സ്വർണം പതുങ്ങുന്നത് കുതിക്കാനോ? മെയ് മാസം വില കുതിക്കും? ഇപ്പോൾ വാങ്ങണോ? അറിയാം

പ്രതിസന്ധി കാലത്തെ സുരക്ഷിത നിക്ഷേപമണ് സ്വർണം. അതുകൊണ്ട് തന്നെ ഇറാൻ-യുഎസ് സംഘർഷം കടുത്തതോടെ സ്വർണത്തിന് ഡിമാൻ്റ് ഉയരുമെന്നും വില കുതിക്കുമെന്നുമാണ് പൊതുവെ വിലയിരുത്തപ്പെട്ടത്. എന്നാൽ പ്രതീക്ഷിച്ചതിന് വിപരീതമായിട്ടായിരുന്നു സ്വർണത്തിൻ്റെ പ്രതികരണം. വില ഏകദേശം 10 ശതമാനത്തിലധികം ഇടിഞ്ഞു. എണ്ണ വില ഉയർന്നതും പണപ്പെരുപ്പ ആശങ്ക ശക്തമായതുമാണ് വില ഉയരാൻ കാരണമായത്.

ആഗോള സാഹചര്യം ഇപ്പോഴും അസ്ഥിരമായി തുടരുകയാണ്. ഇറാനും യുഎസും ഔദ്യോഗികമായി വെടിനിർത്തൽ പ്രഖ്യാപിച്ചിട്ടുണ്ടെങ്കിലും സംഘർഷ സാധ്യതകൾ ഇപ്പോഴും നിലനിൽക്കുന്നുണ്ട്. ഇറാനെതിരെ കൂടുതൽ ശക്തമായ നടപടികൾക്ക് അമേരിക്ക ഒരുങ്ങുന്നതായും വാർത്തകളുണ്ട്. ഇത്രയൊക്കെ സംഭവിച്ചിട്ടും സ്വർണം 4,600-നും 4,800-നും ഡോളറിനിടയിൽ തുടരുകയാണ്. ഏപ്രിലിൽ വിലയിൽ 0.03 ശതമാനം മാത്രമാണ് വർദ്ധനവുണ്ടായത്.

എന്തുകൊണ്ടാണ് സ്വർണ്ണവില ഉയരാത്തത്? വിപണി രണ്ട് വ്യത്യസ്ത ദിശകളിൽ ചിന്തിക്കുന്നതാണ് ഇതിന് കാരണമായി വിദഗ്ദ്ധർ പറയുന്നത്. ഒരു വശത്ത്, രാഷ്ട്രീയ അനിശ്ചിതത്വങ്ങളും സെൻട്രൽ ബാങ്കുകളുടെ തുടർച്ചയായ സ്വർണ്ണ വാങ്ങലും വിലയെ പിന്തുണയ്ക്കുന്നുണ്ട്. എന്നാൽ മറുവശത്ത്, ഉയർന്ന ബോണ്ട് വരുമാനം, പലിശ നിരക്കുകൾ ദീർഘകാലം ഉയർന്നുനിൽക്കുമെന്ന പ്രതീക്ഷ, ഡോളറിന്റെ ശക്തി എന്നിവ വില ഉയരുന്നത് തടയുന്നു.

ഈ സമ്മിശ്ര പ്രതികരണം സമീപകാല വിലകളിൽ പ്രകടമാണ്.. 2026-ന്റെ തുടക്കത്തിൽ സ്വർണം ഒരു ഔൺസിന് 5,600 ഡോളർ കടന്നിരുന്നു. എന്നാൽ ഇറാൻ സംഘർഷം രൂക്ഷമായതോടെ ഏകദേശം 10% - 12% വരെ വില കുറഞ്ഞു. ഇത് ഒരു നിശ്ചിത പ്രവണതയെ പിന്തുടരുന്നതിനു പകരം നിക്ഷേപകർ ലാഭം എടുക്കുകയും വലിയ സാമ്പത്തിക ഘടകങ്ങളോട് പ്രതികരിക്കുകയും ചെയ്യുന്നതിന്റെ സൂചനയാണ്.

ഹ്രസ്വകാലത്തേക്ക് ഒരു നിശ്ചിത പരിധിക്കുള്ളിൽ സ്വർണവില നീങ്ങുമെന്നാണ് പ്രതീക്ഷിക്കപ്പെടുന്നത്. അടുത്ത വലിയ മുന്നേറ്റം പ്രധാനമായും പലിശ നിരക്ക് തീരുമാനങ്ങളെ ആശ്രയിച്ചിരിക്കും. സാമ്പത്തിക വളർച്ച മന്ദീഭവിക്കുകയും പലിശ നിരക്ക് കുറയ്ക്കുകയും ചെയ്താൽ സ്വർണ്ണവില വീണ്ടും ഉയരാൻ സാധ്യതയുണ്ട്. എന്നാൽ പണപ്പെരുപ്പം ഉയർന്ന നിലയിൽ തുടരുകയും നിരക്കുകൾ വർദ്ധിക്കുകയും ചെയ്താൽ സ്വർണ്ണം നിലവിലെ നിലയിൽ തുടർന്നേക്കാം. വില ഔണ്‍സിന് 4,500 ഡോളറിന് താഴേക്ക് പോയാൽ പിന്നേയും 4,350 ഡോളർ വരെ വില ഇടിമായെന്നാണ് വിദഗ്ധർ പറയുന്നത്. മറുവശത്ത് 4500 ഡോളർ കടന്നാൽ 5,200 ഡോളറിലേക്ക് വില നീങ്ങിയേക്കാം.

സ്വർണ്ണം വാങ്ങാൻ ഇത് നല്ല സമയമാണോ?

വിപണിയുടെ ഏറ്റവും അനുയോജ്യമായ സമയം കണ്ടെത്താൻ ശ്രമിക്കരുതെന്ന് വിദഗ്ദ്ധർ പറയുന്നു. സ്വർണ്ണം ഉയർന്ന വരുമാനത്തിനുള്ള നിക്ഷേപമല്ല, മറിച്ച് നിങ്ങളുടെ സാമ്പത്തിക പോർട്ട്‌ഫോളിയോയ്ക്ക് സ്ഥിരത നൽകാനുള്ളതാണ്. സ്വർണ്ണത്തിൽ നിക്ഷേപമില്ലാത്തവർക്ക് സാവധാനം തുടങ്ങാവുന്നതാണ്. നിലവിൽ ധാരാളം സ്വർണ്ണമുള്ളവർ കൂടുതൽ കൂട്ടുന്നത് ഒഴിവാക്കുക.

കൂടുതൽ നല്ലൊരു തന്ത്രം ഘട്ടം ഘട്ടമായി നിക്ഷേപം നടത്തുക എന്നതാണ്. ഇപ്പോൾ ഒരു ചെറിയ തുകയുമായി തുടങ്ങുക, വില 5-10% ഇടിയുകയാണെങ്കിൽ കൂടുതൽ നിക്ഷേപിക്കുക, വലിയ ഇടിവുകളുടെ സമയത്ത് വീണ്ടും നിക്ഷേപം നടത്തുക. ഇത് അപകടസാധ്യത കുറയ്ക്കാനും ശരാശരി വാങ്ങൽ വില മെച്ചപ്പെടുത്താനും സഹായിക്കും.ഇപ്പോൾ ശ്രദ്ധിക്കേണ്ട ഏറ്റവും പ്രധാനപ്പെട്ട ഘടകം യഥാർത്ഥ പലിശ നിരക്കുകളാണ്. സെൻട്രൽ ബാങ്കുകൾ പലിശ നിരക്ക് കുറയ്ക്കുന്നതിന്റെ സൂചനകൾ നൽകുകയാണെങ്കിൽ സ്വർണ്ണവില ശക്തമായി ഉയരാം. അതുവരെ, വില അസ്ഥിരമായി തുടരാനും സാധ്യതയുണ്ട്. അതിനാൽ, ഒറ്റയടിക്ക് നിക്ഷേപിക്കാൻ തിടുക്കം കാണിക്കുന്നതിനേക്കാൾ ക്ഷമയും അച്ചടക്കമുള്ള സമീപനവുമാണ് പ്രധാനമെന്നും ഇവർ ചൂണ്ടിക്കാട്ടുന്നു.