കനത്ത മഴ; നാളെ അവധി അഞ്ച് ജില്ലകളില്: പരീക്ഷകള്ക്ക് മാറ്റമില്ല: അലര്ട്ടുകളിലും മാറ്റം
കാസര്കോഡ്: കനത്ത മഴയുടെ പശ്ചാത്തലത്തില് നാളെ (ജൂലൈ 17) വിദ്യാഭ്യാസ സ്ഥാപനങ്ങള്ക്ക് അവധി പ്രഖ്യാപിച്ചു. കാസര്കോഡ്, കണ്ണൂര്, കോഴിക്കോട്, വയനാട്, തൃശൂര് ജില്ലകളിലെ എല്ലാ വിദ്യാഭ്യാസ സ്ഥാപനങ്ങള്ക്കുമാണ് ജില്ലാ കലക്ടര് അവധി പ്രഖ്യാപിച്ചത്. കനത്ത മഴ തുടരുന്നതിനാല് താഴ്ന്ന പ്രദേശങ്ങള് വെള്ളം കയറിയ നിലയിലാണ്. പ്രധാന നദികള് കരകവിഞ്ഞൊഴുകുകയും ചെയ്യുന്ന സാഹചര്യത്തിലാണ് സുരക്ഷ മുന്നിര്ത്തി അവധി പ്രഖ്യാപിച്ചത്.
കാസര്കോഡ് സ്കൂളുകള്, കോളജുകള്, പ്രൊഫഷണല് കോളജുകള്, കേന്ദ്രീയ വിദ്യാലയങ്ങള്, ട്യൂഷന് സെന്ററുകള്, മദ്രസകള്, അങ്കണവാടികള്, സ്പെഷ്യല് ക്ലാസുകള് എന്നിവയ്ക്ക് അവധി ബാധകമാണ്. മുന് നിശ്ചയിച്ച പരീക്ഷകള് (പ്രൊഫഷണല്, സര്വകലാശാല, മറ്റു വകുപ്പ് പരീക്ഷകള് ഉള്പ്പെടെ) സാധാരണ പോലെ നടക്കുമെന്നും ജില്ലാ കലക്ടറുടെ അറിയിപ്പില് ഉണ്ട്. പരീക്ഷാ സമയങ്ങളിലും മാറ്റം ഉണ്ടാകില്ല.
കണ്ണൂരിലും കോഴിക്കോടും സ്കൂളുകള്ക്കു മാത്രമാണ് അവധി. സ്കൂളുകള്, അങ്കണവാടികള്, മതപഠന സ്ഥാപനങ്ങള്, ട്യൂഷന് സെന്ററുകള് എന്നിവക്കാണ് നാളെ അവധിയുള്ളത്. മുന്കൂട്ടി നിശ്ചയിച്ച പരീക്ഷകള്ക്ക് മാറ്റം ഉണ്ടായിരിക്കില്ല.
തൃശൂര് ജില്ലയിലും വയനാടും ശക്തമായ മഴ തുടരുകയും ചെയ്യുന്ന സാഹചര്യത്തില് പ്രൊഫഷണല് കോളജുകള്, അങ്കണവാടികള്, നഴ്സറികള്, കേന്ദ്രീയ വിദ്യാലയങ്ങള്, സി.ബി.എസ്.ഇ, ഐ.സി.എസ്.ഇ സ്കൂളുകള്, ട്യൂഷന് സെന്ററുകള്, മദ്രസകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും അവധി പ്രഖ്യാപിച്ചു. മുന്കൂട്ടി നിശ്ചയിച്ച പരീക്ഷകള്ക്കും അഭിമുഖങ്ങള്ക്കും മാറ്റം ഉണ്ടായിരിക്കില്ല.
സംസ്ഥാനത്തെ മഴ മുന്നറിയിപ്പിലും മാറ്റം വന്നിട്ടുണ്ട്. രണ്ട് ജില്ലകളില് റെഡ് അലേര്ട്ടാണ്. കാസര്ഗോഡ്, കണ്ണൂര് ജില്ലകളിലാണ് റെഡ് അലേര്ട്ട് പ്രഖ്യാപിച്ചത്. 7 ജില്ലകളിലാണ് ഓറഞ്ച് അലേര്ട്ട് പ്രഖ്യാപിച്ചിരിക്കുന്നത്. ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് ജില്ലകളിലാണ് ഓറഞ്ച് അലേര്ട്ട് പ്രഖ്യാപിച്ചിരിക്കുന്നത്. ഇവിടങ്ങളില് വരും മണിക്കൂറുകളില് അതിശക്തമായ മഴയ്ക്ക് സാധ്യതയുണ്ടെന്നാണ് കാലാവസ്ഥ വകുപ്പിന്റെ പ്രവചനം. അഞ്ച് ജില്ലകളിലാണ് നേരത്തെ ഓറഞ്ച് അലേര്ട്ട് പ്രഖ്യാപിച്ചിരുന്നത്.
അതേസമയം തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം എന്നീ ജില്ലകളില് യെല്ലോ അലേര്ട്ടാണ് പ്രഖ്യാപിച്ചിരിക്കുന്നത്. ഒറ്റപ്പെട്ടയിടങ്ങളില് അതിശക്തമായ മഴയ്ക്കുള്ള സാധ്യതയാണ് ഓറഞ്ച് അലര്ട്ട് കൊണ്ട് ഉദ്ദേശിക്കുന്നത്. അതായത് 24 മണിക്കൂറില് 115.6 മില്ലിമീറ്റര് മുതല് 204.4 മില്ലിമീറ്റര് വരെ മഴ ലഭിക്കാം. മഴയ്ക്ക് പുറമെ ശക്തമായ കാറ്റും കാലാവസ്ഥാ നിരീക്ഷണ കേന്ദ്രം പ്രവചിക്കുന്നുണ്ട്.
പൊതുജനങ്ങള് ജാഗ്രത പാലിക്കണമെന്ന് അധികൃതര് നിര്ദേശം നല്കി. മണ്ണിടിച്ചില്, ഉരുള്പൊട്ടല്, താഴ്ന്ന പ്രദേശങ്ങളില് വെള്ളപ്പൊക്കം എന്നിവയ്ക്ക് സാധ്യതയുള്ളതിനാല് ജനങ്ങള് സുരക്ഷിത സ്ഥാനങ്ങളിലേക്ക് മാറണം. ആവശ്യമെങ്കില് ദുരിതാശ്വാസ ക്യാമ്പുകള് സജ്ജമാക്കാന് തദ്ദേശ സ്വയംഭരണ സ്ഥാപനങ്ങള്ക്ക് നിര്ദേശം നല്കിയിട്ടുണ്ട്.
Click it and Unblock the Notifications
Sign in with Google