സരിത ഒളിവിലാണോ..?
തിരുവനന്തപുരം: സോളാര് തട്ടിപ്പുകേസിലെ പ്രതി സരിത നായര് ജയിലില് നിന്നിറങ്ങിയെങ്കിലും ഇപ്പോള് എവിടെയന്ന് ആര്ക്കും അറിയില്ല. രണ്ട് ദിവസം കഴിഞ്ഞാല് മാധ്യമങ്ങളെ കാണുമെന്ന് പറഞ്ഞ സരിത ഇപ്പോഴും അജ്ഞാത കേന്ദ്രത്തിലാണ് ഉള്ളതെന്നാണ് റിപ്പോര്ട്ടുകള്.
ആലപ്പുഴയില് വച്ച് ഞായറാഴ്ച മാധ്യമ പ്രവര്ത്തകരെ കാണുമെന്നാണ് ജയിലില് നിന്നിറങ്ങിയ സരിത ആദ്യം അറിയിച്ചിരുന്നത്. എന്നാല് സന്നാഹങ്ങളുമായി കാത്തിരുന്ന മാധ്യമ പ്രവര്ത്തകര്ക്ക് നിരാശരാകേണ്ടി വന്നു.
കാസര്കോട് ഹോസ്ദുര്ഗ് കോടതിയില് വാറണ്ട് ഉണ്ടായിരിക്കെയാണ് സരിതയെ കഴിഞ്ഞ ദിവസം ജയിലില് നിന്ന് വിട്ടയച്ചത്. ഇത് വലിയ വാര്ത്തയായിരുന്നു. സോളാര് തട്ടിപ്പുമായി ബന്ധപ്പെട്ട 33 കേസുകളിലും ജാമ്യം ലഭിച്ചതിന്റെ അടിസ്ഥാനത്തിലാണ് സരിതയെ വിട്ടയക്കുന്നത് എന്നായിരുന്നു സര്ക്കാര് പറഞ്ഞിരുന്നത്.
എന്തായാലും ഹോസ്ദുര്ഗ് കോടതിയില് നിന്ന് സരിതക്ക് ജാമ്യം എടുത്തേ മതിയാകൂ. ഇതിനായി ഫെബ്രുവരി 24 തിങ്കളാഴ്ച സരിത കോടതിയില് എത്തുമെന്ന് റിപ്പോര്ട്ടുകളുണ്ട്.
മാധ്യമങ്ങളോട് എല്ലാം തുറന്ന് പറയും എന്ന സരിതയുടെ പ്രഖ്യാപനം വിലപേശലിന്റെ ഭാഗമായിട്ടാണെന്ന് ആരോപണം ഉണ്ട്. ഇതിന് മുന്പും സരിത ഇത്തരം പ്രസ്താവനകള് നടത്തുകയും പിന്നീട് അതിനെക്കുറിച്ച് പ്രതികരിക്കാതിരിക്കുകയും ചെയ്തിട്ടുണ്ട്. രാഷ്ട്രീയത്തിലുള്ള ആരേയും ഉപദ്രവിക്കാന് താനില്ല എന്നായിരുന്നു സരിത ജയിലിലല് നിന്ന് പുറത്തിറങ്ങിയ ഉടന് പറഞ്ഞത്.