സ്വർണ്ണം പോകുന്ന വഴി അറിയില്ല: ആ പരസ്യം നാട്ടിലെങ്ങും കാണുന്നുണ്ടോ? എങ്കില്‍ സൂക്ഷിച്ചോ

Updated: Saturday, September 27, 2025, 9:40 [IST]

വില കുത്തനെ ഉയർന്നതോടെ നമ്മുടെ നാട്ടില്‍ സ്വർണം പണയം വെക്കുന്നവരുടെ എണ്ണത്തില്‍ വലിയ വർധനവാണ് ഉണ്ടായിരിക്കുന്നതെന്നാണ് കണക്കുകള്‍ വ്യക്തമാക്കുന്നത്. സാഹചര്യം മുതലെടുത്ത് ഈ മേഖലയുമായി ബന്ധപ്പെട്ട് നിരവധി തട്ടിപ്പ് സംഘങ്ങളും സജീവമായിട്ടുണ്ട്. പണയം വെച്ച സ്വർണം എടുത്ത് വിൽക്കാൻ സഹായിക്കുമെന്ന വാഗ്ദാനങ്ങളുമായിട്ടാണ് ഇത്തരം സംഘങ്ങളുടെ പ്രവർത്തനം.

ഇത്തരത്തില്‍ ഉപഭോക്താക്കളെ വഞ്ചിക്കുന്ന തട്ടിപ്പ് സംഘങ്ങളെ അറസ്റ്റ് ചെയ്ത് നിയമത്തിന് മുന്നിൽ കൊണ്ടുവരണമെന്ന് ആവശ്യപ്പെട്ട് ഓൾ കേരള ഗോൾഡ് ആൻഡ് സിൽവർ മർച്ചന്റ്സ് അസോസിയേഷൻ (എ കെ ജി എസ് എം എ) സംസ്ഥാന കമ്മിറ്റിയും ഇപ്പോള്‍ രംഗത്ത് വന്നിരിക്കുകയാണ്. കേരളത്തിലുടനീളം ഫോൺ നമ്പറുകൾ സഹിതമുള്ള പോസ്റ്ററുകൾ ഒട്ടിച്ച് പഴയ സ്വർണം വാങ്ങുമെന്നും പണയപ്പെടുത്തിയ വസ്തുക്കൾ തിരിച്ചെടുത്ത് വിൽക്കാൻ സഹായിക്കുമെന്നും അവകാശപ്പെട്ട് പ്രവർത്തിക്കുന്ന ഇത്തരം സംഘങ്ങൾ സ്വർണ വ്യാപാര മേഖലയുടെ വിശ്വാസ്യതയെ തകർക്കുന്നുവെന്ന് അസോസിയേഷൻ ചൂണ്ടിക്കാട്ടുന്നു.

കടകളില്ലാതെയും ജിഎസ്ടി രജിസ്ട്രേഷനില്ലാതെയും ഫോൺ നമ്പർ മാത്രം നൽകി അദൃശ്യമായി പ്രവർത്തിക്കുന്ന ഈ തട്ടിപ്പുകാർക്ക് പിന്നിൽ മോഷണ സംഘങ്ങളും മറ്റ് സംസ്ഥാനങ്ങളിൽ നിന്നുള്ള ക്രിമിനലുകളും ഉണ്ടെന്നാണ് അസോസിയേഷന്റെ ആരോപണം. സ്വർണം അനധികൃതമായി ശുദ്ധീകരിക്കുന്നവർക്കും പഴയ സ്വർണം വാങ്ങി പുതിയത് വ്യാപാരം ചെയ്യുന്നവർക്കുമെതിരെ സർക്കാർ ശക്തമായ നടപടികൾ സ്വീകരിക്കണമെന്നും അസോസിയേഷൻ ആവശ്യപ്പെട്ടു. സ്വർണ പണയശാലകളും സ്വകാര്യ ബാങ്കുകളും സ്വർണം വാങ്ങി വിൽക്കുന്നത് നിയമവിരുദ്ധമാണെന്നും അസോസിയേഷന്‍ ഓർമ്മിപ്പിക്കുന്നു.

സ്വർണ വിലയിലുണ്ടായ വൻ വർധനവ് കാരണം സ്വർണ മോഷണങ്ങൾ വ്യാപകമാകുന്ന സാഹചര്യത്തിൽ ഉപഭോക്താക്കളും വ്യാപാരികളും ജാഗ്രത പാലിക്കണമെന്ന് അസോസിയേഷൻ യോഗം ആവശ്യപ്പെട്ടു. "കേരളത്തിലെ സ്വർണ വ്യാപാരത്തിന്റെ പ്രതിച്ഛായയെ ഇത്തരം തട്ടിപ്പുകൾ തകർക്കുന്നു. സർക്കാരും പൊലീസും ഉടൻ ഇടപെടണം," അസോസിയേഷൻ ഭാരവാഹികൾ പറഞ്ഞു.

സ്വർണം പണയം വെക്കുമ്പോൾ ശ്രദ്ധിക്കേണ്ട കാര്യങ്ങൾ
സ്വർണ തട്ടിപ്പുകളുടെ പശ്ചാത്തലത്തിൽ, പണയം വെക്കുന്നവർ ചില മുൻകരുതലുകൾ സ്വീകരിക്കേണ്ടത് അത്യാവശ്യമാണ്. അത്തരത്തിലുള്ള ഏതാനും നിർദേശങ്ങള്‍ ഇവയാണ്

ലൈസൻസുള്ള സ്ഥാപനങ്ങൾ തിരഞ്ഞെടുക്കുക: പണയം വെക്കുന്നത് റിസർവ് ബാങ്ക് ഓഫ് ഇന്ത്യ (ആർ ബി ഐ) അംഗീകൃത ബാങ്കുകളിലോ ലൈസൻസുള്ള നോൺ-ബാങ്കിങ് ഫിനാൻഷ്യൽ കമ്പനികളിലോ (എൻ ബി എഫ് MF) മാത്രം. പോസ്റ്ററുകളിലോ ഫോൺ കോളുകളിലോ വരുന്ന അജ്ഞാത ഓഫറുകൾ ഒഴിവാക്കുക.

പലിശ നിരക്കും നിബന്ധനകൾ പരിശോധിക്കുക: പണയത്തിന്റെ പലിശ നിരക്ക്, കാലാവധി, ഫീസുകൾ എന്നിവ വ്യക്തമായി രേഖപ്പെടുത്തിയ ഒപ്പം സ്വീകരിക്കുക. അമിതമായ പലിശ വാഗ്ദാനം ചെയ്യുന്നവരോട് സംശയിക്കുക.

രേഖകൾ സൂക്ഷിക്കുക: സ്വർണത്തിന്റെ ശുദ്ധത, ഭാരം, മൂല്യം എന്നിവ സാക്ഷ്യപ്പെടുത്തിയ രേഖകൾ (ഹാൾമാർക്ക് സർട്ടിഫിക്കറ്റ്) ആവശ്യപ്പെടുക. പണയ രസീത്, ഐഡി പ്രൂഫ് എന്നിവ സൂക്ഷിക്കുക.

അനധികൃത വിൽപ്പന ഒഴിവാക്കുക: പണയം വെച്ച സ്വർണം തിരിച്ചെടുത്ത് വിൽക്കാൻ സഹായിക്കുമെന്ന വാഗ്ദാനങ്ങൾ തട്ടിപ്പാകാം. ഇത്തരം റാക്കറ്റുകൾ മോഷ്ടിച്ച സ്വർണം കൈകാര്യം ചെയ്യുന്നതാകാം.

ജാഗ്രതയോടെ പ്രവർത്തിക്കുക: സ്വർണ വില ഉയർന്നിരിക്കുന്നതിനാൽ മോഷണ സാധ്യത കൂടുതലാണ്. അജ്ഞാത ഫോൺ നമ്പറുകളിൽ നിന്നുള്ള കോളുകൾ റിപ്പോർട്ട് ചെയ്യുകയും പൊലീസിനെ അറിയിക്കുകയും ചെയ്യുക.

അതേസമയം തങ്ങളുടെ ആവശ്യങ്ങൾ ഉന്നയിച്ചുകൊണ്ട് അസോസിയേഷൻ സംസ്ഥാന സർക്കാരിനും പൊലീസിനും നിവേദനം നൽകുമെന്ന് ഭാരവാഹികൾ അറിയിച്ചു. സ്വർണ വ്യാപാര മേഖലയെ സംരക്ഷിക്കുന്നതിനായി കൂടുതൽ ജാഗ്രതാ നടപടികൾ സ്വീകരിക്കുമെന്നും സംഘടന ഭാരവാഹികള്‍ വ്യക്തമാക്കി.