' സവർക്കർ എങ്ങനെയാണ് രാജ്യത്തിന്റെ ശത്രുവാകുന്നത്'; എസ്എഫ്ഐയുടെ ബാനറിനെതിരെ ​ഗവർണർ

കോഴിക്കോട്: കാലിക്കറ്റ് സർവകലാശാലയിൽ എസ് എഫ് ഐ മുൻപ് സ്ഥാപിച്ച വി ഡി സവർക്കർക്ക് എതിരായ ബാനറിൽ അ‍തൃപ്തി പ്രകടിപ്പിച്ച് ​ഗവർണർ രാജേന്ദ്ര വിശ്വനാഥ് അർലേക്ക. ഞങ്ങൾക്ക് ചാൻസിലറെയാണ് വേണ്ടത്. സവർക്കറെയല്ല ( We Need Chancellor, not Savarkar ) എന്ന ബാനറിലാണ് ​ഗവർണർ അതൃപ്തി പ്രകടിപ്പിച്ചത്. സവർക്കർ എങ്ങനെയാണ് രാജ്യത്തിന്റെ ശത്രുവാകുന്നതെന്നും ​ഗവർണർ ചോദിച്ചു.

' സർവകലാശാലയിലേക്ക് കയറിയപ്പോൾ ഒരു ബാനർ കണ്ടു, ഞങ്ങൾക്ക് ചാൻസലറെയാണ് വേണ്ടത്, സവർക്കറെയല്ല എന്നായിരുന്നു ബാനർ. എന്തുതരം ചിന്തയാണ് അത്? സവർക്കർ എങ്ങനെയാണ് രാജ്യത്തിന്റെ ശത്രുവാകുന്നത്? സവർക്കർ എന്താണ് ചെയ്തത്?

ശരിയായി പഠിച്ചാൽ കാര്യങ്ങൾ മനസ്സിലാകും. രാജ്യത്തിന് വേണ്ടി ത്യാ​ഗങ്ങൾ ചെയ്ത ആളാണ് സവർക്കർ. മറ്റുള്ളവർക്ക് വേണ്ടിയാണ് സവർക്കർ എല്ലാ കാലത്തും പ്രവർത്തിച്ചത്. വീടിനെക്കുറിച്ചോ, വീട്ടുകാരെക്കുറിച്ചോ അല്ല മറിച്ച് സമൂഹത്തെക്കുറിച്ചാണ് അദ്ദേഹം എല്ലാ കാലത്തും ചിന്തിച്ചത്,' ​ഗവർണർ പറഞ്ഞു.

ഇങ്ങനെയുള്ള ബാനറുകൾ എങ്ങനെയാണ് ക്യാമ്പസിൽ എത്തുന്നതെന്ന് ശ്രദ്ധിക്കണമെന്ന് വൈസ് ചാൻസിലർക്ക് അദ്ദേഹം നിർ​ദ്ദേശം നൽകി. ഇന്ന് ലോകം മുഴുവൻ ഇന്ത്യയെ ഉറ്റുനോക്കുകയാണ്. വിദ്യാഭ്യാസത്തിലൂടെ മാത്രമെ രാജ്യത്തിന് നേട്ടമുണ്ടാക്കാൻ സാധിക്കൂ. തൊഴിൽ ദാതാക്കള സൃഷ്ടിക്കാൻ നമുക്ക് കഴിയണമെന്നും അദ്ദേഹം പറഞ്ഞു.

' സേ നോ ടു ഡ്ര​ഗ്സ് ' എന്ന് ​​ഗവർണറുടെ വസ്ത്രത്തിൽ എഴുതിയിരുന്നു. ലഹരിക്കെതിരായ പോരാട്ടത്തിൽ സർക്കാരിനൊപ്പമാണ്. മുഖ്യമന്ത്രിയെ ഇക്കാര്യം അറിയിച്ചിട്ടുണ്ട്. നല്ല ഭാവിക്കായി യുവാക്കളെ ലഹരിയിൽ നിന്ന് രക്ഷിക്കേണ്ടതുണ്ട്. അതിനായി എല്ലാവരും മുന്നോട്ടിറങ്ങണമെന്നും അദ്ദേഹം പറഞ്ഞു.