നെടുമ്പാശേരിയില്‍ 20 കോടിയുടെ മയക്കുമരുന്ന് വേട്ട

കൊച്ചി: കേരളത്തിലെ വിമാനത്താവളങ്ങള്‍ വഴി സ്വര്‍ണക്കടത്ത് സ്ഥിരം ഇടപാടാണെന്ന് ഇപ്പോള്‍ എല്ലാവര്‍ക്കും അറിയം. എന്നാല്‍ വന്‍ മയക്കുമരുന്ന് വേട്ടയാണ് ഇപ്പോള്‍ നെടുമ്പാശേരി വിമാനത്താവളത്തില്‍ നടന്നിരിയ്ക്കുന്നത്.

അന്താരാഷ്ട്ര വിപണിയില്‍ 20 കോടി രൂപയോളം വിലവരുന്ന മയക്കുമരുന്നാണ് പിടികൂടിയത്. ദക്ഷിണാഫ്രിക്കന്‍ സ്വദേശിയായ യുവതിയാണ് മരുന്ന് കടത്താന്‍ ശ്രമിച്ചത്.

എഫിഡ്രിന്‍ എന്ന മരുന്നാണ് ഇവര്‍ കടത്താന്‍ ശ്രമിച്ചത്. ദില്ലിയില്‍ ജെറ്റ് എയര്‍വേയ്‌സിന്റെ വിമാനത്തിലാണ് ഇവര്‍ നെടുമ്പാശേരിയില്‍ എത്തിയത്. തുടര്‍ന്ന് നടത്തിയ പരിശോധനയിലാണ് നിരവധി ബാഗുകളിലായി ഒളിപ്പിച്ച മരുന്ന് കണ്ടെത്തിയത്.

കൊച്ചിയില്‍ നിന്ന് ദോഹ വഴി ദക്ഷിണാഫ്രിക്കയില്‍ എത്തിയ്ക്കുകയായിരുന്നു ഇവരുടെ ലക്ഷ്യം. 14 കിലോഗ്രാം എഫ്രിഡിന്‍ മരുന്നാണ് ഇവരില്‍ നിന്ന് പിടികൂടിയത്. ബാഗേജില്‍ 52 വാനിറ്റി ബാഗുകളിലായിട്ടാണ് ഇവര്‍ മരുന്ന് ഒളിപ്പിച്ച് വച്ചിരുന്നത്.

ഇവര്‍ പലതവണ ഇന്ത്യയിലെത്തിയിരുന്നതായാണ് പാസ്‌പോര്‍ട്ടില്‍ നിന്ന് ലഭിയ്ക്കുന്ന വിവരം. മയക്കുമരുന്ന് കടത്തിലെ അന്താരാഷ്ട്ര ശൃംഖലയിലെ കണ്ണിയാണ് ഇപ്പോള്‍ പിടിയിലായ സ്ത്രീ എന്നാണ് ലഭിയ്ക്കുന്ന സൂചനകള്‍.

English summary

Illegal drug transport caught at Nedumbassery Airport.