പിസി ജോര്ജ്ജിന് ഇന്ദുലേഖയുടെ വക്കീല് നോട്ടീസ്
കൊച്ചി: സര്ക്കാര് ചീഫ് വിപ്പ് പിസി ജോര്ജ്ജിന് ഇപ്പോള് അത്ര നല്ല കാലമല്ലെന്ന് തോന്നുന്നു. യൂത്ത് കോണ്ഗ്രസുകാര് നപുംസകമെന്നും കൃമിയെന്നും ഒക്കെ വിളിച്ചുകഴിഞ്ഞപ്പോഴിതാ ഒരു വക്കീല് നോട്ടീസിന്റെ ഭാരം കൂടി വരുന്നു. അതും ഒരു സ്ത്രീയുടെ വക.
ചര്ച്ച് ആക്ടിന്റെ പ്രവര്ത്തകയായ ഇന്ദുലേഖ ജോസഫ് ആണ് ജോര്ജ്ജിന് വക്കീല് നോട്ടീസ് അയച്ചിരിക്കുന്നത്. തന്നേയും കുടുംബത്തേയും സമൂഹത്തിന് മുന്നില് അധിക്ഷേപിച്ചു എന്നാണ് ആക്ഷേപം. ഒരു കോടി രൂപയാണ് നഷ്ടപരിഹാരം ആവശ്യപ്പെട്ടിരിക്കുന്നത്.
ക്രിസ്തീയ സഭകളെ വിമര്ശിക്കുന്ന രീതിയിലാണ് ഇന്ദുലേഖ ജോസഫ് നേതൃത്വം നല്കുന്ന ചര്ച്ച് ആക്ടിന്റെ പ്രവര്ത്തനം. ഇന്ദുലേഖക്കും കുടുംബത്തിനും വട്ടാണെന്നായിരുന്നു പിസി ജോര്ജ്ജിന്റെ പരാമര്ശം. മാറ്റി നിര്ത്തി രണ്ട് അടി കൊടുത്താല് അത് മാറുമെന്നും ജോര്ജ്ജ് പറഞ്ഞിരുന്നു. പള്ളിക്കും അച്ചന്മാര്ക്കും എതിരെ ബ്ലാക്ക് മാജിക്കുമായി ഇറങ്ങിയിരിക്കുകയാണെന്നും പിസി ജോര്ജ്ജ് ഇന്ദുലേഖയെക്കുറിച്ച് പറഞ്ഞിരുന്നു.
ഈ പരാമര്ശങ്ങള്ക്കെതിരെയാണ് ഇന്ദുലേഖയുടെ വക്കീല് നോട്ടീസ്. അടുത്ത അസംബ്ലി തിരഞ്ഞെടുപ്പില് ഇന്ദുലേഖ നേതൃത്വം നല്കുന്ന സംഘടന സ്ഥാനാര്ത്ഥികളെ നിര്ത്തുന്നുണ്ടെന്നാണ് വിവരം. പൂഞ്ഞാര് മണ്ഡലത്തില് പിസി ജോര്ജ്ജിന് എതിരായി ഇന്ദുലേഖ തന്നെ മത്സരിക്കും എന്നും ശ്രുതിയുണ്ട്. ഈ സാഹചര്യത്തിലായിരുന്നു ജോര്ജ്ജിന്റെ പരാമര്ശങ്ങള്.
നിയമ ബിരുദ ധാരിയാണ് ഇന്ദുലേഖ. ഇവരുടെ പിതാവ് ജോസഫ് വര്ഗ്ഗീസ് എഴുതിയ 'നസ്രായനും നാറാണത്ത് ഭ്രാന്തനും' എന്ന പുസ്തകം ഏറെ വിവാദമായിരുന്നു. ഇതേ തുടര്ന്ന് ഇന്ദുലേഖയെ ക്രിസ്ത്യന് മാനേജ്മെന്റ് കോളേജില് നിന്ന് പുറത്താക്കുക വരെ ഉണ്ടായി.