കെഎം ഷാജി അയോഗ്യന് തന്നെ; ഷാജിയെ അയോഗ്യനാക്കി ഹൈക്കോടതിയുടെ രണ്ടാം ഉത്തരവ്
കൊച്ചി: അഴിക്കോട് എംഎല്എയായിരുന്ന കെഎം ഷാജിയെ എംഎല്എ സ്ഥാനത്തുനിന്ന് അയോഗ്യനാക്കി വീണ്ടും ഹൈക്കൊടി ഉത്തവ്. ആദ്യ ഉത്തരവ് പോലെ തന്നെ ആറുവര്ഷത്തേക്കാണ് പുതിയ ഉത്തരിവിലും ഷാജിക്ക് അയോഗ്യത കല്പ്പിച്ചിരിക്കുന്നത്. അഴീക്കോട് മണ്ഡലത്തിലുള്ള സിപിഎം പ്രവര്ത്തകന് ബാലന് നല്കിയ ഹര്ജിയിലാണ് രണ്ടാം ഉത്തരവ്.
ജസ്റ്റിസ് പിഡി രാജന്റേതാണ് ഉത്തരവ്. എതിര്സ്ഥാനാര്ത്ഥിയായിരുന്ന എംവി നികേഷ് കുമാര് നല്കിയ പരാതിയില് ഇതേ ബെഞ്ച് കെഎം ഷാജിയെ നേരത്തെ അയോഗ്യനാക്കിയിരുന്നു. കെഎം ഷാജിയെ വീണ്ടും അയോഗ്യനാക്കിയതോടെ ആറ് മാസങ്ങള്ക്കുള്ളില് തന്നെ അഴീക്കോട് തിരഞ്ഞെടുപ്പ് നടത്തേണ്ടി വരും. നേരത്തെയുള്ള കോടതി വിധിക്കെതിരെ ഷാജി സുപ്രീംകോടതിയില് ഹര്ജി നല്കിയിട്ടുണ്ട്.
ആദ്യ ഹര്ജിയിലെ വാദത്തിനിടെ കോടതിയെ തെറ്റിദ്ധരിപ്പിച്ചെന്ന് ആരോപിച്ച് വളപട്ടണത്തെ മുന് എസ്ഐക്കെതിരെ കെഎം ഷാജി നല്കിയ ഹര്ജി ഹൈക്കോടതി നാളെ പരിഗണിക്കും. അയോഗ്യത കല്പിക്കാന് ഇടയായ വര്ഗീയ പരാമര്ശമുള്ള നോട്ടീസ് യുഡിഎഫ് കേന്ദ്രത്തില് നിന്ന് പിടിച്ചെടുത്തു എന്നായിരുന്നു എസ്ഐയുടെ മൊഴി. എന്നാല് പിറ്റേന്ന് സിപിഎം പ്രവര്ത്തകന് പോലീസ് സ്റ്റേഷനില് എത്തിച്ചുനല്കിയതാണിതെന്ന് ആരോപിച്ചാണ് ഷാജിയുടെ ഹര്ജി.