എംപി ആയാലും അഭിനയം തുടരും: ഇന്നസെന്റ്
കൊച്ചി: കേരളത്തിലെ തിരഞ്ഞെടുപ്പ് ചൂടൊക്കെ ഒന്ന് കെട്ടടങ്ങിയപ്പോള് ഇന്നസെന്റ് വീണ്ടും അഭിനയത്തിരക്കിലേക്ക് തന്നെ തിരിഞ്ഞു. ജോണി ആന്റണി സംവിധാനം ചെയ്യുന്ന ഭയ്യാ ഭയ്യാ എന്ന ചിത്രത്തിലാണ് ഇന്നസെന്റ് ഇപ്പോള് അഭിനയിച്ചുകൊണ്ടിരിക്കുന്നത്.
പതിനാറാം ലോക്സഭാ തിരഞ്ഞെടുപ്പില് കേരളത്തില് നിന്നു നോക്കുമ്പോള് ഒരേ ഒരു താരം ഇന്നസെന്റ് മാത്രമായിരുന്നു. ഇന്നസെന്റിന്റെ സ്ഥാനാര്ത്ഥിത്വത്തിനെതിരെ സിനിമാ മേഖലയില് നിന്നുള്പ്പടെ വിമര്ശനങ്ങള് ഉയര്ന്നിട്ടുമുണ്ട്. എന്തായാലും തിരഞ്ഞെടുപ്പില് ജയിച്ച് എം പി ആയാലും അഭിനയം തുടരുമെന്ന് ഇന്നസെന്റ് പറഞ്ഞു.
ജയിച്ചാല് എം പിയും നടനുമായി തുരുന്ന ഇന്നസെന്റ് തോറ്റാലോ എന്ന് ചിലര്ക്ക് സംശയമുണ്ടാകും. തോറ്റാലും ഇന്നസെന്റെന്ന സാമൂഹ്യജീവി ജനങ്ങള്ക്കിടയില് തന്നെയുണ്ടാകും. തോറ്റാല് സാമൂഹ്യപ്രവര്ത്തന രംഗത്ത് സജീവമാകുമെന്ന് ഇന്നസെന്റ് പറഞ്ഞു.
ഓര്ഡിനറി, റോമന്സ്, ത്രി ഡോട്സ്, മല്ലു സിംഗ്, സീനിയേഴ്സ് തുടങ്ങിയ ചിത്രങ്ങള്ക്ക് ശേഷം ബിജു മേനോനും കുഞ്ചാക്കോ ബോബനും വീണ്ടും ഒന്നിക്കുന്ന ചിത്രമാണ് ഭയ്യാ ഭയ്യാ. ഹാസ്യത്തിന് പ്രധാന്യം നല്കി ഒരുക്കുന്ന ചിത്രത്തിന് വേണ്ടി തിരക്കഥയെഴുതുന്നത് ബെന്നി പി നായരമ്പലമാണ്. ഗ്രീന് പ്രൊഡക്ഷന്സിന്റെ ബാനറില് നിര്മിക്കുന്ന ചിത്രം പൂര്ണമായും കുടുംബ ബന്ധങ്ങള്ക്ക് പ്രധാന്യം നല്കുന്നു.