സ്വർണം വിൽക്കുന്നത് ഇപ്പോൾ ലാഭകരമാണോ?സാമ്പത്തിക വിദഗ്ധ മേരി ജോർജ് പറയുന്നത് ഇങ്ങനെ

സ്വർണ വിലയിൽ ഇപ്പോൾ സംഭവിക്കുന്ന മാറ്റത്തെ കൌതുകത്തോടെയാണ് എല്ലാവരും വീക്ഷിക്കുന്നതെന്ന് സാമ്പത്തിക വിദഗ്ധ മേരി ജോർജ്. യുദ്ധ സമയത്ത് സ്വർണം സുരക്ഷിത നിക്ഷേപമാണ്. യഥാർത്ഥത്തിൽ ഇപ്പോൾ സംഭവിക്കേണ്ടതിന്റെ നേരെ വിപരീതമാണ് ഇപ്പോൾ സംഭവിച്ചുകൊണ്ടിരിക്കുന്നത്. സ്വർണം വാങ്ങാനോ വാങ്ങരുതെന്നോ പറയാൻ പറ്റാത്ത ഒരു അവസ്ഥയാണെന്നും സീ ന്യൂസ് മലയാളത്തോട് മേരി ജോർജ് പറഞ്ഞു. അവരുടെ വാക്കുകളിലേക്ക്

'യുദ്ധ സമയത്ത് വലിയ അത്ഭുതം തരുന്ന ഒരു കാര്യമാണ് സ്വർണത്തിന്റെ വില കുറയുന്നു എന്നുള്ളത്. നാഷണൽ സ്റ്റോക്ക് എക്സ്ചേഞ്ചിലും ബിഎസ്സി സ്റ്റോക്ക് എക്സ്ചേഞ്ചിലും ഒക്കെ ഷെയറുകൾ വിൽപന നടക്കുകയാണ് . സാധാരണ രീതിയിൽ വിദേശ കമ്പനികൾ ആയിരിക്കും ഇപ്പോൾ വിൽപന നടത്തി മുതൽ കയ്യിലെടുക്കുന്നത്. അപ്പോൾ എവിടേക്ക് പോകുന്നു നിക്ഷേപം. ഒന്നുകിൽ ഷെയർ മാർക്കറ്റിൽ കാണണം. അല്ലെങ്കിൽ ഡോളറിൽ കാണണം. അതുമല്ലെങ്കിൽ സ്വർണത്തിലേക്ക് വരണം. സ്വർണമാണ് തീർച്ചയായിട്ടും സുനിശ്ചിതമായ ഒരു നിക്ഷേപ മാർഗമാണ് .പക്ഷേ സ്വർണത്തിലേക്കും വരുന്നില്ല .എന്നുവെച്ചാൽ ആഗോള അനിശ്ചിതത്വം എല്ലാത്തരം ഇൻവെസ്റ്റേഴ്സിലും അനിശ്ചിതത്വം സൃഷ്ടിച്ചിരിക്കുന്നു.

തൽക്കാലം എവിടെയും ഇൻവെസ്റ്റ് ചെയ്യണ്ട എന്ന ധാരണയോടുകൂടി നാളെ എന്ത് സംഭവിക്കും എന്ന് ആകാംഷയോടെ നോക്കിയിരിക്കുകയാണ് നിക്ഷേപകർ. അവർ നോക്കുന്നത് ഇനി യുദ്ധം മുറുകുകയാണോ അതോ യുദ്ധം പതുക്കെ അവസാനിക്കുകയാണോയെന്നാണ്. മുറുകുകയാണ് എന്ന് കണ്ടാൽ ഉടൻ സ്വർണത്തിലേക്ക് വലിയ തോതിൽ നിക്ഷേപം വരും. അതല്ല യുദ്ധം സാവകാശമായി കെട്ടടങ്ങാൻ പോകുന്നു എന്ന് വന്നാൽ തീർച്ചയായും സ്വർണത്തിലേക്ക് വലിയ ഇടിച്ചുകയറ്റം ഉണ്ടാവുകയില്ല. ഒന്നും പറയാൻ നിവൃത്തിയില്ലാത്ത ഒരു അവസ്ഥയാണ് ഇപ്പോൾ വന്നിരിക്കുന്നത്. സ്വർണവില എങ്ങനെ പോകും വരും കാലങ്ങളിൽ എന്ന് തീർച്ചയായിട്ടും നോക്കിയിരുന്നു തന്നെ കാണാൻ പറ്റുകയുള്ളൂ അതല്ലാതെ കൃത്യതയോടെ ഒന്നും പറയാൻ ഇപ്പോൾ സാധിക്കില്ല.

യഥാർത്ഥത്തിൽ ഇപ്പോൾ സംഭവിക്കേണ്ടതിന്റെ നേരെ വിപരീതമാണ് ഇപ്പോൾ സംഭവിച്ചുകൊണ്ടിരിക്കുന്നത്. സ്വർണം വാങ്ങാനോ വാങ്ങരുതെന്നോ പറയാൻ പറ്റാത്ത ഒരു അവസ്ഥയാണ്. രൂപയുടെ മൂല്യവും കുറയുകയാണ്. ഡോളറിൻ്റെ മൂല്യത്തിൽ കാര്യമായ മാറ്റം വന്നിട്ടുമില്ല. അവിടെയും റിസർവ് ബാങ്ക് ഓഫ് ഇന്ത്യ ഇടപെടുന്നില്ല. സെൻട്രൽ ബാങ്കുകൾ അതുപോലെതന്നെ ഇൻവെസ്റ്റേഴ്സ് ഇവരെല്ലാം നോക്കുകയാണ് എന്ത് സംഭവിക്കാൻ പോകുന്നു അടുത്ത നിമിഷം എന്നത്.

ചൈനയും അതുപോലെ റഷ്യയും ഒക്കെ ഇറാനെ പിന്തുണച്ച് സംസാരിക്കുന്നുണ്ട്. അങ്ങനെ വരുമ്പോഴത്തേക്കും യുഎസ്സിന് ഒരു ആശങ്ക കാണും. യുഎസ്സിൽ തന്നെ ഈ യുദ്ധത്തിനെതിരെ വലിയ ശക്തമായ പ്രതിഷേധം ഉയരുന്നുണ്ട്. അവരുടെ യാഥാസ്ഥിതിക പാർട്ടി ട്രംപിനെ പിന്തുണക്കുന്നു എന്നുള്ളത് ശരിയാണ്, പക്ഷേ അല്ലാതെ തന്നെ മറ്റു പാർട്ടികളിൽ പെട്ടവരും ഒക്കെ ധാരാളമായിട്ട് ട്രംപിനെ വിമർശിക്കുന്നുണ്ട്. അങ്ങനെയൊക്കെയുള്ള സാഹചര്യത്തിൽ എല്ലാവരും നോക്കുകയാണ് ഒരുപക്ഷേ പതുക്കെ ട്രംപ് പിൻവലിഞ്ഞേക്കാം.ട്രംപ് പിൻവലിയുന്ന പക്ഷം ഇസ്രായേലും പിൻവലിയും. അങ്ങനെ ലോകം ഒരു യുദ്ധത്തിലേക്ക് കടക്കാതെ സമാധാനത്തിലേക്ക് മാറാം. ആ ഒരു പ്രതീക്ഷ എല്ലാ ദിശകളിലും ഉണ്ട് '.