറിന് താഴേക്ക് പോകുന്നത് ഒരുപക്ഷേ 4,500 ഡോളറിലേക്കും 4,450 ഡോളറിലേക്കും ഇടിയാൻ കാരണമായേക്കുമെന്നുള്ള അഭിപ്രായങ്ങൾ ഉയരുന്നുണ്ട്. എന്നാൽ ഈ വിലയിടിവ് തുടരില്ല, മറിച്ച് ശക്തമായി തന്നെ വീണ്ടെടുത്തേക്കാം. വില 4,645 ഡോളർ മറികടക്കുകയാണെങ്കിൽ, സ്വർണം അടുത്ത പ്രധാന നാഴികക്കല്ലായ 4,700 ഡോളറിലേക്ക് കുതിച്ചേക്കാമെന്നും ഇവർ പറയുന്നു.

ഫെഡറൽ റിസർവിന്റെ അടുത്ത പലിശ നിരക്ക് കുറയ്ക്കൽ ജൂൺ വരെ ഉണ്ടാകില്ലെന്ന വർദ്ധിച്ചുവരുന്ന പ്രതീക്ഷകൾ ഹ്രസ്വകാലത്തേക്ക് അമൂല്യ ലോഹങ്ങളുടെ ആവശ്യകത കുറയ്ക്കുമെന്നാണ് മാർക്കറ്റ് അനലിസ്റ്റ് എലിയോർ മാനിയറുടെ പ്രവചനം. ട്രെൻഡ് സ്തംഭിക്കുകയോ തിരുത്തലുകൾ സംഭവിക്കുകയോ ചെയ്താലും, ഏതാനും വർഷം മുൻപുള്ളതിൽ നിന്ന് ആഗോള സാഹചര്യം അടിസ്ഥാനപരമായി വ്യത്യസ്തമാണ് ഉടൻതന്നെ 2021-2022-ലെ വിലകളിലേക്ക് ഒരു തിരിച്ചുവരവ് പ്രതീക്ഷിക്കരുത്.എന്നാൽ ഒരു പാരബോളിക് വിപണിയിൽ കടുത്ത തിരുത്തലുകൾ സാധാരണമാണെന്ന് അറിഞ്ഞിരിക്കുക', അദ്ദേഹം വ്യക്തമാക്കി.

എന്നിരുന്നാലും എല്ലാ വിശകലന വിദഗ്ധരും സ്വർണം സ്ഥിരതയിലേക്ക് പോകുമെന്ന് പ്രതീക്ഷിക്കുന്നില്ല, കാരണം ഭൗമ-രാഷ്ട്രീയ പിരിമുറുക്കങ്ങൾ ഉയർന്നുതന്നെ തുടരുകയാണ്. നഷ്ടസാധ്യത കുറയ്ക്കാൻ ആഗ്രഹിക്കുന്ന നിക്ഷേപകരെ സംബന്ധിച്ചിടത്തോളം സ്വർണം അവരുടെ പ്രധാനപ്പെട്ട തിരഞ്ഞെടുപ്പാണ്. വാർഷിക ലോക സാമ്പത്തിക ഫോറം ആരംഭിക്കുന്നതോടെ അടുത്ത ആഴ്ച ഭൗമ-രാഷ്ട്രീയ പിരിമുറുക്കങ്ങൾ വർദ്ധിക്കാൻ സാധ്യതയുണ്ട്. ബുധനാഴ്ച സ്വിറ്റ്സർലണ്ടിലെ ദാവോസിൽ വെച്ച് പ്രസിഡന്റ് ഡൊണാൾഡ് ട്രംപ് സംസാരിക്കും. അന്തിമ യു.എസ്. ജി.ഡി.പി. ഡാറ്റയും ഡിസംബറിലെ വ്യക്തിഗത ഉപഭോഗച്ചെലവ് സൂചികയും (Personal Consumption Expenditure Index) പുറത്തു വരുന്നതോടെ വിപണിയിലെ ചാഞ്ചാട്ടങ്ങൾ വർദ്ധിച്ചേക്കാം.