സ്വർണം പിങ്ക് പേപ്പറുകളിൽ പൊതിയുന്നതിന് പിന്നിലുള്ള 'സീക്രട്ട്' ഇതാണ്; വിദഗ്ധർ പറയുന്നു

ഇന്ത്യയിൽ സ്വർണ്ണാഭരണങ്ങൾ വാങ്ങുമ്പോൾ ആഭരണങ്ങൾ തിളക്കമുള്ള പിങ്ക് പേപ്പറിൽ പൊതിഞ്ഞ് പെട്ടിയിലാക്കി നൽകുന്നത് വർഷങ്ങളായുള്ള പതിവാണ്. വെറുമൊരു ഭംഗിക്കായല്ല, ഇതിന് പിന്നിൽ പ്രായോഗികവും സാംസ്കാരികവും മാനസികവുമായ നിരവധി കാരണങ്ങളുണ്ടെന്ന് വിദഗ്ധർ പറയുന്നു.

ആഭരണങ്ങൾ പൊതിയാൻ ഉപയോഗിക്കുന്ന പിങ്ക് പേപ്പറുകളിൽ ചെറിയ ആന്റി-ടാർണിഷ് പൂശിയിട്ടുണ്ടാകും. ഇത് വായുവും ഈർപ്പവും നേരിട്ട് തട്ടുന്നത് കുറയ്ക്കുകയും ആഭരണങ്ങളുടെ തിളക്കം മങ്ങാതിരിക്കാൻ സഹായിക്കുകയും ചെയ്യുന്നു. പ്രത്യേകിച്ച് വെള്ളിയോ ചെമ്പോ ചേർത്ത് നിർമ്മിക്കുന്ന സ്വർണ്ണാഭരണങ്ങൾക്ക് ഇത് കൂടുതൽ സംരക്ഷണം നൽകുന്നുവെന്നാണ് വിദഗ്ധരുടെ വിശദീകരണം.

കൂടാതെ സംഭരണ സമയത്തും കൈകാര്യം ചെയ്യുമ്പോഴും പൊടി, ഈർപ്പം, ചെറിയ പോറലുകൾ എന്നിവയിൽ നിന്ന് ഇവ ആഭരണങ്ങളെ സംരക്ഷിക്കും. ആഭരണങ്ങൾ തമ്മിൽ ഉരസുന്നതും അതുവഴി ഉപരിതലത്തിൽ കേടുപാടുകൾ സംഭവിക്കുന്നതും ഇത് തടയും.

ആധുനിക ആഡംബര പാക്കേജിംഗ് നിലവിൽ വരുന്നതിന് മുമ്പ് മുതൽ തന്നെ ആഭരണ വ്യാപാരികൾ ഇത്തരത്തിലുള്ള ലളിതവും പ്രായോഗികവുമായ പൊതിയൽ രീതികളാണ് ഉപയോഗിച്ചിരുന്നത്. ആഭരണങ്ങൾ സുരക്ഷിതമായി സൂക്ഷിക്കാനും കൊണ്ടുപോകാനുമുള്ള ഏറ്റവും ലളിതമായ മാർഗമായിരുന്നു ഇത്.

പിങ്ക് നിറം തിരഞ്ഞെടുക്കപ്പെട്ടതും യാദൃശ്ചികമല്ലെന്നാണ് വിദഗ്ധർ പറയുന്നത്. സ്വർണ്ണത്തിന്റെ മഞ്ഞ നിറത്തിന് കൂടുതൽ പകിട്ടും സമ്പന്നതയും നൽകുന്ന കോൺട്രാസ്റ്റാണ് പിങ്ക് നിറം . അതിനാലാണ് പിങ്ക് പേപ്പറിന് മുകളിൽ വച്ചാൽ ആഭരണങ്ങൾ കൂടുതൽ തിളക്കമുള്ളതും ആകർഷകവുമായി അനുഭവപ്പെടുന്നത്.ഈ ചെറിയ ദൃശ്യ തന്ത്രം ഉപഭോക്താക്കളെ മാനസികമായും സ്വാധീനിക്കുമെന്ന് വിദഗ്ധർ ചൂണ്ടിക്കാട്ടുന്നു. ആഭരണങ്ങളുടെ മൂല്യവും ഭംഗിയും കൂടുതൽ ഉയർത്തിക്കാട്ടാൻ ഇതിലൂടെ സാധിക്കുമെന്ന് അവർ പറയുന്നു.

അതേസമയം, പിങ്ക് പേപ്പറിന്റെ ഉപയോഗം വെറും പ്രായോഗികതയിൽ ഒതുങ്ങുന്നതല്ലെന്നും ഇത് ഇന്ത്യയിലെ സാംസ്കാരിക പാരമ്പര്യത്തിന്റെ ഭാഗമായും മാറിയിട്ടുണ്ടെന്നും വിദഗ്ധർ പറയുന്നു. പിങ്ക്, ചുവപ്പ് തുടങ്ങിയ നിറങ്ങൾ സമൃദ്ധിയുടെയും ആഘോഷങ്ങളുടെയും ശുഭകാര്യങ്ങളുടെയും പ്രതീകമായാണ് ഇന്ത്യയിലെ പല സമൂഹങ്ങളും കാണുന്നത്. പ്രത്യേകിച്ച് വിവാഹങ്ങൾക്ക് സമ്മാനങ്ങളുമൊക്കെ നൽകുമ്പോൾ ഈ നിറങ്ങൾക്ക് വലിയ പ്രാധാന്യമുണ്ട്.

കാലക്രമേണ ഈ ലളിതമായ പൊതിയൽ രീതി ആഭരണങ്ങളുടെ വിശ്വാസ്യതയുടെയും ആധികാരികതയുടെയും പ്രതീകമായി മാറി. ഇന്നും നിരവധി ജ്വല്ലറികൾ ഈ പാരമ്പര്യം തുടരുന്നതും അതുകൊണ്ടുതന്നെയാണ്. അതേസമയം, പുതിയ കാലഘട്ടത്തിൽ പാക്കേജിംഗ് രീതികളിൽ മാറ്റം വന്നുകൊണ്ടിരിക്കുകയാണെന്നും വിദഗ്ധർ ചൂണ്ടിക്കാട്ടുന്നു. പാരമ്പര്യത്തിന്റെ സാരാംശം നിലനിർത്തിക്കൊണ്ട് കൂടുതൽ ആഡംബരവും ഡിസൈൻ അധിഷ്ഠിതവുമായ പാക്കേജിംഗിലേക്കാണ് ഇപ്പോൾ വിപണി മാറുന്നത്.