എല്ലാവർക്കും സ്വന്തമായി വീട്, കരകൗശല തൊഴിലാളികൾക്കായി 15,000 കോടി; പ്രഖ്യാപനങ്ങളുമായി പ്രധാനമന്ത്രി

ഡൽഹി: സ്വാതന്ത്ര ദിന പ്രസംഗത്തിൽ വിവിധ പദ്ധതികൾ പ്രഖ്യാപിച്ച് പ്രധാനമന്ത്രി നരേന്ദ്ര മോദി. എല്ലാവർക്കും സ്വന്തമായി വീട്, കരകൗശല തൊഴിലാളികൾക്കായി 15,000 കോടി, കൂടുതൽ ജൻ ഔഷധി കേന്ദ്രങ്ങൾ എന്നിവയാണ് പ്രധാനമന്ത്രി പ്രഖ്യാപിച്ചത്.ലോക്സഭ തിരഞ്ഞെടുപ്പിന് തൊട്ട് മുൻപാണ് പ്രധാനമന്ത്രിയുടെ പ്രഖ്യാപനമെന്നതും ശ്രദ്ധേയമാണ്.

കരകൗശല തൊഴിലാളികളെ സഹായിക്കുന്നതിനായി 13,000-15,000 കോടി രൂപ ചെലവിട്ട് 'വിശ്വകർമ യോജന'ആരംഭിക്കുമെന്നായിരുന്നു പ്രധാനമന്ത്രിയുടെ പ്രഖ്യാപനങ്ങളിൽ ഒന്ന്. വിശ്വകർമ്മ ജയന്തിലാണ് പദ്ധതി നടപ്പാക്കുക. ധോബികൾ, സ്വർണ്ണപ്പണിക്കാർ, ബാർബർമാർ തുടങ്ങിയ വിദഗ്ധ തൊഴിലാളികൾക്ക് വേണ്ടിയുള്ളതായിരിക്കും പ്രധാനമായും പദ്ധതി.

പുതിയ ജൻ ഔഷധി കേന്ദ്രങ്ങൾ ആരംഭിക്കുമെന്നും പ്രധാനമന്ത്രി പറഞ്ഞു.10,000 ൽ നിന്നും ജൻ ഔഷധി കേന്ദ്രങ്ങൾ 25,000 ആയി ഉയർത്തും. എല്ലാവര്‍ക്കും സ്വന്തമായി ഭവനം എന്ന സ്വപ്‌നം നടപ്പാക്കാന്‍ പദ്ധതി ആരംഭിക്കും. നഗരങ്ങളിൽ താമസിക്കുന്ന എന്നാൽ സ്വന്തമായി വീടില്ലാത്തതുമായ ഇടത്തരം കുടുംബങ്ങൾക്ക് ബാങ്ക് വായ്പയിൽ ഇളവ് നൽകുമെന്നും അദ്ദേഹം അറിയിച്ചു.നേരത്തെ പാവപ്പെട്ടവരുടെ വീടുകൾ നിർമിക്കാൻ 90,000 കോടി രൂപ ചെലവഴിച്ചിരുന്നത്. ഇന്ന് അത് 4 മടങ്ങ് വർധിക്കുകയും 4 ലക്ഷം കോടിയിലധികം രൂപയായെന്നും പ്രധാനമന്ത്രി

സ്ത്രീ കേന്ദ്രീകൃത വികസനമാണ് രാജ്യത്ത് ഉണ്ടാകേണ്ടത്. ഇതിനായി രണ്ടുകോടി സ്ത്രീകളെ ലക്ഷാധിപതികളാക്കുകയാണ് സര്‍ക്കാരിന്റെ ലക്ഷ്യം. ഡ്രോണുകൾ പ്രവർത്തിപ്പിക്കുന്നതിനും നന്നാക്കുന്നതിനുമായി 15,000 വനിതാ സ്വയം സഹായ സംഘങ്ങൾക്ക് വായ്പയും പരിശീലനവും നൽകുമെന്ന് പ്രധാനമന്ത്രി പറഞ്ഞു.

കർഷകർക്ക് യൂറിയ സബ്‌സിഡിയായി ഗവണ്മെന്റ് 10 ലക്ഷം കോടി രൂപ അനുവദിച്ചിട്ടുണ്ട്. ആഗോള തലത്തിൽ
ഒരു ചാക്കിന് 3,000 രൂപ വിലയുള്ള യൂറിയ, 300 രൂപയ്ക്ക് കുറഞ്ഞ നിരക്കിലാണ് നൽകുന്നതെന്നും പ്രധാനമന്ത്രി വിശദീകരിച്ചു. അഞ്ചു വര്‍ഷത്തിനിടെ പതിമൂന്നര കോടി ജനങ്ങളാണ് ദാരിദ്ര്യരേഖയ്ക്ക് മുകളിലെത്തിയതെന്ന് പ്രധാനമന്ത്രി പറഞ്ഞു. പ്രധാനമന്ത്രി സ്വനിധി പദ്ധതിയിലൂടെ വഴിയോരക്കച്ചവടക്കാർക്ക് 50,000 കോടി നൽകിയെന്നും പ്രധാനമന്ത്രി കിസാൻ സമ്മാൻ നിധി വഴി കർഷകരുടെ അക്കൗണ്ടുകളിലേക്ക് നേരിട്ട് 2.5 ലക്ഷം കോടി രൂപ നിക്ഷേപിച്ചെന്ന് പ്രധാനമന്ത്രി വിശദീകരിച്ചു.

പത്തുവർഷം മുമ്പ് 30 ലക്ഷം കോടി രൂപയാണ് കേന്ദ്ര ഗവണ്മെന്റിൽ നിന്നും സംസ്ഥാനങ്ങളിലേക്ക് കൈമാറ്റം ചെയ്യപ്പെട്ടിരുന്നത് എന്നാൽ ഇന്ന് സംസ്ഥാനങ്ങൾക്കുള്ള ധനവിതരണം 30 ലക്ഷം കോടി രൂപയിൽനിന്ന് 100 ലക്ഷം കോടി രൂപയായി വർധിപ്പിച്ചു

English summary

Independence Day Speech; PM Modi Announces Different Schemes