പട്ടാപകൽ അരുംകൊല; കൊല്ലത്ത് ഗുണ്ടാനേതാവിനെ നടുറോഡിൽ വെട്ടി കൊന്നു

കൊല്ലം നഗരത്തെ നടുക്കി വീണ്ടും ഗുണ്ടാപ്പക. നഗരത്തിലെ കുപ്രസിദ്ധ ഗുണ്ടാ നേതാവും ജിം സന്തോഷ് വധക്കേസിലെ ഒന്നാം പ്രതിയുമായ'അലുവ അതുൽ' എന്ന യുവാവാണ് ശനിയാഴ്ച പട്ടാപ്പകൽ വെട്ടേറ്റ് മരിച്ചത്. കൊലക്കേസിൽ ജാമ്യത്തിലിറങ്ങിയ ഇയാൾ പോലീസ് സ്റ്റേഷനിൽ ഒപ്പിട്ട ശേഷം മടങ്ങുന്നതിനിടെയാണ് നാടിനെ നടുക്കിയ അരുംകൊല അരങ്ങേറിയത്. ഗുണ്ടാ സംഘങ്ങൾ തമ്മിലുള്ള കുടിപ്പകയാണ് കൊലപാതകത്തിന് പിന്നിലെന്നാണ് പ്രാഥമിക നിഗമനം.

ആക്രമണം സിനിമ സ്റ്റൈലിൽ

കരുനാഗപ്പള്ളി പുതിയകാവിലെ ദേശീയപാതയ്ക്ക് സമീപമായിരുന്നു സംഭവം. അതുൽ സഞ്ചരിച്ചിരുന്ന കാറിനെ മറ്റൊരു വാഹനത്തിൽ പിന്തുടർന്നെത്തിയ ആറംഗ ഗുണ്ടാസംഘമാണ് ആക്രമണം നടത്തിയത്. ദേശീയപാത നിർമ്മാണത്തിനായി എടുത്ത വലിയ താഴ്ചയുള്ള കുഴിയിലേക്ക് അതുൽ സഞ്ചരിച്ച കാറിനെ ഇടിച്ചു വീഴ്ത്തുകയായിരുന്നു. കാർ കുഴിയിലേക്ക് മറിഞ്ഞതോടെ പുറത്തിറങ്ങാൻ കഴിയാതെ കുടുങ്ങിയ അതുലിനെ സംഘം ക്രൂരമായി വെട്ടിക്കൊലപ്പെടുത്തി. പട്ടാപ്പകൽ ജനങ്ങൾ നോക്കിനിൽക്കെയായിരുന്നു ഈ ക്രൂരകൃത്യം നടന്നത്.

ജിം സന്തോഷ് വധക്കേസിലെ പ്രതികാരം?

കൊല്ലം നഗരത്തെ നടുക്കിയ ജിം സന്തോഷ് വധക്കേസിലെ മുഖ്യ പ്രതിയായിരുന്നു കൊല്ലപ്പെട്ട അതുൽ. ഈ കേസുമായി ബന്ധപ്പെട്ട് അറസ്റ്റിലായിരുന്ന ഇയാൾ അടുത്തിടെയാണ് ജാമ്യത്തിലിറങ്ങിയത്. ജാമ്യവ്യവസ്ഥയുടെ ഭാഗമായി സ്റ്റേഷനിൽ ഒപ്പിടാൻ എത്തിയപ്പോഴാണ് എതിർ സംഘം ഇയാളെ ലക്ഷ്യമിട്ടത്. കൃത്യമായ പ്ലാനിംഗിലൂടെയാണ് കൊലപാതകം നടന്നിരിക്കുന്നത്. ആക്രമണത്തിന്റെ സിസിടിവി ദൃശ്യങ്ങൾ പോലീസിന് ലഭിച്ചിട്ടുണ്ട്. കാർ പിന്തുടരുന്നതും ഇടിച്ചു വീഴ്ത്തുന്നതും ദൃശ്യങ്ങളിൽ വ്യക്തമാണ്.

കൊല്ലം ജില്ലയുടെ വിവിധ ഭാഗങ്ങളിൽ ഗുണ്ടാ സംഘങ്ങൾ തമ്മിലുള്ള ഏറ്റുമുട്ടലുകൾ പതിവാകുന്നത് ജനങ്ങളെ ഭീതിയിലാഴ്ത്തുന്നുണ്ട്. പോലീസ് സ്റ്റേഷനുകളിൽ ഒപ്പിടാൻ എത്തുന്ന പ്രതികളെ ലക്ഷ്യമിട്ട് ആക്രമണങ്ങൾ നടക്കുന്നത് പോലീസിനും വലിയ വെല്ലുവിളിയാണ്. പ്രതികൾക്കായി കരുനാഗപ്പള്ളി പോലീസ് അന്വേഷണം ഊർജ്ജിതമാക്കിയിട്ടുണ്ട്. അക്രമികൾ തമിഴ്‌നാട് ഭാഗത്തേക്ക് കടക്കാൻ സാധ്യതയുള്ളതിനാൽ അതിർത്തി കേന്ദ്രീകരിച്ചും പരിശോധന നടക്കുന്നു.

കൊല്ലപ്പെട്ട അതുലിന്റെ മൃതദേഹം ഇൻക്വസ്റ്റ് നടപടികൾക്ക് ശേഷം ജില്ലാ ആശുപത്രി മോർച്ചറിയിലേക്ക് മാറ്റി. പ്രതികളെ ഉടൻ പിടികൂടുമെന്നും നഗരത്തിൽ സുരക്ഷാ നടപടികൾ കർശനമാക്കുമെന്നും സിറ്റി പോലീസ് അറിയിച്ചു.