സ്വർണം ഇങ്ങനെ വാങ്ങൂ.. മക്കളുടെ ഭാവി സുരക്ഷിതമാക്കൂ: ഒരിക്കലും ഈ മണ്ടത്തരങ്ങള്‍ കാട്ടാതിരിക്കുക

സ്വർണത്തിന്റെ വില കഴിഞ്ഞ കുറച്ച് വർഷങ്ങളായി സ്ഥിരമായ വളർച്ച കാണിക്കുന്നുണ്ട്. ഈ സാഹചര്യത്തില്‍ നേരത്തെ തന്നെ നിക്ഷേപം തുടങ്ങുന്നത്, ദീർഘകാലാടിസ്ഥാനത്തിൽ മികച്ച ലാഭം നേടാൻ സഹായിക്കും. നേരത്തെ തുടങ്ങുന്നത് സ്വർണത്തിന്റെ മൂല്യം വർധിക്കാനും കൂട്ടുവർധനവിന് (compounding) അവസരം നൽകാനും സഹായിക്കും. ഇത് ഭാവിയിൽ വിദ്യാഭ്യാസം, വിവാഹം തുടങ്ങിയ ആവശ്യങ്ങൾക്കായി വലിയ ഒരു തുക ലഭ്യമാക്കും.

കുട്ടികളുടെ വിദ്യാഭ്യാസ ആവശ്യങ്ങള്‍ക്കായി പണം മാറ്റിവയ്ക്കുന്നതുപോലെ മാസത്തിലോ അല്ലെങ്കില്‍ മൂന്ന് മാസത്തില്‍ ഒരിക്കലോ ചെറിയ ബജറ്റ് സ്വർണം വാങ്ങാൻ മാറ്റിവയ്ക്കാം. ഒറ്റയടിക്ക് വലിയ തോതിൽ വാങ്ങേണ്ട ആവശ്യമില്ല. ഒരു മാസം ഒരു ഗ്രാം സ്വർണം വാങ്ങാനുള്ള പണമാണ് മാറ്റിവെക്കുന്നതെങ്കില്‍ പോലും 15-20 വർഷത്തിനുള്ളിൽ അത് വലിയ ഒരു തുകയായി മാറും.

നിരവധി ഡിജിറ്റൽ പ്ലാറ്റ്‌ഫോമുകൾ ഇന്ന് ലഭ്യമാണ്, അവ ഉപയോഗിച്ച് നിക്ഷേപങ്ങൾ ഓട്ടോമേറ്റ് ചെയ്യാനും വിപണി സമയം ഊഹിക്കുന്നതിന്റെ സമ്മർദ്ദം ഒഴിവാക്കാനും കഴിയും. നേരത്തെ തുടങ്ങുന്നതിലൂടെ വിലയുടെ ശരാശരി (cost averaging) പ്രയോജനപ്പെടുത്താനും വാങ്ങൽ ചെലവ് കുറയ്ക്കാനും സാധിക്കും.

ആഭരണം വേണ്ട, ഡിജിറ്റല്‍ ആകൂ

സ്വർണത്തില്‍ നിക്ഷേപിക്കുമ്പോള്‍ ഒരിക്കലും ആഭരണങ്ങളിലേക്ക് പോകാതിരിക്കുന്നതാണ് നല്ലത്. അതായത് ഫിസിക്കലായി സ്വർണം സൂക്ഷിക്കാതെ തന്നെ സ്വർണവുമായി ബന്ധപ്പെട്ട ലാഭം നേടാൻ കഴിയുന്ന ഗോൾഡ് ഇടിഎഫ് (എക്സ്ചേഞ്ച് ട്രേഡഡ് ഫണ്ട്സ്) പോലുള്ള നോൺ-ഫിസിക്കൽ ഓപ്ഷനുകളിൽ നിക്ഷേപിക്കാം. 10 രൂപ മുതൽ ഓൺലൈനിൽ സ്വർണം വാങ്ങാം എന്നതാണ് പ്രത്യേകത. ഈ ഓപ്ഷനുകൾ സുരക്ഷിതവും സൗകര്യപ്രദവും ഫിസിക്കലായി സ്വർണം വാങ്ങുന്നതിനേക്കാൾ ചെലവ് കുറഞ്ഞതുമാണ്.

സ്വർണ നാണയങ്ങളും കട്ടികളും

ഡിജിറ്റൽ സ്വർണമാണ് ഏറെ നല്ലതെങ്കിലും സ്വർണ ശേഖരത്തിന്‍റെ ഒരു ഭാഗം ഫിസിക്കൽ രൂപത്തിൽ, പ്രത്യേകിച്ച് നാണയങ്ങളും കട്ടികളും ആയി സൂക്ഷിക്കുന്നത് നല്ലതാണ്. ആഭരണങ്ങള്‍ക്കുള്ള പണിക്കൂലി ഇല്ലാതെ വാങ്ങാന്‍ സാധിക്കുന്ന നാണയങ്ങളും കട്ടികളും സൂക്ഷിക്കാനും വിൽക്കാനും എളുപ്പമാണ്. പ്രധാനപ്പെട്ട അവസരങ്ങൾക്കായി സ്വർണം വാങ്ങുന്നത് വൈകാരികവും പ്രായോഗികവുമായ മൂല്യം നൽകുന്നു.

ആഘോഷ വേളകള്‍

സ്വർണ ശേഖരത്തെ കൂടുതല്‍ അർത്ഥവത്താക്കാൻ, കുട്ടികളുടെ ജീവിതത്തിലെ പ്രധാന നാഴികക്കല്ലുകളുമായി സ്വർണ നിക്ഷേപങ്ങളെ ബന്ധിപ്പിക്കാം. ഉദാഹരണത്തിന്, ഓരോ ജന്മദിനത്തിനും ഒരു ചെറിയ സ്വർണ നാണയം വാങ്ങി അതിൽ ആ വർഷം കൊത്തിവെക്കാം. അല്ലെങ്കില്‍ ആ തുക ഡിജിറ്റല്‍ സ്വർണത്തിലേക്ക് മാറ്റാം. അക്കാദമിക നേട്ടങ്ങൾക്കോ മറ്റ് പ്രധാന നാഴികക്കല്ലുകൾക്കോ ഒരു ഗ്രാം സ്വർണമോ നാണയമോ വാങ്ങാം. ദീപാവലി, അക്ഷയ തൃതീയ തുടങ്ങിയ അവസരങ്ങളിലും ഇത് തന്നെ ചെയ്യാം. ഇത് സ്വർണ ശേഖരം വർധിപ്പിക്കുക മാത്രമല്ല, കുട്ടികൾക്ക് സമ്പാദ്യത്തിന്റെയും മൂല്യാധിഷ്ഠിത സമ്മാനത്തിന്റെയും പ്രാധാന്യം പഠിപ്പിക്കുകയും ചെയ്യും.

സുരക്ഷിതത്വം

സ്വർണം ആഭരണങ്ങളോ നാണയങ്ങളോ ആയി വാങ്ങിയാല്‍ അത് സൂക്ഷിക്കാന്‍ ബാങ്ക് ലോക്കറോ വിശ്വസനീയമായ മൂന്നാം കക്ഷി വോൾട്ട് സേവനങ്ങളോ ഉപയോഗിക്കാം. ഫിസിക്കൽ, ഡിജിറ്റൽ വാങ്ങലുകളുടെ രസീതുകളും സർട്ടിഫിക്കറ്റുകളും ഉൾപ്പെടെ ലളിതമായ ഒരു രേഖ സൂക്ഷിക്കുക. ഇടിഎഫ് അല്ലെങ്കിൽ ഡിജിറ്റൽ സ്വർണം പോലുള്ള ഡിജിറ്റൽ ഹോൾഡിംഗുകൾക്ക്, അക്കൗണ്ട് വിശദാംശങ്ങളും നോമിനി വിവരങ്ങളും പുതുക്കി സൂക്ഷിക്കുക, അതുവഴി കുട്ടിക്ക് ഭാവിയിൽ എളുപ്പത്തിൽ ആക്സസ് ചെയ്യാനാകും

ഇത്തരം സ്വർണ ശേഖരം എന്നത് വിവാഹങ്ങൾക്കോ മറ്റ് ആവശ്യങ്ങള്‍ക്കോ വേണ്ടിയുള്ളതായി മാത്രം കാണരുത്. മക്കള്‍ക്ക് ഏറ്റവും ആവശ്യമുള്ളപ്പോൾ ശക്തമായ ഒരു സാമ്പത്തിക പിന്തുണ ഉറപ്പാക്കുന്നതിന് വേണ്ടിയായിരിക്കണം ഇത്. പുതിയ ബിസിന് തുടങ്ങാനും വീട് പണിയാനുമൊക്കെ ഈ ശേഖരം ഉപകാരപ്പെടും.