ഒമ്പത് ജില്ലകളില് വെള്ളിയാഴ്ച അവധി പ്രഖ്യാപിച്ചു, പരീക്ഷകള് മാറ്റിവെച്ചു, റെഡ് അലര്ട്ട്
തിരുവനന്തപുരം: കനത്ത മഴകാരണം ഒമ്പത് ജില്ലകളില് വെള്ളിയാഴ്ച അവധി പ്രഖ്യാപിച്ചു. കണ്ണൂര്, കോഴിക്കോട്, മലപ്പുറം, എറണാകുളം, ഇടുക്കി, കോട്ടയം, പത്തനംതിട്ട, ആലപ്പുഴ, തൃശൂര്, ജില്ലകളിലാണ് അവധി. ഈ ജില്ലകളിലെ എല്ലാ വിദ്യാഭ്യാസ സ്ഥാപനങ്ങള്ക്കും അങ്കണവാടികള്ക്കും അവധിയായിരിക്കുമെന്ന് ജില്ലാ കളക്ടര്മാര് അറിയിച്ചു.
സര്വകലാശാല, പിഎസ്സി പരീക്ഷകള് മാറ്റിവെച്ചു. കണ്ണൂര്, കാലിക്കറ്റ്, എംജി സര്വകലാശാലകള് നടത്താനിരുന്ന പരീക്ഷകള് മാറ്റിവച്ചിട്ടുണ്ട്. പുതുക്കിയ തിയ്യതി പിന്നീട് അറിയിക്കും. വെള്ളിയാഴ്ച നടത്താന് നിശ്ചയിച്ച പിഎസ്സി പരീക്ഷകള് ഈ മാസം 30ലേക്ക് മാറ്റി.
കനത്ത മഴ തുടരുന്ന സാഹചര്യത്തില് അതീവ ജാഗ്രത പാലിക്കാന് സര്ക്കാര് നിര്ദേശം നല്കി. ദേശീയ ദുരന്തനിവാരണ സേനയെ നിലമ്പൂരിലേക്കും ഇടുക്കിയിലേക്കും അയച്ചു. സേനയുടെ പത്ത് യൂണിറ്റുകളെ കൂടി കേന്ദ്രസര്ക്കാരിനോട് ആവശ്യപ്പെടാന് തീരുമാനിച്ചിട്ടുണ്ട്. കോഴിക്കോട് പത്ത് ദുരിതാശ്വാസ ക്യാംപുകള് തുറന്നിട്ടുണ്ട്.
കണ്ണൂര്, വയനാട്, കോഴിക്കോട്, മലപ്പുറം, ഇടുക്കി ജില്ലകളില് വെള്ളപ്പൊക്കമാണ്. വയനാട്ടില് 60 സൈനികരെ വിന്യസിക്കാന് തീരുമാനിച്ചിട്ടുണ്ട്. കോഴിക്കോട്, വയനാട്, മലപ്പുറം, ഇടുക്കി ജില്ലകളില് വെള്ളിയാഴ്ച റെഡ് അലര്ട്ട് പ്രഖ്യാപിച്ചിട്ടുണ്ട്. കാസര്ഗോഡ്, കണ്ണൂര്, തൃശൂര്, പാലക്കാട്, എറണാകുളം ജില്ലികളില് ഓറഞ്ച് അലര്ട്ട് പ്രഖ്യാപിച്ചിരിക്കുകയാണ്. ആലപ്പുഴ, കോട്ടയം, പത്തനംതിട്ട ജില്ലകളില് യെല്ലോ അലര്ട്ടും പ്രഖ്യാപിച്ചു.
Click it and Unblock the Notifications
Sign in with Google