ജാനകിവധക്കേസില് 2400 പേജുള്ള കുറ്റപത്രം കോടതിയില് സമര്പ്പിച്ചു; 560 സാക്ഷികള്
കാഞ്ഞങ്ങാട്: റിട്ട. അധ്യാപിക ചീമേനി പുലിയന്നൂരിലെ ജാനകിയെ കഴുത്തറുത്ത് കൊലപ്പെടുത്തി സ്വര്ണാഭരണങ്ങള് കവര്ന്ന കേസില് പൊലീസ് അന്വേഷണം പൂര്ത്തിയാക്കിയ ശേഷം കോടതിയില് കുറ്റപത്രം സമര്പ്പിച്ചു. ചീമേനിയിലെ വിശാഖ്, റനീഷ്, അരുണ് എന്നിവര്ക്കെതിരെയാണ് നീലേശ്വരം സി.ഐ ഉണ്ണികൃഷ്ണന് ഹൊസ്ദുര്ഗ് ജുഡീഷ്യല് ഒന്നാംക്ലാസ് മജിസ്ട്രേട്ട്(ഒന്ന്) കോടതിയില് കുറ്റപത്രം നല്കിയത്. 2400 പേജുള്ളതാണ് കുറ്റപത്രം. 60,000 ഫോണ്കോളുകളാണ് ഈ കേസില് പൊലീസ് ശേഖരിച്ചത്. 560 സാക്ഷികളുണ്ട്. 380 തൊണ്ടിമുതലുകളും രേഖകളും ശേഖരിച്ചു.
17 പവന് സ്വര്ണം പിടിച്ചെടുത്തു. 1,66,000 രൂപയുടെ ബാങ്ക് അക്കൗണ്ട് മരവിപ്പിക്കുകയും 66000 രൂപ പ്രതികളില് നിന്ന് പിടിച്ചെടുക്കുകയും ചെയ്തിരുന്നു. 2017 ഡിസംബര് 13നാണ് ജാനകിയെ പുലിയന്നൂരിലെ വീട്ടില് കൊലചെയ്യപ്പെട്ടനിലയില് കണ്ടെത്തിയത്.
കവര്ച്ചാസംഘത്തെ ചെറുക്കാന് ശ്രമിക്കുന്നതിനിടെ ജാനകിയുടെ ഭര്ത്താവ് കൃഷ്ണന്മാസ്റ്റര്ക്ക് കുത്തേല്ക്കുകയും ചെയ്തിരുന്നു. സംഭവത്തില് ചീമേനി പൊലീസ് കേസെടുക്കുകയും കാഞ്ഞങ്ങാട് ഡി.വൈ.എസ്.പി. കെ. ദാമോദരന്റെ നേതൃത്വത്തില് അന്വേഷണം നടത്തി പ്രതികളെ പിടികൂടുകയായിരുന്നു.