സ്വർണത്തിനും വെള്ളിക്കുമൊക്കെ ഇനി കൂടുതൽ നികുതി നൽകണോ? ഏതിനൊക്കെ നികുതി ചുമത്തും? പുതിയ മാറ്റം അറിയാം

വില കത്തിക്കയറുന്ന സാഹചര്യത്തിൽ ബജറ്റിൽ സ്വർണത്തിനുള്ള ഇറക്കുമതി നികുതിയിൽ ഇളവ് വരുത്തണമെന്നും ജി എസ് ടി കുറക്കണമെന്നുമൊക്കെയുള്ള ആവശ്യങ്ങൾ വ്യാപാരികൾ ഉയർത്തിയിരുന്നു. എന്നാൽ ഈ ആവശ്യങ്ങളൊന്നും ബജറ്റിൽ പരിഗണിച്ചിട്ടില്ല. പകരം സോവറിൻ ഗോൾഡ് ബോണ്ട് (എസ്ജിബി) നികുതി വ്യവസ്ഥയിലാണ് ബജറ്റിൽ മാറ്റം ഉണ്ടായിരിക്കുന്നത്. ഇനി മുതൽ ബോണ്ടുകൾ ഇഷ്യു ചെയ്യുന്ന സമയത്ത് വ്യക്തിഗതമായി സബ്‌സ്‌ക്രൈബ് ചെയ്യുകയും കാലാവധി പൂർത്തിയാകുന്നതുവരെ കൈവശം വെക്കുകയും ചെയ്യുന്നവർക്ക് മാത്രമായിരിക്കും എസ്ജിബി നിക്ഷേപങ്ങളിലെ മൂലധന നേട്ട നികുതി ഒഴിവാക്കി കിട്ടുകയെന്നാണ് ബജറ്റിലെ പ്രഖ്യാപനം.

ആർബിഐ പുറത്തിറക്കുന്ന എല്ലാ സോവറിൻ ഗോൾഡ് ബോണ്ടുകൾക്കും പുതിയ നികുതി ഇളവ് വ്യവസ്ഥകൾ ഏകീകൃതമായി ബാധകമാണെന്നും ധനമന്ത്രി വ്യക്തമാക്കി. എന്നാൽ ആഭരണങ്ങൾ അടക്കമുള്ള ഫിസിക്കൽ സ്വർണ്ണം, ഡിജിറ്റൽ സ്വർണ്ണം, ഗോൾഡ് എക്സ്ചേഞ്ച് ട്രേഡഡ് ഫണ്ടുകൾ, മ്യൂച്വൽ ഫണ്ടുകൾ എന്നിവയുടെ നികുതി പ്രക്രിയയിൽ മാറ്റങ്ങളൊന്നും നിർദ്ദേശിച്ചിട്ടില്ല. പുതിയ പ്രഖ്യാപനത്തിൻ്റെ പശ്ചാത്തലത്തിൽ ഫിസിക്കൽ ഗോൾഡ്, ഡിജിറ്റൽ സ്വർണം,ഗോൾഡ് ഇടിഎഫ് എന്നിവയുടെ നികുതി ഘടനകളെ കുറിച്ച് വിശദമായി നോക്കാം

ആഭരണങ്ങൾ, ബാറുകൾ, നാണയങ്ങൾ എന്നിവയാണ് ഫിസിക്കൽ ഗോൾഡുകൾ. ഇവ വാങ്ങുമ്പോൾ 3% ജി എസ് ടിക്ക് പുറമെ സ്വർണാഭരണങ്ങളുടെ പണികൂലിക്ക് 5% അധിക ജിഎസ്ടി ഈടാക്കും. ഫിസിക്കൽ സ്വർണ്ണം 24 മാസം വരെ കൈവശം വെക്കുകയാണെങ്കിൽ, ഹ്രസ്വകാല മൂലധന നേട്ട നികുതി സ്ലാബ് നിരക്കുകൾ പ്രകാരം ഈടാക്കും. 24 മാസത്തിൽ കൂടുതൽ കൈവശം വെക്കുകയാണെങ്കിൽ ദീർഘകാല മൂലധന നേട്ട നികുതി 12.5% നിരക്കിൽ ഇൻഡെക്സേഷൻ ആനുകൂല്യങ്ങളില്ലാതെയായിരിക്കും കണക്കാക്കുക.

സ്വർണ വില ഉയർന്നതോടെ ഡിജിറ്റൽ ഗോൾഡ്, വെള്ളി എന്നിവയ്ക്ക് പ്രിയമേറിയിട്ടുണ്ട്. ഇവയ്ക്കും ഫിസിക്കൽ സ്വർണ്ണത്തിന് സമാനമായിരിക്കും നികുതി. എന്നാൽ, ഡിജിറ്റൽ രൂപത്തിലുള്ളതിനാൽ നിർമ്മാണ കൂലിക്ക് അഞ്ച് ശതമാനം ജിഎസ്ടി ഉണ്ടാകില്ല.

ഗോൾഡ്, സിൽവർ ഇടിഎഫ് ഫണ്ടുകൾ 12 മാസം വരെ കൈവശം വെക്കുകയാണെങ്കിൽ, അതിൽ നിന്നുള്ള നേട്ടങ്ങൾക്ക് സ്ലാബ് നിരക്കിൽ നികുതി ഈടാക്കും. 12 മാസത്തിൽ കൂടുതലാണെങ്കിൽ 12.5% നികുതി ഇൻഡെക്സേഷൻ ആനുകൂല്യങ്ങൾ ഉണ്ടാകില്ല.ഗോൾഡ് അല്ലെങ്കിൽ സിൽവർ മ്യൂച്വൽ ഫണ്ടാണെങ്കിൽ 24 മാസം വരെ കൈവശം വെക്കുമ്പോൾ നേട്ടങ്ങൾക്ക് സ്ലാബ് നിരക്കിൽ നികുതി ചുമത്തും. 24 മാസത്തിൽ കൂടുതൽ കൈവശം വെച്ചാൽ ഇൻഡെക്സേഷൻ ഇല്ലാതെ 12.5% നിരക്കിൽ നികുതി നൽകണം.

എസ്ജിബി നിക്ഷേപ തുകക്ക് ലഭിക്കുന്ന 2.5% പലിശക്ക് സ്ലാബ് നിരക്കിൽ നികുതി ബാധകമാണ്. 12 മാസത്തിനുള്ളിൽ വിൽക്കുകയാണെങ്കിൽ സ്ലാബ് നിരക്കിലാണ് നികുതി. കൈവശം വെക്കുന്ന കാലയളവ് 12 മാസത്തിന് ശേഷവും എട്ട് വർഷത്തെ കാലാവധി പൂർത്തിയാകുന്നതിന് മുമ്പുമാണെങ്കിൽ ഇൻഡെക്സേഷൻ ആനുകൂല്യങ്ങളില്ലാതെ 12.5% നികുതി നൽകണം.

എസ്ജിബികൾ കാലാവധി പൂർത്തിയാകുന്നതുവരെ കൈവശം വെക്കുമ്പോൾ ലഭിക്കുന്ന മൂലധന നേട്ടങ്ങൾക്ക് നിലവിൽ നികുതിയില്ല. സെക്കൻഡറി മാർക്കറ്റിൽ നിന്ന് വാങ്ങുന്ന എസ്ജിബികൾക്കും നികുതി ഇല്ലായിരുന്നു. എന്നാൽ പുതിയ ബജറ്റ് പ്രഖ്യാപനത്തോടെ ഈ ഇളവ് ഇനി മുതൽ ബോണ്ടുകൾ ഇഷ്യു ചെയ്യുന്ന സമയത്ത് സബ്‌സ്‌ക്രൈബ് ചെയ്യുകയും കാലാവധി പൂർത്തിയാകുന്നതുവരെ കൈവശം വെക്കുകയും ചെയ്യുന്ന യഥാർത്ഥ വരിക്കാർക്ക് മാത്രമായിരിക്കും.

ബന്ധുക്കളിൽ നിന്ന് സമ്മാനമായി ലഭിക്കുന്ന സ്വർണ്ണത്തിനും വെള്ളിയിലും ലഭിക്കുന്ന സമയത്ത് നികുതിയില്ല. പാരമ്പര്യമായി ലഭിക്കുന്ന സ്വർണത്തിനും നിലവിൽ നികുതിയില്ല. എന്നാൽ,പാരമ്പര്യമായി ലഭിച്ച സ്വർണ്ണമോ വെള്ളിയോ വിൽക്കുകയാണെങ്കിൽ, മൂലധന നേട്ടം കണക്കാക്കുന്നത് യഥാർത്ഥ ഉടമ വാങ്ങിയ വില ഉപയോഗിച്ചാണ്. കൂടാതെ, കൈവശം വെക്കുന്ന കാലയളവിൽ മുൻ ഉടമ ഈ ആസ്തി എത്രകാലം കൈവശം വെച്ചുവെന്നത് കൂടി പരിഗണിക്കും.