പാടം നികത്തൽ തടഞ്ഞവർക്ക് ഗുണ്ടകളുടെ മർദനം!! പ്രതികളെ പിടിക്കാതെ പോലീസ്!!
പെരുമ്പാവൂർ ഇടവൂർ കൊടുവേലിത്തുറയിൽ പാടം നികത്തി അരിമില്ല് തുടങ്ങാനുള്ള സ്വകാര്യ ഗ്രൂപ്പിന്റെ ശ്രമത്തിനെതിരെയാണ് നാട്ടുകാരുടെ പ്രതിഷേധം നടക്കുന്നത്.
കൊച്ചി: പെരുമ്പാവൂരിൽ പാടം നികത്തി അരിമില്ല് നിർമ്മിക്കാൻ നടത്തിയ ശ്രമം തടഞ്ഞ നാട്ടുകാർക്ക് ഗുണ്ടകളുടെ മർദനം. സംഭവത്തിൽ പോലീസിൽ പരാതി നൽകിയിട്ടും പോലീസ് പ്രതികളെ പിടിക്കുന്നില്ലെന്നാണ് ആരോപണം.
സ്ത്രീകളടക്കമുള്ളവർക്ക് നേരെയാണ് മർദനം ഉണ്ടായത്. സംഭവം നടന്ന് ദിവസങ്ങൾ പിന്നിട്ടിട്ടും ഒരു കേസെടുത്തതല്ലാതെ പ്രതികളെ കണ്ടെത്താൻ പോലീസ് ശ്രമിക്കുന്നില്ലെന്നാണ് നാട്ടുകാർ പറയുന്നത്.
പെരുമ്പാവൂർ ഇടവൂർ കൊടുവേലിത്തുറയിൽ പാടം നികത്തി അരിമില്ല് തുടങ്ങാനുള്ള സ്വകാര്യ ഗ്രൂപ്പിന്റെ ശ്രമത്തിനെതിരെയാണ് നാട്ടുകാരുടെ പ്രതിഷേധം നടക്കുന്നത്.കഴിഞ്ഞ ഞായറാഴ്ച പാടം നികത്താൻ മണ്ണുമായെത്തിയ ലോറി നാട്ടുകാർ തടയുകയായിരുന്നു. ഈ സമരത്തിൽ പങ്കെടുത്ത നാട്ടുകാരെയാണ് ഗുണ്ടകളെ വിട്ട് മർദിച്ചത്.
മര്ദനമേറ്റ പലരും ഇപ്പോഴും ആശുപത്രിയിൽ ചികിത്സയിലാണ്. മർദിച്ചവരെ കുറിച്ച് വ്യക്തമായ വിവരം പോലീസിന് നൽകിയെന്നാണ് നാട്ടുകാർ പറയുന്നത്. എന്നിട്ടും ഇവരെ അറസ്റ്റ് ചെയ്യാൻ പോലീസ് തയ്യാറാകുന്നില്ലെന്ന് നാട്ടുകാർ പറയുന്നു. പോലീസ് അനാസ്ഥയ്ക്കെതിരെ സമരം നടത്താനാണ് നാട്ടുകാരുടെ തീരുമാനം.