കൊശമറ്റം ഫിനാൻസിൽ ആദായനികുതി വകുപ്പിന്റെ റെയ്ഡ്! സ്ഥാപന ഉടമയെ ചോദ്യം ചെയ്തു...

കേരളത്തിനകത്തും പുറത്തുമുള്ള 60 ശാഖകളിൽ ബുധനാഴ്ച പുലർച്ചെ മുതൽ ഒരേസമയത്താണ് റെയ്ഡ് ആരംഭിച്ചത്.

കോട്ടയം: പ്രമുഖ ധനകാര്യ സ്ഥാപനമായ കൊശമറ്റം ഫിനാൻസിന്റെ വിവിധ ശാഖകളിൽ ആദായ നികുതി വകുപ്പ് റെയ്ഡ് നടത്തി. കൊശമറ്റം ഫിനാൻസിൽ വ്യാപകമായ നികുതി വെട്ടിപ്പ് നടക്കുന്നുവെന്ന പരാതിയെ തുടർന്നായിരുന്നു ആദായ നികുതി വകുപ്പിന്റെ റെയ്ഡ്.

കേരളത്തിനകത്തും പുറത്തുമുള്ള 60 ശാഖകളിൽ ബുധനാഴ്ച പുലർച്ചെ മുതൽ ഒരേസമയത്താണ് റെയ്ഡ് ആരംഭിച്ചത്. കോട്ടയം ചന്തക്കവലയിലെ കൊശമറ്റം ഹെഡ് ഓഫീസിലും ഇതേസമയം പരിശോധന തുടങ്ങി. ബുധനാഴ്ച പുലർച്ചെ ആരംഭിച്ച റെയ്ഡ് രാത്രി വൈകും വരെ നീണ്ടുനിന്നു. രാജ്യത്തെ വിവിധ ശാഖകളിൽ നടത്തിയ പരിശോധനയിൽ സുപ്രധാന രേഖകളും, കമ്പ്യൂട്ടർ ഹാർഡ് ഡിസ്ക്കുകളും പിടിച്ചെടുത്തിട്ടുണ്ടെന്നാണ് സൂചന. മാധ്യമം ദിനപ്പത്രമാണ് ഇതുസംബന്ധിച്ച വാർത്ത പ്രസിദ്ധീകരിച്ചിരിക്കുന്നത്.

ചന്തക്കവലയിലെ ഹെഡ് ഓഫീസിൽ പരിശോധന നടത്തിയ ആദായ നികുതി വകുപ്പ് ഉദ്യോഗസ്ഥർ സ്ഥാപന ഉടമയെയും ചോദ്യം ചെയ്തു. സ്വർണ്ണ പണയ വായ്പ നൽകുന്ന സംസ്ഥാനത്തെ പ്രമുഖ സ്ഥാപനമാണ് കൊശമറ്റം ഫിനാൻസ്. കേരളത്തിന്റെ വിവിധ ഭാഗങ്ങളിലും കേരളത്തിന് പുറത്തെ പ്രധാന നഗരങ്ങളിലും കൊശമറ്റം ഫിനാൻസിന് ശാഖകളുണ്ട്. കൊശമറ്റം സ്ഥാപനങ്ങളിൽ തിരിച്ചെടുക്കാത്ത പണയ സ്വർണം ലേലം ചെയ്യുമ്പോൾ കമ്പനിയുടെ ആളുകൾ തന്നെ ചുരുങ്ങിയ വിലയ്ക്ക് ഈ സ്വർണം കൈവശപ്പെടുത്തി നികുതി വെട്ടിക്കുന്നതായാണ് പരാതി ഉയർന്നിരുന്നത്. ഇതിനുപുറമേ, കേന്ദ്ര ധനകാര്യ വകുപ്പ് പുറത്തുവിട്ട അതിനഷ്ട സാദ്ധ്യതയുള്ള ധനകാര്യ സ്ഥാപനങ്ങളുടെ പട്ടികയിൽ കൊശമറ്റം ഫിനാൻസിന്റെ പേരുമുണ്ടായിരുന്നു.

English summary

income tax raid in kosamattam finance branches across india.