സലീംരാജിന്റെ തട്ടിപ്പ് സിബിഐ അന്വേഷിക്കണം

കൊച്ചി:മുഖ്യമന്ത്രി ഉമ്മന്‍ ചാണ്ടിയുടെ മുന്‍ ഗണ്‍മാന്‍ സലീം രാജ് ഉള്‍പ്പെ ഭൂമി തട്ടിപ്പ് കേസ് സിബിഐ തന്നെ അന്വേഷിക്കണമെന്ന് കോടതി. രാഷ്ട്രീയ ഉന്നതരുടെ വന്‍ സംഘം തന്നെ തട്ടിപ്പിന് പിന്നില്‍ ഉണ്ടെന്നും പോലീസ് അന്വേഷണം മതിയാകില്ലെന്നും ഹൈക്കോടതി വിലയിരുത്തി.

സലീം രാജ് നടത്തിയ ഭൂമി തട്ടിപ്പ് കേസുകളില്‍ ഇതുവരെയുള്ള അന്വേഷണ വിവരങ്ങള്‍ ഹാജരാക്കാന്‍ കോടതി സര്‍ക്കാരിനോട് ആവശ്യപ്പെട്ടു. കളമശ്ശേരിയിലെ തട്ടിപ്പില്‍ പോലീസ് നടത്തുന്ന അന്വേഷണത്തില്‍ കോടതിക്ക് തൃപ്തിയില്ല. തിരുവനന്തപുരത്തെ കടകംപള്ളിയിലാണെങ്കില്‍ പോലീസ് കേസ് രജിസ്റ്റര്‍ ചെയ്തിട്ടുപോലും ഇല്ല.കോടതിയുടെ നിര്‍ദ്ദേശമുണ്ടെങ്കില്‍ കേസ് ഏറ്റെടുക്കാമെന്ന് സിബിഐയും അറിയിച്ചിട്ടുണ്ട്.

കോടിക്കണക്കിന് രൂപയുടെ തട്ടിപ്പാണ് രണ്ട് സ്ഥലങ്ങളിലുമായി സലീം രാജും കൂട്ടരും ചെയ്തത് എന്നാണ് കോടതി തന്നെ പറയുന്നത്. ഭൂമി ഇടപാടുകളുമായി ബന്ധപ്പെട്ട സിവില്‍ കേസുകള്‍ സിബിഐ അന്വേഷണത്തെ ബാധിക്കുമെന്ന് സിബിഐ അഭിഭാഷകന്‍ പറഞ്ഞെങ്കിലും കോടതി സമ്മതിച്ചില്ല. അഞ്ഞൂറ് കോടിയോളം രൂപയുടെ ഇടപാടാണ് നടന്നിരിക്കുന്നതെന്നും ഇത് പുറത്ത് കൊണ്ടുവരാന്‍ സിബിഐ തന്നെ വേണ്ടിവരുമെന്നും കോടതി നിരീക്ഷിച്ചു.

ഇത്രനാളും സലീം രാജിനെതിരെ അനുകൂല നിലപാട് സ്വീകരിച്ച് പോന്ന സംസ്ഥാന സര്‍ക്കാര്‍ ഇത്തവണ നിലപാട് മാറ്റിയിട്ടുണ്ട്. സിബിഐ അന്വേഷണം പ്രഖ്യാപിക്കുന്നതില്‍ എതിര്‍പ്പില്ലെന്ന് സര്‍ക്കാര്‍ കോടതിയെ അറിയിച്ചു. രമേശ് ചെന്നിത്തല ആഭ്യന്തരമന്ത്രിയായി ചുമതലയേറ്റ ഉടന്‍ തന്നെ സലീം രാജിന്റെ ഭൂമി തട്ടിപ്പ് കേസില്‍ വിട്ടുവീഴ്ച ചെയ്യില്ലെന്ന് വ്യക്തമാക്കിയിരുന്നു.

English summary

High Court suggest CBI prob in Salimraj's land fraud.